APOSOLO 23

1 Kutupa Poloma꞉ mo ka̱le̱sete haliweki wotu handake witolo hata꞉ alota꞉ Kametitio. Hokeeki na piki Koda꞉ pa꞉ta꞉ epeke tupa꞉ hatiki pea ame make hata꞉ pua꞉me leekeme. 2 Kutupa mo yeni peao haemeke you haliwekina꞉ you hali A꞉na꞉naisima꞉ Polo teke pa꞉ta꞉ haemeke haliwekima꞉ Polona꞉ kake da꞉ka꞉pa꞉ lina꞉e leekeme. 3 Kutupa Poloma꞉ ipiki pa꞉ta꞉ alota꞉ Koda꞉ma꞉ neke lieke. Neketa꞉ yayapiki hau pu hala꞉ halie leekeme. Mo hande Lo Pimanu mana꞉ leeke ekina꞉ pi yokaalu puluekema꞉ koto handeteke pilipateto hande Lo Pimanu na opiki nakana꞉ma꞉ I̱ pa lina꞉ leme leekeme.

4 Hande ipiki teke pa꞉ta꞉ haemeke haliwekima꞉ alota꞉ Koda꞉ ipika꞉ yeni peao haleme you haliwekina꞉ you hali pa꞉ta꞉ hoke pi pa lelipikipe lemekeme. 5 Kutupa Poloma꞉ alota꞉ Kametitio. Ipikita꞉ yeni peao haleme you haliwekina꞉ you halie hone na ua꞉me leekeme. Hande wape pea ula꞉eki doe. Naka꞉ wanda꞉halina꞉ you hali pa꞉ta꞉ hoke pi na lapeke la꞉la꞉me leekeme.

6 Kutu piekepate Poloma꞉ mo hande ka̱le̱sete haliweki handaata꞉ mo Sa꞉dusi Pa꞉tisi yaapo tapake haliweki a꞉pa pita꞉ pelememe hone wia iki pa꞉ta꞉ pi anekema꞉ alota꞉ Kametitio. I̱ta꞉ Pa꞉tisi hali hata꞉ Pa꞉tisi tapake weki mendia꞉me laata꞉ Do I̱ pa꞉ta꞉ pi yokaalu piteleme ekita꞉ hande I̱ polo tupa꞉ wanda꞉hali mea tiaalo pa꞉la꞉ ekina꞉ pitelememe laa leekeme. 7 Koto pita꞉ Poloma꞉ leeke handa mo Sa꞉dusi Pa꞉tisi yaapo tapake haliwekima꞉ ape ape laa ka꞉ta꞉ alu alu pea ta꞉ta꞉ ta꞉ta꞉ pea haemekeme. 8 Mo hande Sa꞉dusi tapake haliwekima꞉ lo haemeke ekimanu dupa Homemeke wanda꞉hali paa na mea tialieke laa mo enisolo tapaketa꞉ na hao hata꞉ pelememe laa make mo temokomanu make na pita꞉ pelememe laa lo haemekepate mo Pa꞉tisi tapake haliwekima꞉ koto pi paeyao opu haemekeme. 9 Kutupa ape ape alo hata꞉ mandane Pa꞉tisi tapake Wape pea wala꞉tiki pu haemeke haliwekima꞉ tiao alota꞉ Do halita꞉ eki a꞉nda꞉ ketete make na handa꞉ witoloma꞉me. Enisoloma꞉ o temokoma꞉ ipiki pa꞉ta꞉ la pia꞉pe niki mata꞉la꞉me lemekeme. 10 Kutupa mo hande ape ape daeyao lemeke handa mo a꞉nda꞉ tumiki halima꞉ mo haliwekima꞉ Polo mea pa lusinki paama꞉na꞉ ipika꞉ a꞉ndeli miniki haemeke haliwekima꞉ Polo pendilao mea mo ami haliwekina꞉ hala꞉ da pa꞉ta꞉ hatuku pena꞉yeke pi laa tapaeyekeme.

