1 Nate ma꞉nda꞉na꞉ta꞉ mo Lia Dieikope yaapona꞉ waneke Daenata꞉ mo Keinani wanda꞉weki handolo peekeme. 2 Kutu piekepate mo da kenke pa꞉ta꞉ you hali hayeke Hipi hali Hamona꞉ eiyeke Sekemema꞉ hando haota꞉ Daena꞉ pake lumea peekeme. 3 Pate ipikana꞉ma꞉ mo wandikita꞉ ota꞉ wandiki seliapo yeke handaa mo wandiki pa꞉ta꞉ pukima꞉ homeekeme. Koto ekina꞉ ipikana꞉ma꞉ mo wandikina꞉ puki epealuekema꞉ taapeekeme. 4 Kutupa ipika꞉ ateke pa꞉ta꞉ alota꞉ Apa꞉o. Koto wandikita꞉ yaka wanda꞉ haena꞉ yeke mealena꞉ hone witolome leekeme.

5 Dieikopema꞉ta꞉ waneke pa꞉ta꞉ yaala꞉piki hau piekeeki handeekepate ipika꞉ weki tonuta꞉ oni hama꞉manu pa꞉ta꞉ ipika꞉ ma꞉na꞉manu handeteke halo pemeke ekiyalo pa hando hayekeme. 6-7 Kutupa mo Dieikopena꞉ eiyeke tonuta꞉ oni hama꞉manu pa꞉ta꞉ hao honda꞉ pambolo ipulu haena꞉ kone mo Sekemena꞉ ateke Hamota꞉ Dieikope yaapo pi lolueke alo hata꞉ opolo peekeme. Kutu piekepate mo weki tonuma꞉ta꞉ Sekemema꞉ Dieikopena꞉ waneke lumea pa꞉la꞉ ekita꞉ ota꞉ dupiki hau pa꞉la꞉ ekita꞉ mo Isulai wanda꞉hali pa꞉ta꞉ yala꞉ peake hau pa꞉la꞉me laa tola꞉tia pominolo hata꞉ tetoma꞉ homemekeme. 8 Hamoma꞉ Dieikope pa꞉ta꞉ alota꞉ Yaka weki Sekemema꞉ta꞉ naka꞉ wandikina꞉ da ota꞉ homa꞉la꞉me. 9 Pilisio. Mina꞉ lae. Kutupa naka꞉ wanda꞉hali make yaka wanda꞉hali make mu alu alu pu hala꞉ pa꞉la꞉ tupa꞉ dikana꞉ma꞉ pi lo tonkao u pana꞉e. 10 Kutupa neketa꞉ do yaka kenke pa꞉ta꞉ hata꞉ka꞉na꞉ naka꞉ hone pa꞉la꞉ alena꞉ hata꞉ mo ala꞉ta꞉ ala꞉ta꞉ pa topo topo pea naka꞉ kenkemanu hamba wia halena꞉ loa꞉me leekeme.

11 Kutupa Sekemema꞉ Daenana꞉ ateke make beliki tonu pa꞉ta꞉ alota꞉ I̱ pa꞉ta꞉ a꞉ta꞉ma꞉ homa yaka honke aloeki peaemeka꞉na꞉ta꞉ kota꞉ I̱ma꞉ta꞉ mo ika꞉ hone pa꞉la꞉ alemanu kulueke. 12 Ika꞉ ana꞉ta꞉ ota꞉ muluekema꞉ ika꞉ hone pa꞉la꞉ tupa꞉ pa kitolo alemanu muemena꞉ kota꞉ mo wandikina꞉ yenkita꞉ ika꞉ hone pa꞉la꞉ tupa꞉ make pa mina꞉liaemeka꞉na꞉ kota꞉ pa pina꞉ma꞉ mo wandiki homeke ota꞉ muluekema꞉ hone witolome leekeme.

13 Pate Sekemema꞉ta꞉ ika꞉ ana꞉ Daena yala꞉ peake hau pieke handaa mo Dieikopena꞉ eiyeke tonuma꞉ mo Sekeme pita꞉ ipika꞉ ateke Hamo yaapo pa꞉ta꞉ yayapiki tupa꞉ hombo peaemekeme. 14 Ikana꞉ma꞉ ipiki pa꞉ta꞉ alota꞉ Nika꞉ ana꞉ta꞉ mo sekemesaisi hau na pa꞉la꞉ halima꞉ mia꞉peke na ya꞉la꞉me. Kotota꞉ niki yala꞉ tieke piki haue. 15 Nikana꞉ma꞉ta꞉ niki poloma꞉ tupa꞉ naka꞉ haliweki paeyao sekemesaisi hau pimika꞉na꞉ homeke a꞉pa꞉la꞉me lolumeke. 16 Kutu pimika꞉na꞉ta꞉ nikana꞉ma꞉ta꞉ wanda꞉ mu alu alu pita꞉la꞉ ekita꞉ a꞉pa꞉la꞉me lolumeke. Kutupa nikita꞉ iki ame̱le̱ homeke wanda꞉hali hao polumeke. 17 Pate do nikana꞉ma꞉ aloma꞉ tupa꞉ sekemesaisi hau na pimika꞉na꞉ta꞉ kota꞉ mo wandiki pao mea mina꞉pa꞉lao polumeke lemekeme.

