1 I̱ta꞉ you halima꞉ mo yaka pukima꞉ homolo yankeke Kaiasi pa꞉ta꞉ do tameiya꞉ tapaasome.
2 Yaka yankekeo. I̱ma꞉ neke yeni peaaso ekita꞉ mo naka꞉ pitele haumanu paeyao epeke tupa꞉ puelena꞉ make naka꞉ loke pa꞉ta꞉ yeni ma꞉nda꞉ na hake honkopu hao halena꞉ loa꞉me. Hande naka꞉ temoko epeke tupa꞉ hala꞉ ekita꞉ I̱ma꞉ amba꞉ hone witolo loa꞉me. 3 Mo mandane Ketiso kamemanu opolo a꞉pa nakana꞉ma꞉ mo ota꞉eki pa꞉ta꞉ ki hone na wiki pa putia pulieki a꞉pa lemeke handaa I̱ta꞉ ta꞉na꞉ tiekema꞉ homoa꞉me. 4 Naka꞉ hoto paeyao mo hande ota꞉eki pa꞉ta꞉ hao hale tupa꞉ loa꞉me. Yaka weki wandikita꞉ mo ota꞉eki pa꞉ta꞉ halemeeki opitoloeki homekema꞉ I̱ta꞉ ta꞉na꞉ wopu peaasa꞉me.
Kaiasi yeiya꞉ laasa꞉eki
5 Yaka yankekeo. Nakana꞉ma꞉ta꞉ mo naka꞉ Ketiso tapake pa꞉ta꞉ kima꞉ na homeke tamba꞉ mu hale tupa꞉ kone mo neke na handeke Ketiso tapake pa꞉ta꞉ make homeke tupa꞉ kone tamba꞉ mu haleme. 6 Koto wanda꞉halima꞉ta꞉ do haleme siosi tapake pa꞉ta꞉ naka꞉ pukima꞉ homeleeki a꞉pa la halememe. Koto wanda꞉hali ika꞉ pota꞉ pulimi ale pa꞉ta꞉ Koda꞉ ta꞉na꞉ma꞉ homaalo peleme tamba꞉ mea꞉peke laa honke alome. 7 Pa ekipeke ikana꞉ma꞉ta꞉ mo hone na tulaaleme wanda꞉halina꞉ tamba꞉ mina꞉la꞉ ekita꞉ kiaaso hata꞉ Ketisona꞉ e pokaaluekema꞉ ika꞉ kone kini pimime. 8 Koto ekina꞉ta꞉ niki Ketiso wanda꞉halima꞉ta꞉ dupiki wanda꞉hali tamba꞉ mumana꞉e. Pa ekipeke ika꞉ mo ota꞉ ekina꞉ e pokelemeeki telipumana꞉ loa꞉me.
Daeoda꞉ta꞉pisi pita꞉ Dimiditiasi yaapo
9 I̱ma꞉ta꞉ mo siosi wanda꞉hali pa꞉ta꞉ doka꞉tiki tameiya꞉ siki tapaowa꞉pate mo siosina꞉ handeteke hala꞉ hali haluekee hone wieke hali Daeoda꞉ta꞉pisima꞉ta꞉ I̱ma꞉ alo pi ma꞉nda꞉ ota꞉ na opu hala꞉me. 10 I̱ epoa꞉ka꞉na꞉ta꞉ kota꞉ I̱ma꞉ta꞉ ipika꞉ pa꞉la꞉ haumanu paeyao lo kelalueke. Ipikana꞉ma꞉ niki pa꞉ta꞉ keke pi la꞉la꞉ ekimanu make mo ipika꞉ yayapiki pimanu lo hala꞉eki paeyao tonka꞉na꞉ loa꞉me. Do hande haumanu homeke ana꞉e hone na u hala꞉pate ipikana꞉ma꞉ta꞉ mo kimisu ipilimi Ketiso kamemanu epemeka꞉na꞉ta꞉ na handa꞉ milieke. Kutupa handa꞉ muluekema꞉ taapo haleme wanda꞉hali make sa꞉sa꞉ pea mo yeni da mina꞉pa꞉lao hama pena꞉ lena꞉ loluekema꞉ taapo hala꞉me.
11 Yaka yankekeo. Mo hokeeki na moka꞉la handeketa꞉ mo epekeeki homeke moka꞉la handa꞉peke. Ma꞉nda꞉ epima꞉ epekeeki pia꞉ka꞉na꞉ta꞉ ipikita꞉ Koda꞉na꞉ ekie. Ma꞉nda꞉ epima꞉ hokeeki pia꞉ka꞉na꞉ta꞉ ipikita꞉ Koda꞉ na handeke some hala꞉me.
12 Paeyaoma꞉ta꞉ Dimiditiasita꞉ a꞉pa꞉la꞉me lo halememe. Ipikita꞉ Koda꞉na꞉ ota꞉ pima꞉ kone a꞉pa꞉la꞉me lo hala꞉me. Kutupa nikana꞉ma꞉ make homeke pi kone lo haloma꞉me. Kutupa nakana꞉ma꞉ta꞉ nikana꞉ma꞉ aloma꞉ ekita꞉ ota꞉ ekie hone wilime.
Paeyaaso pimanu
13 I̱ma꞉ta꞉ neke pa꞉ta꞉ la kia꞉peke pita꞉ wopu ula꞉pate mo wape laasa꞉ tanuma꞉ laapeketa꞉ I̱ ki pa꞉la꞉me. 14 Yaka honema꞉ta꞉ neke koto kone handolo ipulu hata꞉ pimanu lopana꞉e.
15 Puki lopa꞉niaasa꞉eki neke pa꞉ta꞉ wina꞉e. Naka꞉ yankeke tonu paeyaoma꞉ a꞉taloe lo tapaasememe. Nika꞉ yankeke tonu pa꞉ta꞉ a꞉talo lawaapekee.