11 Kutupa nate ma꞉nda꞉na꞉ timba Tekehalima꞉ Polo teke pa꞉ta꞉ a꞉pa hata꞉ alota꞉ Honkopu hapeke. Do Diutuseleme da pa꞉ta꞉ yaka pi la halawaeye tupa꞉ mo Loma꞉ da pa꞉ta꞉ make pi la halawaalena꞉e leekeme.

Polo luekema꞉ a꞉nda꞉ lombemekeeki

12 Kutupa da kelepeeketa꞉ Diu haliwekima꞉ tome tome pamba nindi pea alota꞉ Ne ikali a̱i̱ na neke hata꞉ Polo amba꞉la lumana꞉e lemekeme. 13 Kutupa mo 45 tupa꞉ haliwekima꞉ nindi pea koto lemekeme. 14 Kutupa mo yeni peao haemeke teke haliweki pa꞉ta꞉ make mo tondiki haliweki pa꞉ta꞉ make pua alota꞉ Nika꞉ kone ota꞉ nindi tieke pea Ne ikali a̱i̱ na neke hata꞉ Polo amba꞉la lumana꞉e loma꞉me lemekeme. 15 Koto ekina꞉ ikana꞉ma꞉ mo ka̱le̱sete haliweki ame̱le̱ hata꞉ mo a꞉nda꞉ tumiki hali pa꞉ta꞉ pi tapaapa꞉peke dupa. Hande Polota꞉ ipika꞉ pi yokaalu ota꞉ tikitikina꞉ pumana꞉yeke hatuku a꞉pa꞉peke laa tapaapa꞉peke lemekeme. Kutupa Polota꞉ a̱i̱ na opolo pa ipulu haena꞉ kone amba꞉ lulumeke lemekeme.

16 Polo ipika꞉ belikina꞉ eiyekema꞉ hande haliwekima꞉ yuwia pituluekema꞉ lemekeeki opua puata꞉ mo ami haliwekina꞉ hala꞉ da tukiki pa꞉ta꞉ honda꞉ pamba Polo pa꞉ta꞉ pua la haleekeme. 17 Kutupa Poloma꞉ opisa hali homeke epena꞉ wi la꞉ mea alota꞉ Do wekihalita꞉ mo a꞉nda꞉ tumiki hali pa꞉ta꞉ la halena꞉yeke hatuku pua꞉peke leekeme. 18 Koto ekina꞉ hatuku mea pua mo a꞉nda꞉ tumiki hali pa꞉ta꞉ alota꞉ Hande dipula pila꞉ hali Poloma꞉ I̱ wi la alota꞉ Do wekihalima꞉ mo a꞉nda꞉ tumiki hali pa꞉ta꞉ pua la halena꞉yeke hatuku pua꞉peke lea꞉me leekeme. 19 Mo a꞉nda꞉ tumiki halima꞉ hande wekihalina꞉ kiki mina hosiki mo pate leke hatuku pua tome tome la lota꞉ pea alota꞉ Eki pi la kuluekema꞉ lepe leekeme. 20 Kutupa ipikana꞉ma꞉ alota꞉ Mo Diu haliwekima꞉ tome tome pamba mo Polona꞉ pi yokaalu tikitikina꞉ puluekema꞉ belia neke pa꞉ta꞉ laa mo ka̱le̱sete haliweki pa꞉ta꞉ hatuku epoelena꞉ honke lelimikie lememe leekeme. 21 Koto lelemepate nakana꞉ma꞉ na opua꞉peke. Pa ekipeke mo 45 tupa꞉ haleme haliwekima꞉ nindi pea ne ikali a̱i̱ na neke koto Polota꞉ titina꞉ amba꞉la lumeke laa pota꞉na꞉ yuwia pita꞉ tikitiki yao naka꞉ lolo peleeki opuluekema꞉ handeteke pita꞉ pelememe laa leekeme. 22 Koto ekina꞉ mo a꞉nda꞉ tumiki halima꞉ hande wekihali Pu la alota꞉ Nakana꞉ma꞉ ma꞉nda꞉ pa꞉ta꞉ pua I̱ma꞉ la hala pua꞉me pi na lapeke leekeme.

