Dionima꞉ yaapo peao tapaeyeke wapee

1 I̱ta꞉ you halima꞉ mo hande yaka pukima꞉ homolo ankula꞉ ankula꞉ pa꞉ta꞉ do tameiya꞉ tapaasome. I̱ma꞉ homeke dia꞉ya꞉la꞉pate mo hande ota꞉eki hone ula꞉ wanda꞉halima꞉ make iki pukima꞉ homelememe. 2 Pa ekipeke mo hande ota꞉ ekita꞉ niki pa꞉ta꞉ u pelia hala꞉ ekina꞉ wetepe nina꞉ make niki ame̱le̱ pa u halieke.

3 Nika꞉ Apa꞉ Koda꞉ make mo Apa꞉na꞉ Eiyeke Yesu Ketiso ipiliki telipuna꞉ma꞉ a꞉ta꞉ma꞉ homolo tamba꞉ mina꞉la꞉eki make pa hameke a꞉ta꞉ma꞉ homa꞉la꞉eki make puki lopa꞉niaasa꞉eki make niki pa꞉ta꞉ ota꞉eki pita꞉ pukima꞉ homa꞉la꞉eki yaapo pa꞉ta꞉ yama꞉ kina꞉e.

Ota꞉eki pita꞉ pukima꞉ homa꞉la꞉eki

4 Naka꞉ mandane weki wandikita꞉ mo hande Apa꞉ma꞉ niki pa꞉ta꞉ ota꞉ pia꞉pa꞉peke la꞉la꞉ tupa꞉ ota꞉eki pa꞉ta꞉ halemeeki handa꞉ u hao I̱ta꞉ ta꞉na꞉ tiekema꞉ homoa꞉me. 5 Koto ekina꞉ mo wanda꞉o niki paeyaoma꞉ pukima꞉ homa꞉ alu alu pumana꞉e laa alome. Do wape laaso hata꞉ neke pa꞉ta꞉ alo pita꞉ panake pi ula꞉eki dia꞉ya꞉la꞉pate hande amba꞉ titina꞉ kini pitolo hata꞉ wia haloma꞉ pi ula꞉eki konee. 6 Do I̱ma꞉ alo pukima꞉ homa꞉la꞉ ekina꞉ teketa꞉ nikana꞉ma꞉ ota꞉ Koda꞉na꞉ pi ula꞉eki oto pa꞉ta꞉ ota꞉ hamana꞉e laa loa꞉me. Mo hande titina꞉ pi ula꞉eki opeleme ekita꞉ ikana꞉ma꞉ mo pukima꞉ homa꞉la꞉eki pa꞉ta꞉ ota꞉ hapa꞉peke la꞉la꞉eki opelememe.

7 Mo Yesu Ketisota꞉ ota꞉ kenke hali epeekeme laa hone na wilimi makeaaso hali wopu do kenke honiki honiki pominelememe. Kutupiki some a꞉nda꞉ta꞉ makeaaso hali make Ketisona꞉ a꞉nda꞉ tunkuliki halie. 8 Koto ekina꞉ leke leke lo hapa꞉peke. Pa ekipeke mo hande mulueke laa e pokeleme ekita꞉ ma꞉nda꞉ na alupaake pa ana꞉na꞉ kone miomena꞉ yeke loa꞉me.

9 Ma꞉nda꞉ epima꞉ Ketisoma꞉ waleekeeki pa꞉ta꞉ na hake pa ankulao mo pate leke pea꞉ka꞉na꞉ta꞉ kota꞉ Koda꞉ta꞉ koto some yaapo na hala꞉me. Pate epima꞉ mo wala꞉la꞉eki pa꞉ta꞉ haya꞉ka꞉na꞉ta꞉ kota꞉ Koda꞉ A꞉taala꞉ta꞉ koto some pa꞉ta꞉ halepeme. 10 Koto ekina꞉ta꞉ ma꞉nda꞉ epima꞉ dupiki wala꞉la꞉eki na mea epea꞉ka꞉na꞉ta꞉ koto someta꞉ ika꞉ da pa꞉ta꞉manu na handa꞉ mea꞉pa꞉peke. Kutupa ipiki pa꞉ta꞉ta꞉ Puki lopa꞉niaasa꞉eki neke pa꞉ta꞉ wina꞉e pi na lapa꞉peke. 11 Pa ekipeke ma꞉nda꞉ epima꞉ koto some pa꞉ta꞉ Puki lopa꞉niaasa꞉eki neke pa꞉ta꞉ wina꞉e lea꞉ka꞉na꞉ta꞉ kota꞉ koto some ipikita꞉ mo halima꞉ pu hala꞉ hoke hau manuna꞉ yankeke hala꞉me.

Paeyaaso pimanu

12 I̱ma꞉ta꞉ iki pa꞉ta꞉ la kia꞉peke pita꞉ wopu ula꞉pate mo wape laapeke tameiya꞉ pita꞉ wape laasa꞉ tanu yaapota꞉ paaso hata꞉ yaka honema꞉ta꞉ I̱ a꞉pa iki ame̱le̱ pita꞉ pimanu lomana꞉e. Pa ekipeke niki paeyao ta꞉na꞉ tieke pulu pa꞉la꞉ tupa꞉ loa꞉me.

13 Kutupa naka꞉ asina꞉ weki wandikima꞉ta꞉ ika꞉ a꞉talo pimanu tapaasememe.