1 Dieikopeta꞉ mo ipika꞉ ateke hayeke Keinani kenke pa꞉ta꞉ paa hayekeme. 2 Kutupa dota꞉ mo ipika꞉ tapakena꞉ tamenie.

Diosepeta꞉ 17 bapina꞉ pa꞉pa꞉na꞉ weki hata꞉ mo ipika꞉ atekena꞉ e pokaeyeke wanda꞉ yaapo Biliha pita꞉ Silipa yaapona꞉ eiyeke tonu ame̱le̱ mo sipisipimanu make nanikosimanu make handeteke haemekeme. Ipikana꞉ma꞉ta꞉ ateke pa꞉ta꞉ mo ipika꞉ hameke tonuma꞉ hoke tupa꞉ pia꞉tiki pimiki ekina꞉ pi mea a꞉pa꞉tiki piekeme.

3 Dieikopema꞉ta꞉ mo wekitonu anka꞉lopuna꞉ta꞉ Diosepe pa꞉ta꞉ homeke puki tieke wopuma꞉ homeekeme. Pa ekipe mo wekita꞉ ipiki koke nanema꞉ mendiaeyeke weki yeke handa piekeme. Ipikana꞉ma꞉ta꞉ mo wekina꞉ ta꞉ta꞉ ma꞉nda꞉ piki au leke kosa꞉ dau hokulupeke wepia haleekeme. 4 Kutupa mo ipika꞉ hameke tonuma꞉ ika꞉ atekema꞉ Diosepe pa꞉ta꞉ homeke puki tiekema꞉ wopu homeekeeki hando haota꞉ kota꞉ ika꞉ kame pa꞉ta꞉ta꞉ honditi pitolo hata꞉ homu piki pi manuma꞉ na la halemekeme.

5 Timba ma꞉nda꞉ta꞉ Diosepema꞉ upa pea mo ipika꞉ hameke tonu laa haleeketa꞉ kota꞉ ikana꞉ma꞉ ota꞉ mineke leke ale panka a꞉nda꞉ lia haemekeme. 6 Ipikana꞉ma꞉ alota꞉ Mo I̱ma꞉ pua꞉ upa kelepono opua꞉pe. 7 Niki paeyaota꞉ oni e pa꞉ta꞉ hata꞉ widimanu tonkaaso haoma꞉me. Kutupa yaka widi tonkaaketa꞉ tikitikina꞉ tialiao haya꞉me. Kutupa ika꞉eki manuma꞉ta꞉ yakaeki popei yao hata꞉ yaka widi tonkaake pa꞉ta꞉ panda꞉ puniaememe laa leekeme.

8 Koto leeke mo hameke tonuma꞉ lota꞉ pitolo alota꞉ Naka꞉ honema꞉ta꞉ neketa꞉ kini hali hata꞉ niki handeteke halipikie hone witelepe lemekeme. Koto ekina꞉ mo ipika꞉ upamanu tonka꞉na꞉ mo ipikana꞉ma꞉ a꞉pa la꞉tiki pieke pimanu tonka꞉na꞉ opia꞉tiki pitolo hata꞉ ikana꞉ma꞉ ota꞉ hoke mineke panka꞉tiki pimikime.

9 Kutupa Diosepema꞉ upa ma꞉nda꞉ pea ipika꞉ hameke tonu pa꞉ta꞉ alota꞉ I̱ma꞉ upa ma꞉nda꞉ dupa pua꞉me. I̱ma꞉ta꞉ nate make kaisepo make kiki yaapona꞉ ankena꞉ homeke hombulanka꞉manu make handoa꞉me Kutupa moeki manuma꞉ta꞉ I̱ pa꞉ta꞉ panda꞉puniaememe leekeme.

10 Ipikana꞉ma꞉ mo koto upata꞉ ipika꞉ ateke pa꞉ta꞉ make la haleeke handaata꞉ atekema꞉ ipiki hando alo hata꞉ alota꞉ Kotota꞉ ekipiki upa pea pelepe. Naka꞉ honema꞉ta꞉ naka꞉ ama꞉ma꞉ make naka꞉ kame tonuma꞉ make I̱ma꞉ make neke pa꞉ta꞉ a꞉pa panda꞉ punialumekee laa alepe leekeme. 11 Diosepena꞉ hameke tonuma꞉ta꞉ ipiki pa꞉ta꞉ wamili pimikipate atekema꞉ta꞉ mo ekina꞉ hone pa wia꞉tiki pu hayekeme.

