1 Tauma Iawe God Noa diene wanase, “Ne emanawo apana uduudu walama ema bedewe muntone tawo ema osowe waimoia bedeuwo e dea os dodomana wainiana, sa baiwa e ita manainaa, obana ita manamanainapu do waa bedewe odana. 2 Tane pue eubu mona 7 ita iwoa 7 otamoe aimoa. Tane pue isiu da mai eubu mona dea ita iwoa dea otamoe aimoa. 3 Do nene daitada mona 7 ita iwoa 7 aimoa. Ipawa pue daitada ita nene iono lalala inawaa tawo osowe waimompa. 4 Walama 7 dialepio ne unu tawo ema osowe wapaaubepo wampo walama 40 ita tadina 40 dialepi. Ita nitu uduudu inawaa tawo osowe dewamona kadimopatuapi.”

5 Ita Noa dewa uduudu Iawe God badowa diena rua dewasan.

6 Noa gulauidalene enawa 600 wadedio abaia debama tawo osowe segalen. 7 Sape Noa ita me manainapa ita obampa manamanainapu do abaia saiepue inantopua baiwa waa bedewe odeiena.✡Matiu 24.38,39; Luk 17.27 8-9 Tane pue eubu ita kadiu, nene ita pue uduudu dogo osowe tetelala mona ita iwoa natanata Noa mampe wimone waa bedewe odeiena God wana rua. 10 Ita walama 7 dialeno aupe abaia segalene tawo osowe wisen.

11 Noa enawa 600 wadeno uaboa natawa walama 17 bedewe esa tawo bedewe segalene odene wisen. Tane do uboo unu duwa moawa wadaaubalen. 12 Ita unu wadio walama 40 ita tadina 40 dialen.

13 Tane walama sa deawaa bedewe Noa ita me manainapa ita me obampa Sem, Am, Iapet ita mo manamanainapu do awodea waa bedewe odeiena. 14-15 Ita do pue duwa wanwanlala ita dobinoa ewaewau daitada, do nitu uduudu dogo osowe tetelala, nene ewaewau daitada, do nitu uduudu debamau ita kerakera inawaau, isiwa mabupu dola uduudu Noa mampe wimone waa bedewe odeiena. 16 Pue daitada mona ita iwoa tane nitu uduudu inawaa wanwanlala waa bedewe odeiena God wana rua. Ema aupe Iawe God waa moawa gudulen Noa diena rua.

17 Tane abaia ideita tawo osowe weuwadio walama 40 waden ita esa susugalene waa tawo oso enedia awanenposiden. 18 Tane esa debamalene odene tawo uduudu rupusan ita waa sa tonpisideno esa osowe enedie. 19 Ita esa susugalene odene aleidie wadi debamau uduudu tawo osowe eneia nanaumon. Ita esa sa mo awanaposimono iono tenantoie. 20 Tane esa odene wadi nanasimone adiwe odene alena makawa 20 waden ita esa uduudulene wadi uduudu nanaumon. 21 Ita nitu uduudu tawo osowe inawaa waimoia, sa ipa nene, pue duwa wanwanlala, pue daitada dobino wanwanlala, esa moiawa daitada ita do apana uduudu bontoiena. 22 Tane nitu uduudu inawaa tawo osowe waimoia bontonatuwaiena. 23 God nitu uduudu inawaa tawo osowe waimoia, apana uduudu, pue debamau ita pue kerakera tetelala ita nene uduudu bomontuan. Tane Noa ita mo mida waa bedewe odoiena os inanton. 24 Tane esa abaialene winena walama 150 waden.

<- Bumpaida 6Bumpaida 8 ->