Iob
Waeuwa uawa
Giruma ema ipa apana euda poka saiwa uaraia donsadia dudunawa wade. Iob poka saiwa ema insamode ita me sosowa do poka saiwa sa inseia sabamosade. Me sosowa inseiase, me dauwa God mampe dewa da dewasankadisano baiwa matangelasan. Tane Iob atenlena sa ipa mai ulaipa. Me God sumanaiwaleidia apanawa, tane me menasadia atenlepi dima baiwa poka ema me mampe wisen. Giruma ema bedewe God Iob mampe poka ema wisena ipawa mai diapona, tane me mukawa ita atemba debamaia apana mai atentopua rua waeuwasapio atenlepi. Ita Iob God mukawa ita atemba waeuwasano atenlene me waitarawa ene God wadaposisan. Giruma ema ompa osowe God Iob kerowa bedewe inasane obampa uaraia wanen ita dewasano osowe maura apanawa segalen. Ita do me Iob sosowa wadabuamon ipawa Iob poka donsana ipawaida mo mai atendewantopona, dia.

Iob obampa ita dima uduudu me mampea umanawa wade

1 Apana ebowa Iob tawo Us bedewe wandie. Me ipa apana dodomana dewa euda os dewalala. Me God sawaleidie atoweleidie mai kadi da dewasapona, dia. 2 Me obampa mona 7 ita anoanopa natadea gamomon. 3 Ita me sipsipwa uduudu 7,000, kamelwa 3,000, kauwa 1,000 ita donkiwa iwoa 500. Ita do me nolawa apanawa uaraia. Tane me ipa maura apanawa mai apana isiwa bola sa omo wisedia deneuwe waimoia ruau.

4 Iob obampa muba duwoduwo oda dewasaie ita mo deadea walamau wisedio oda dewasaie weaweanapu natadea nisomoio wimoio do nana nai. 5 Tane oda dialeidio Iob dewawa rua dewasadie ita obampa gagalou wadiaubedio mampe wimoio ita mo deadea dewamodio euntoi God emawe. Ipawa me insediase, “Ne obaina kadiwa dewasaiena ba nuau bedewe God wakadisa waiena.” Sa baiwa me tadinaida enedie pue sumodie puloleide God mampe me obampa euntompa baiwa God emawe.

Iob sumanaiwa wadaetawa wiseide

6 ✡Walama dea Iawe God danawe me enseliwa auweiena ita Seitan* do sape wisen. 7 Iawe God Seitan diene wanase, “E naepe os lamoie tauma wien?”

Tane Seitan leusane wanase, “Ne tawo uduudu osowe di leidine.”

8 Tane Iawe God Seitan diene wanase, “E ne nolana dewalala Iob ewaana ba, dia? Me ipa apana eudida mai mida da me rua tawo osowe wainipona, dia. Me dewa dodomana os dewamodie ita ne wiwiranaleide tane mai kadiwa da dewasapona.”

9 ✡Gagalo 12.10Tane Seitan Iawe God mampe wane wanase, “E onieiadewaitiana baiwa me wiwiraaleide. 10 E walama uduudu me ita obampa ita do puraiwawa oniadewasamoiana. Dima me dewasadia e dewamoiano euda os segaleide. Sa baiwa tauma me mampe kau ita sipsip uaranton 11 tane naita e me nituwa uduudu otaubaitaa me e nanawo wakadisaa wapi.”

12 Tane Iawe God wanase, “Oa, me nituwa uduudu e witaawosadina tane mai me kadisaa, dia.” Mape Seitan Iawe God ene alen.

Iob poka etena gagalowa

13 Walama dea Iob obampa mona ita iwoa otopa tautuwa duwa bedewe oda dewasaie. 14 Ita walama sa dea bedewe benema apanawa Iob duwe wisene diene wanase, “E kaua dogo nobantoie laie ita donkia tampo ina naie laie 15 ita poiwaa bola Sabe apanawa wimone pue uduudu poisamoiena ita nola apanawa uduudu bomoiena. Ne dea os eneieno weuwane e dieepa baiwa winen.”

16 Tane apana sa gagaloleidio benema apanawa da wisene wanase, “God kelama uboe wanaubeno iene e sipsipa ita mo onioniau apanawa do imontuan. Ne dea os eneieno weuwane e dieepa baiwa winen.”

17 Tane apana sa gagaloleidio benema apanawa natadeawa wisene wanase, “Poiwaa ua natadea Babilon tawowa bedewe wanwanla wimone e kamela uduudu poisamoiena ita e nolaa dewalala bomoiena. Ne dea os eneieno weuwane e dieepaa baiwa winen.”

18 Ita apana sa gagaloleidio benema apanawa da wisene wanase, “E obana mona ita iwoa otoa tautuwa duwa bedewe odantoie. 19 Tauwadea os lanunu debamaia sala makowa bedewe wisene du sainapa epamono du bioudene nosene obana uduudu bomontuwan. Ne dea os eneieno weuwane e dieepa baiwa winen.”

20 Ita Iob enene nuaparewa eueuwa garawa siolen ita uwa korelen. Ita me dunelene namba dogo osowe itune God wadaposisan. 21 Ita me wanase,

“Ne muntedine mai dima da wadape noneapona

ita bontepine mai nitu da wadape do anteapa, dia.

Nitu sa uduudu Iawe God ne nen ita mainawo mebaa leusane oten.

Ne Iawe God ebowa wadaposisadina.”

22 Poka saiwa ema uduudu Iob mampe seganton tane me mai God wawusape baiwa waponase, “God ne mainawo kadi dewasan.”

Iob 2 ->