12 Nate ma꞉nda꞉na꞉ Diosepena꞉ hameke tonuta꞉ mo atekena꞉ ma꞉na꞉manu handeteke halo oni Sekeme nane pua haena꞉ta꞉ 13 Dieikopema꞉ Diosepe pa꞉ta꞉ alota꞉ Yaka ta꞉na꞉ pa꞉la꞉ ekita꞉ neketa꞉ oni naka꞉ kame tonuma꞉ mo ma꞉na꞉manu handeteke haleme alena꞉ Sekeme nane poelena꞉e leekeme. Koto leeke Diosepema꞉ alota꞉ I̱ta꞉ poluekema꞉ tikitiki yalome leekeme. 14 Ipika꞉ atekema꞉ alota꞉ Mo naka꞉ kame tonuta꞉ epeke halemepe laa handolo puata꞉ mo ma꞉na꞉manu epeke tupa꞉ haemeka꞉na꞉ta꞉ kota꞉ paa la꞉ka꞉la I̱ lolo a꞉pa꞉peke leekeme. Koto ekina꞉ atekema꞉ mo wekita꞉ ika꞉ haemeke Hebotoni hadipi mina꞉pa꞉lao peneyeke tapaalo peekeme.

Diosepeta꞉ mo Sekeme opolo pua 15 mo pate pomu lopolo haena꞉ hali ma꞉nda꞉ma꞉ handa꞉ u hao lota꞉ pitolo hata꞉ alota꞉ Neketa꞉ aleke weitolo pipe laa leekeme.

16 Mo wekima꞉ hombo peaaso alota꞉ Mo yaka kame tonu ika꞉ ma꞉na꞉manu handeteke haleme pa꞉ta꞉ weitolome. Koto ekina꞉ mo iki haleme pa꞉ta꞉ handeka꞉na꞉ta꞉ I̱ la kie leekeme.

17 Mo halima꞉ alota꞉ Ikita꞉ amba꞉ pelememe. Ikita꞉ mo Dodani nane puluma꞉me lemeeki opua꞉me leekeme. Koto leeke Diosepeta꞉ hameke tonu telimea pua Dodani pua handa꞉ wiekeme.

18 Mo hama̱la̱꞉ hama̱la̱꞉ma꞉ta꞉ Diosepe papate leke epeekeeki hando haota꞉ a̱i̱ na opolo epeke haena꞉ kone pi lo tonkaasota꞉ lu homaamana꞉e laa lemekeme. 19 Ika꞉ ika꞉ kone la alu alu pitolo hata꞉ alota꞉ Hande upa pu hala꞉ some ipula꞉mee. 20 Ameta꞉ a̱i̱ lu homao ipika꞉ loketa꞉ oni naku ikali hapupapeke ekimanu ma꞉nda꞉ pa꞉ta꞉ lu baamana꞉e. Ipikita꞉ tikene ma꞉na꞉yeti sayale ma꞉nda꞉ma꞉ lia pa꞉la꞉me lomana꞉e. Kutupa ipika꞉ upama꞉ walea꞉eki manuta꞉ pilia꞉eki handomana꞉ loa꞉me lemekeme.

21 Lubenima꞉ mo lemekeeki opu hao Diosepe tamba꞉ muluekema꞉ yeke alota꞉ Na lumana꞉ pipe. 22 Tanda ma꞉nda꞉ na haleketa꞉ pa do hapekena꞉ ula꞉ naku pa꞉ta꞉manu lopamana꞉ pipe leekeme. Lubenima꞉ koto leeke ekita꞉ mo weki pa꞉ta꞉la꞉ mea ateke hala꞉ nane paa tapaalueke hone witolo hata꞉ leekeme. 23 Diosepe mo hameke tonu haemeke alena꞉ opolo epeeketa꞉ mo wekina꞉ ta꞉ta꞉ ma꞉nda꞉ piki au leke kosa꞉ dau hokulupeke titipula꞉ mea baemekeme. 24 Kutupa mo weki meata꞉ mo ikali na pitieke naku pa꞉ta꞉ mea baemekeme.

