1 Kini haliweki tonkoputa꞉ mo Ba꞉bilonina꞉ kini A꞉motapele make A꞉lasana꞉ kini A꞉tioko make Ila꞉mena꞉ kini Siedolaoma make Koimina꞉ kini Taedolo make mo 2 mandane yunki hata꞉ kinita꞉ mo Sodomona꞉ kini Bita make mo Komotona꞉ kini Biesa make mo A꞉demana꞉ kini Sina꞉be make mo Seboimina꞉ kini Semebe make mo Bela biki ma꞉nda꞉ Soana꞉ kini ame̱le̱ a꞉nda꞉ pulu pemekeme. 3 Do yunki hata꞉ kini manuma꞉ta꞉ mo Sidimi hawetena꞉ ameta꞉ mo ikali leke ma꞉nda꞉ biki Homa꞉la꞉ dawala leleme alena꞉ ika꞉ ami haliweki momba꞉laemekeme. 4 Ikita꞉ 12 bapina꞉ta꞉ hande kini Siedolaoma oto pa꞉ta꞉ haemekepate pa mo bapi 13 pa꞉ta꞉ta꞉ ipiki oto pa꞉ta꞉ na halumeke lemekeme.

5 Kutupa mo bapi 14 pa꞉ta꞉ta꞉ Siedolaoma ipika꞉ tamba꞉ mina꞉la꞉ kinimanu tonka꞉na꞉ ika꞉ ami haliweki ame̱le̱ mo A꞉sa꞉detodi Kanaimi kenke pa꞉ta꞉ haleme Tepa꞉imi wanda꞉hali make mo Ha꞉mi kenke pa꞉ta꞉ haleme Susimi tapake make mo homeke hau honda꞉ lupa peeke Kitia꞉tieimi kenke pa꞉ta꞉ haleme Emimi tapake make 6 mo Idomo pote pa꞉ta꞉manu haleme Ho tapake make ota꞉ lu yombitolo hata꞉ mo Elepa꞉tani kenkena꞉ mo hapu papeke ale honikina꞉ pua tolu naemekeme. 7 Kutupa paa mo Keidese kenke amba꞉ta꞉ Enemisipade leeke alena꞉ la꞉ka꞉la epemekeme. Ikana꞉ma꞉ta꞉ mo A꞉ma꞉leke wanda꞉hali bepolaota꞉ mo Hasasono Teima kenke pa꞉ta꞉ haemeke A꞉mo wanda꞉hali make bepolaemekeme.

8 Kutu pieke mo Sodomo make Komoto make A꞉dema make Seboimi make Bela make koto da kini manuma꞉ta꞉ a꞉nda꞉ puluekema꞉ ika꞉ ami haliwekimanu mo Sidimi hawetena꞉ momba꞉laota꞉ mo 9 Ila꞉me make Koimi make Ba꞉biloni make Elasa make koto tonkopu dana꞉ kinimanu ame̱le̱ mo yunki hata꞉ dana꞉ kini manuma꞉ a꞉nda꞉ pimikime. 10 Koto hawetena꞉ta꞉ kolodama꞉ wepiki naku manuma꞉ tumbieke ekiyalo mo Sodomo Komoto da yaapona꞉ kini yaapota꞉ mo a꞉nda꞉na꞉ pindipa polueke alo pepekepate koto naku pa꞉ta꞉ pua lopepekeme. Pate mo pa haemeke kini tepota꞉ mo pote pa꞉ta꞉manu pindipa pemekeme. 11 Kota꞉ mo kini tonkopuma꞉ta꞉ mo Sodomo Komoto daoni yaapo pa꞉ta꞉ wieke ale paeyao make nemanu tonka꞉na꞉ mea pemekeme. 12 Kutupa make Eipola꞉ma꞉na꞉ hamekena꞉ eiyeke Lodata꞉ koto Sodomo daoni pa꞉ta꞉ hayeke ekiyalo ipiki make ipika꞉ ala꞉ta꞉ ala꞉ta꞉ tonka꞉na꞉ mea hatuku pemekeme. 13 Pate hali homeke ma꞉nda꞉ta꞉ pindipa pua mo A꞉mo tapake hali Ma꞉motena꞉ timanu hayeke ale nanema꞉ hayeke Hibulu hali Eipola꞉ma꞉ pa꞉ta꞉ a꞉pa mo koto haumanu la haleekeme. Ma꞉mote make ipika꞉ kame yaapo Esikolo pita꞉ A꞉na꞉ maketa꞉ Eipola꞉ma꞉na꞉ tamba꞉ mina꞉la꞉ haliweki haemekeme.