Polota꞉ mo kapomani teke hali Pilikisi pa꞉ta꞉ tapaeyekeeki

23 Koto laaka꞉na꞉ a꞉nda꞉ tumiki halima꞉ opisa hali yaapo epena꞉ wi la꞉ mea alota꞉ Ame timba 9 okoloko tupa꞉ mo ami haliweki 200 make hosi ma꞉na꞉ hokina꞉ pitu haleme ami haliweki 70 make dolo miniki haliweki 200 make Sesatia da nane pena꞉yeke ipilikana꞉ma꞉ tikitiki yao haena꞉ lapa꞉peke. 24 Kutupa Polo pitulu pa꞉la꞉ ma꞉na꞉manu mea haena꞉ laata꞉ mo kapomani you hali Pilikisi pa꞉ta꞉ yopu handeteke hatia hatuku pua꞉peke leekeme. 25 Koto laata꞉ mo ami you halima꞉ tameiya꞉ homeke dupa wape piekeme.

26 Kolodiusi Laisiasima꞉ nika꞉ kapomani you hali Pilikisi neke pa꞉ta꞉ keiyae alome. 27 Do halita꞉ Diu haliwekima꞉ da꞉ka꞉pa꞉ mina hata꞉ ota꞉ luekema꞉ taapolo haena꞉ yaka ami haliweki ame̱le̱ I̱ma꞉ opolo pua peteloa꞉me. Ipikita꞉ Loma꞉ pamodi mea wia hala꞉ hali yeke handa pua꞉me.

28 Ika꞉ ba꞉sa꞉ pimi pi teke weiluekema꞉ ika꞉ ka̱le̱sete haliweki pa꞉ta꞉ hatuku poa꞉pate 29 mo ba꞉sa꞉ pimi pita꞉ pa ika꞉ Lo Pi manuna꞉ pimime. Koto ekina꞉ ipikita꞉ dipula mea pitapeke o homena꞉ lapeke ekita꞉ ana꞉ na pa꞉la꞉me handa꞉ ua꞉me. 30 Kutupa haliwekima꞉ Polo luekema꞉ tome tome pambemekeeki ma꞉nda꞉ma꞉ I̱ pa꞉ta꞉ la kieke handaa neke pa꞉ta꞉ koto kone tapaasome. Kutupa ipiki pa꞉ta꞉ ba꞉sa꞉ piteleme haliwekima꞉ neke pa꞉ta꞉ hata꞉ ba꞉sa꞉ pina꞉ loa꞉me loa꞉me laa wape piekeme.

31 Koto ekina꞉ mo ami haliwekima꞉ koto ika꞉ you halina꞉ mana꞉ pi opuata꞉ Polo meaata꞉ timba kone mo A꞉ndipatisi da pa꞉ta꞉ hatuku pemekeme. 32 Kutupa da kelepeeketa꞉ mo hosi ma꞉na꞉ hokina꞉ pitu haemeke haliwekima꞉ Polo hatuku mea tapaalo mo ami haliwekita꞉ ika꞉ hala꞉ da pa꞉ta꞉ paa la꞉ka꞉la epemekeme. 33 Kutupa Sesatia da nane opolo puata꞉ mo kapomani you hali pa꞉ta꞉ mo pase halaaka꞉na꞉ Polo make hatuku pua haena꞉ lemekeme. 34 Kutupa mo kapomani you halima꞉ hande pase yata꞉paka꞉na꞉ Polo pa꞉ta꞉ lota꞉ pea alota꞉ Neketa꞉ hando potopinisi halipe leekeme. Kutupa Polota꞉ Silisia nane halie leekeeki opua 35 ipikana꞉ma꞉ alota꞉ Neke pa꞉ta꞉ ba꞉sa꞉ pimiki haliweki opolo epemeka꞉na꞉ta꞉ kota꞉ naka꞉ pi opulueke leekeme. Kutupa mo Hetodina꞉ da tieke pa꞉ta꞉ mea pita kade haliwekima꞉ handeteke haena꞉yeke leekeme.

<- APOSOLO 22 APOSOLO 24 ->