18 Dupiki pima꞉ta꞉ Hamo pita꞉ eiyeke Sekeme yaapoma꞉ta꞉ a꞉pa꞉la꞉me hone wipikime. 19 Koto ekina꞉ mo pa꞉pa꞉na꞉ wekima꞉ta꞉ Dieikopena꞉ waneke pukima꞉ homeekeeki yalo mo pia꞉peke lemeke ekita꞉ nateleke ma꞉nda꞉ na paeyaeyekeme. Ipikita꞉ mo ipika꞉ tapake tukiki pa꞉ta꞉ta꞉ you some hayekeme.

20 Kota꞉ Hamo pita꞉ ipika꞉ eiyeke Sekeme yaapota꞉ mo ika꞉ pi hotu haemeke alena꞉ mo daoni pota꞉ kake pa꞉ta꞉ pua mo ipilika꞉ daoni haliweki pa꞉ta꞉ dupiki pimanu lepekeme. 21 Do haliwekita꞉ homu pelememe. Do niki haloma꞉ kenke pa꞉ta꞉ niki ame̱le̱ hata꞉ pa pomina꞉ lomana꞉e. Do nika꞉ kenketa꞉ iki make ana꞉na꞉ halimikie. Kutupa nikana꞉ma꞉ ika꞉ wandiki tonu hapua meata꞉ ikana꞉ma꞉ nika꞉ wandiki tonu make hapua mea꞉tiki pina꞉e. 22 Kutu pulu poloma꞉pate do haliwekima꞉ta꞉ niki ame̱le̱ hata꞉ homeke wanda꞉hali hamana꞉e alemepate ekia꞉nda꞉ homeketa꞉ iki peleme tupa꞉ nika꞉ haliweki paeyao make sekemesaisi hau puma꞉ka꞉na꞉ homeke a꞉pa꞉la꞉me alememe. 23 Kutu puma꞉ka꞉na꞉ta꞉ kota꞉ ika꞉ ma꞉na꞉manu paeyao make ika꞉ wia haleme alemanu paeyao make nika꞉eki dia꞉ya꞉liepe. Koto ekina꞉ niki ame̱le̱ haena꞉ lomana꞉e lepekeme. 24 Kutupa mo daoni pa꞉ta꞉ haemeke haliwekima꞉ta꞉ Hamo pita꞉ Sekeme yaapoma꞉ lepeke ekita꞉ a꞉pa꞉la꞉me laa iki paeyao siki sekemesaisi hau pimikime.

25 Hoto tepo hao mo haliweki koto sekemesaisi hau pimiki ekima꞉ tanda pa pitolo haena꞉ta꞉ Dieikopena꞉ eiyeke yaapo mo Daenana꞉ beliki Simiono pita꞉ Lipai yaapoma꞉ ipilika꞉ bainasi yaapo mina oni daoni pa꞉ta꞉ pepekeme. Mo weki yaapoma꞉ta꞉ mo wanda꞉halima꞉ ata꞉ka꞉ piki hone ma꞉nda꞉ wiaama꞉na꞉ yeke pa ota꞉ hone wia peke nono pea pua mo haliweki paeyao lia 26 make mo Hamo pita꞉ Sekeme yaapo make lipikime. Kutupa Daena mo Sekemena꞉ da pa꞉ta꞉ pitieke alena꞉ pao hatuku pepekeme. 27 Mo haliweki lu paeyaepeke hoki naneta꞉ Dieikopena꞉ eiyeke titi mandane weki tonuma꞉ta꞉ ika꞉ ana꞉na꞉ yala꞉ mieke ekina꞉ hombo peaaso hata꞉ mo daoni teke puleke laemekeme. 28 Ikana꞉ma꞉ta꞉ mo ma꞉na꞉manu make kaomanu make donkimanu make oni daoni pa꞉ta꞉ wieke alemanu paeyao make oni hama꞉ nina꞉ hayeke alemanu paeyao mea pemekeme. 29 Ikana꞉ma꞉ta꞉ mo yenki tieke peke alemanu paeyao mea wanda꞉weki make mina kota꞉ ika꞉ da pa꞉ta꞉manu wieke alemanu paeyaosiki make mea pemekeme.

30 Dieikopema꞉ Simiono pita꞉ Lipai yaapo pa꞉ta꞉ alota꞉ Ipilikana꞉ma꞉ta꞉ I̱ pa꞉ta꞉ ka꞉nda꞉ mea kelepeme. Ameta꞉ mo Keinani wanda꞉halima꞉ make Petese wanda꞉halima꞉ make do kenke pa꞉ta꞉ haleme wanda꞉hali paeyao sikima꞉ta꞉ I̱ pa꞉ta꞉ honditi pilimikie. Koto wanda꞉hali paeyaoma꞉ apa꞉tao I̱ ame̱le̱ a꞉nda꞉ puluekema꞉ pimika꞉na꞉ta꞉ kota꞉ I̱ta꞉ hali wopu dia꞉yalo hata꞉ do yaka tapake paeyaota꞉ hoeyaalimikie. 31 Pate mo hama̱la̱꞉ma꞉ hombo peaaso alota꞉ Dikana꞉ma꞉ta꞉ dika꞉ ana꞉ta꞉ pa koto hali yola꞉la꞉ wanda꞉ tupa꞉ haena꞉ lena꞉ lapeke na ya꞉la꞉me lepekeme.

<- KINI PIEKE 33KINI PIEKE 35 ->