14 Kutupa Eipola꞉ma꞉ ipika꞉ kamena꞉ eiyeke hatuku pemekeeki opu haota꞉ ipika꞉ a꞉nda꞉na꞉ moka꞉la hando haemeke 318 haliweki momba꞉lao mo hande kini tonkopu telia꞉ mea pua ota꞉ mo Da꞉ni kenke pa꞉ta꞉ tolu lopalo pemekeme. 15 Koto pateta꞉ ipika꞉ haliweki putupa꞉ putupa꞉ pea momba꞉lao haena꞉ loma loma peaata꞉ koto timba hata꞉ mo a꞉nda꞉ tunkuliki tapake lia bepolaemekeme. Ipikana꞉ma꞉ta꞉ mo haliwekita꞉ mo Damasikasina꞉ okane nanema꞉ tilao ota꞉ mo Hoba pua tolu lutia pemekeme. 16 Kutupa mo mea pemeke ala꞉ta꞉ ala꞉ta꞉ paeyao pa petolo mimikime. Kutupa make mo ipika꞉ kamena꞉ eiyeke Loda make ipika꞉ ala꞉ta꞉ ala꞉ta꞉ paeyao make wanda꞉weki make mo mandane dipula mea pemeke wanda꞉hali make paa hatuku epemekeme.

17 Eipola꞉ma꞉ta꞉ mo Siedolaoma make mo mandane kinimanu ame̱le̱ a꞉nda꞉ pea bepolao epeeketa꞉ mo Sodomona꞉ kinima꞉ta꞉ mo Sape hawetena꞉ biki ma꞉nda꞉ Kinina꞉ hawete la꞉la꞉ alena꞉ manda꞉hande pulu peekeme. 18 Kutupa mo Seilimina꞉ kini pita꞉ mo Manda Hala꞉ Koda꞉na꞉ yeni peao hala꞉ hali Melekisedekema꞉ta꞉ Eipola꞉ma꞉ pa꞉ta꞉ betedi make waini ikali make mea a꞉paeyekeme. 19 Kutupa epeaasa꞉ pi alo alota꞉ Mo kenke ya yaapo wa꞉pa꞉la꞉ Manda Hala꞉ Koda꞉ma꞉ Eipola꞉ma꞉ epeaena꞉e laata꞉ 20 Mo naka꞉ a꞉nda꞉ tunkuliki haliweki bepolaena꞉ lea꞉ Manda Hala꞉ Koda꞉na꞉ biki mina꞉liamana꞉e leekeme. Kutupa Eipola꞉ma꞉ma꞉ta꞉ mo mia꞉ ala꞉ta꞉ ala꞉ta꞉ paeyao telipa kiki yaapo yeketa꞉ homeke ma꞉nda꞉ta꞉ Melekisedeke pa꞉ta꞉ haleekeme.

21 Kutu pieke hoki nane mo hande Sodomo kinima꞉ Eipola꞉ma꞉ pa꞉ta꞉ alota꞉ Mo mi ala꞉ta꞉ ala꞉ta꞉ paeyaota꞉ wia halo pelepate yaka wanda꞉hali homeke kie leekeme.

22 Eipola꞉ma꞉ma꞉ hombo peaaso alota꞉ Do kenke ya yaapo wa꞉pa꞉la꞉ Tekehali oli Manda Hala꞉ Koda꞉na꞉ biki aloma꞉ 23 I̱ma꞉ta꞉ neke pepeleke ala꞉ta꞉ ma꞉nda꞉ siki make ota꞉ na wia halueke laata꞉ Ota꞉ mo kodoni pu kone o anke dake pu tunkuliki kone loa꞉me. Kota꞉ mo nakana꞉ma꞉ alota꞉ I̱ma꞉ Eipola꞉ma꞉ mea hamoko yawa꞉ma꞉ pi na loelena꞉ loa꞉me. 24 Koto ekina꞉ I̱ma꞉ta꞉ ala꞉ta꞉ ma꞉nda꞉ na mulu polopate mo yaka haliwekima꞉ amba꞉ nemeke alemanu homeke mulueke. Kutupa make do I̱ tamba꞉ ma꞉la꞉ hali tepo A꞉na꞉ make Esikolo make Ma꞉mote ika꞉ putupiliki homeke mina꞉e leekeme.

<- KINI PIEKE 13KINI PIEKE 15 ->