25 Koto hoki nane ikita꞉ ne nalo pitina꞉ta꞉ koto kone mo Isima꞉elo tapake haliweki Kilia꞉de hao Idiepi nane yapemeeki handemekeme. Ika꞉ kemelo manuta꞉ mo ne tende peaasa꞉ alemanu make totopo piki ti pankekemanu make mu wia yapemekeme. 26 Diudama꞉ ipika꞉ hameke tonu pa꞉ta꞉ alota꞉ Mo nika꞉ kame lia a꞉mbaoma꞉ka꞉na꞉ta꞉ aleke ota꞉ handa꞉ uluma꞉pe. 27 Pao. Do Isima꞉elo tapakema꞉ hambena꞉ tapaamana꞉e. Kutu puma꞉ka꞉na꞉ta꞉ kota꞉ ipiki na hoeyaalumeke. Pa ekipeke ipikita꞉ nika꞉ kame make homeke loke we konee leekeme. Koto leeke ipika꞉ hameke tonuma꞉ta꞉ a꞉pa꞉la꞉me lemekeme. 28 Kutupa mo Midianina꞉ ala꞉ta꞉ ala꞉ta꞉ tapao hala꞉ haliweki epemeketa꞉ mo hama̱la̱꞉ hama̱la̱꞉ma꞉ Diosepe oni naku pa꞉ta꞉ yola꞉ mea mo Isima꞉elo tapake pa꞉ta꞉ 20 silipa manima꞉ mea tapaemeke handaa mo haliwekima꞉ta꞉ hatuku Idiepi nane pemekeme.

29 Kutupa Lubenita꞉ oni naku pa꞉ta꞉ a꞉pa handeeke pate Diosepe na pitiekeeki hando haota꞉ a꞉ta꞉ pitolo hata꞉ ipika꞉ aka꞉manu sinki piekeme. 30 Ipikita꞉ ipika꞉ hameke tonu pa꞉ta꞉ pua alota꞉ Mo wekita꞉ hande naku pa꞉ta꞉ na pila꞉ma꞉ I̱ma꞉ta꞉ eki pulua꞉pe leekeme.

31 Koto ekina꞉ mo hameke tonuma꞉ nanikosi ma꞉nda꞉ lia Diosepena꞉ hokulupeke kosa꞉ dauta꞉ oni ma꞉na꞉ we kita kita pimikime. 32 Kutupa mo dauta꞉ ateke pa꞉ta꞉ mea pua alota꞉ Do dauta꞉ handa꞉ uma꞉mee. Naka꞉ wekina꞉ eki ya꞉ka꞉ta꞉pe laa lota꞉ pimikime.

33 Mo atekema꞉ eiyekena꞉ eki ya꞉ka꞉ta꞉me laa handa꞉ u hao alota꞉ Aowe. Ipika꞉ ekie. Mandane tikene ma꞉na꞉yeti sayalema꞉ lia pia꞉ka꞉ta꞉me. Yaka weki Diosepeta꞉ sinki sinki pea wia pia꞉ka꞉ta꞉me leekeme. 34 Koto ekina꞉ Dieikopema꞉ta꞉ a꞉ta꞉ma꞉ homolo hata꞉ ipika꞉ aka꞉manu sinkipa busa꞉ pitikimanu yameekeme. Ipikana꞉ma꞉ta꞉ nate hokuluna꞉ eiyeke homa꞉ wia pitu hayekeme. 35 Kutu pieke ipika꞉ eiyeke tonuma꞉ make waneke tonuma꞉ make atekena꞉ puki epealo epemekepate pa mo ipiki epeaasa꞉ ekita꞉ kiaaso hata꞉ alota꞉ Oni homo hala꞉ kenke pa꞉ta꞉ pulu maketa꞉ yaka wekina꞉ homa꞉ pa upaleke polueke leekeme. Koto ekina꞉ eiyeke Diosepena꞉ homa꞉ pa utia peekeme.

36 Kutu pitolo haena꞉ta꞉ mo Midiani tapakema꞉ta꞉ oni Idiepi pua Diosepeta꞉ mo kinina꞉ da handeteke haena꞉ leeke you some ma꞉nda꞉ Podipama꞉ hambena꞉ tapaemekeme.

<- KINI PIEKE 36KINI PIEKE 38 ->