TESALONICENSES

1 Pablo rei se. Silas riqui serese a. Timoteo abe no. Ureɨco ã mbesa jẽje a, Tesalónica jenda. Jẽ nguia jeñumunua mbeɨte nguiã Jesús je ũquɨ̃. Jesucristo ɨcuasa chõ jẽɨngo nguiã ũquɨ̃. Dios rei nanderu. Jesucristo rei nandererecua. 2 Sã ũquɨ̃ turã ndiqui jẽje. Sã ũquɨ̃ ndiqui jemombia beɨ.

3 Gracias, ure beɨte quia Dios je jenɨɨ ã. Coche ureɨco nguiã ñee Dios je jenɨɨ. Jẽ nguia jẽɨngo nguiã Dios ɨcua tuchɨte ũquɨ̃. Jẽ nguia jẽɨngo nguiã nyesecua tuchɨte jenyɨese ũquɨ̃. 4 Nyebe ureɨco nguiã ñee turãt e jenɨɨ ã. Ae ñumunua nua nguia Dios je, ũquɨ̃ ja urembiirandu turã nguia jendese ã. Jẽɨngo minguete quia mbia ɨcuã je ũquɨ̃. Jẽɨngo Dios ɨcua tuchɨte ũquɨ̃. Mbia ɨcuãte riqui raque jẽje. Mbia ɨcuã mose jẽje, jẽ jẽturãte riqui ee ũquɨ̃.

5 Sã Dios turã tuchɨ riqui no jẽ. Sã mbia mbuchecha turã no. Ae ra ñɨmbirãcuãte quia mbia ɨcuã ɨcuã mose Jesús rɨɨ̃ ee nae, ũquɨ̃ je ra mbae turã mondo. Mbae ra emondo mbia chɨsaã turã ndɨbɨshorõ. Mbia chɨsaã ɨcuã abe rɨbɨshorõ no. 6 Ae jembasi mbasi quia nae, Dios ra ũquɨ̃ mbasi tuchɨ cote. 7 Jesucristo ra tu ibate sɨ. Ɨ ra eu quia nyecua. Angel cuabẽ ndese ra eru. Jesús ra ángel quirãcuã tuchɨ queru. Tata rendi rã nda Jesús ru. Eru mose ra mbia ɨcuã ɨcuã eã nande je cote. 8 Jesús tu mose ra Dios ɨcuasa reã mbasi mbasi cote. Echeẽ turã mumba mumbasa ra embasi Dios cheẽ turã Jesucristo rɨɨ̃. 9 Jesús ra ucheẽ mumba mumbasa mbasi tuchɨ. Jesús ra emombo ɨsho. Echeẽ mumba mumbasa ra siquíã mbeɨ Dios rese cote. Dios quirãcuã ndese abe ra eriquíã no. 10 Ũquɨ̃ nda Jesús saã ucheẽ mumba mumbasa je tu mose. Echiirabo quia ra ñee turã turã mbeɨ erɨɨ̃ eru mose. Eɨcuasa ra ñee turã turã mbeɨ erɨɨ̃ eru mose. Jẽ abe ra jẽɨngo erese. Ure Dios cheẽ nenei mose, jẽisi que ra. Nyebe ra jẽ abe jẽɨngo erese eru mose. 11 Nyebe ureɨco nguiã ñee ñee mbeɨ Dios je jenɨɨ ã. Ae Dios bite nae, ɨ̃ nda ũquɨ̃ jẽsaã saã mbeɨ quia. Ũquɨ̃ je que Dios “jenyu” ɨ jẽje ra. Mbae turã jẽsaã saãse rete quia ũquɨ̃. Sã Dios uquirãcuã mee jẽje. Mbae turã naa naa nonde cote. Jesús ɨcuasa chõ jengu nguiã huee. 12 Jẽ mbae turã naa naa mose, mbia ra ñee turã turã Jesucristo rɨɨ̃. Jẽ abe rɨɨ̃ nda Jesucristo mbia mbucheẽ turã turã. Dios quia eturãte riqui nguiã nande je. Jesucristo abe eturãte nande je. Ae rei nandererecua.

1 TESALONICENSES 2 ->