1 Sa baiwa Iosep alene warere diene wanase, “Ne mamana ita tatatana do mo pueu sipsip ita kau tane nitu uduudu mo mampoa do bola Kanaanwae wimone bola Gosen bedewe waimoi.”

2 Ita Iosep tatatawa 5 sonabamone ita banlamone alen warere mampe. 3 Mape warere mo waitaramone wanase, “E nola dainea dewasailana apanawa?”

Tane mo warere sipoasane waienase, “No nosinosimba ruau pue onioniala apanawa mape winen. 4 Walama kerauda os mape winena wanta, ipawa omana debamaia Kanaan bolawa bedewe segalen. No puemba nanau dia, sa baiwa rua ba, dia e wawo no ane bola Gosen bedewe wanta.”

5 Warere epe etene Iosep diene wanase, “E mamaa, tatataa ita wana e manawo wimoiena. 6 Sa baiwa e Isibt tawowa moawa bola eudida ewee bedewe mamaa, tatataa ita wana do teamowo Gosen bolawa debama bedewe wampu. Tane mo bedeuwo dea da pue onioniau dewawa atembaida me sonabewo alepie ne puena oniamopi.”

7 Ita Iosep mamba Iakob banlene alen warere mampe. Tane Iakob warere auwasane ita sau euda osowe itun.

8 Tane warere Iakob waitarasane wanase, “E enaa tauma ambi waden.”

9 Tane me leusane wanase, “Ne enana tauma 130 waden. Tane sa ipa mai ena debama ita surakau debamaia donsadina. Ita ne enana sa ipa mai ne nosinosina enau rua wadeipona, dia.” 10 Ema aupe Iakob warere auwasane ita sau euda me osowe itune ene nosene alen.

11 Tane warere wana rua Iosep mamba, tatatawa ita wamba do banlamone Isibt bedewe Ramsis bolawa euda moawa da mo wanamono bola wadane waimoiena. 12 Ita Iosep nana wadompe mamba, tatatawa, wamba ita mida me mamba duwe waimoia ita do seda kerakera uduudu ruaulempe odalempe wanamompa.

13 Tane walama sawo nana mai wineipe uduudu dialentuwan ipawa omana debamaia Isibt ita Kanaan bolawa bedewe segalen. 14 Ita Isibt ita Kanaan apanawa wimoie Iosep mampe nana gimarantoio baiwa maneu diasanatuwaiena. Ita Iosep mane sa uduudu otentue ita alene warere duwa bedewe teamone en. 15 Bola Isibt ita Kanaan apanawa maneu dialeno baiwa Isibt apanawa uduudu wimone Iosep diane waienase, “No ewaneiana ba, dia! No bontata baiwantitana ita mane do mainimbo dianton. E nana nenawo nata.”

16 Tane Iosep wanase, “Epe segalena baiwa e puela otene winlene neano sipoa ne nana enalepa.” 17 Sa baiwa mo pue uduudu otene wimone Iosep waneiena nana wanamopia baiwa. Ita pue isiwa oas, sipsip ita gote, kau ita donki otene wimone dewa ipa deawa dewasaiena. Iosep epe dewalene nana mampe apana ena sa bedewe oniamono waimoie.

18 Tane ena da bedewe mo osowe wimone Iosep diane waienase, “Tauma no mai e manawo lagantataa rua. No manemba ita puemba diasatana, mai mainimbo da wineipona, uduudu e manawolentuwan. Tane dea os mainimbo winedia, sa ipa no nubaida ita no tawomba. 19 Dima baiwa wane ewaneiano omana bowantata baiwantitana? Rua ba, dia; no nubaida ita tawomba eneeto gimaraite sipoa nana nenawo nate inantata. Tane do no ita tawomba do warere atowentate nolawa dewalala wanantata. Ita e lawuru naumba nenawo iraintate osowe wanta mai bontato tawo nowa di winepi, dia.”

20 Tane Isibt apanawa uduudu omana dewamono baiwa tawou waaubantono Iosep gimaramontue warere mampesan. 21 Ita Isibt apanawa uduudu epe dewantone warere nolawa dewalala wananton. 22 Tane pirisi os tawou Iosep mai gimaralepona ipawa warere mo mane wanamodio mampe nana gimarantoie waimoie.

23 Tauma Iosep wanase, “Ewanee, e ita tawola do gimaralenatue warere mampesano me mebaawa wanaiten. Sa baiwa ne tauma lawuru naumba enaledina otene aitane iraitana. 24 Tane e iraitonuno ipawa itumpa walamawe uwauwaitane oda 5 teamona. Ita sa bedewe dea warere wanana tane uduudu 4 e wadaitumone naumba ena da bedewe aina baiwa ita do e ita mida dulawo waimoia tane obanla do nanuna baiwa.”

25 Tauma apana Iosep diane waienase, “E no inaneana, sa baiwa e meneempa no ideita warere nolawa dewalala wanantena wankasantata.” 26 Tane Iosep anaana ituna walamawa sawo ita tauma winedia ruawantoia ipa ema epe, Isibt tawowa uduudu ipa warere mampea, sa baiwa iraitonuna nanala odawa 5 teamona bedewe dea wadane warere mebaawa wanonuna. Ita pirisi tawou warere mai gimaralepona baiwa anaana wadia rua nanau moawa mai warere waneipona, dia.

27 Tane Israel apanawa antone Isibt tawowa moawa ebowa Gosen bedewe bola wadane waimoiena. Mo sape waimoie maurantone ita do otootontone uaranton. 28 Iakob Isibt tawowa bedewe wandio enawa 17 dialen. Tane waina enawa awodealena ipa 147 waden.

29 Tane Iakob bowa walamawa kampaleidio me otopa Iosep dieno mampe wiseno wane wanase, “Naita e ne nuawadawadaneana witaa abuna atowe teamoa ita e euwa ita simbia sauawaitaa. Ne bonteapo mai Isibt bedewe dobosanea, dia. 30 Tane ne bubuana walama wisepio mamana ita atana do bubuantonte e awanane Isibt eaie aite mo tampo dobosanea.”✡Bumpai 49.29-32; 50.6

Ita Iosep wanase, “Ide rua ne dewasapa.”

31 Ita Iakob otopa mampe wane wanase, “Iosep, mainawo sauaitaa.” Ita me saualene wanase, “Oa, ne dewasapa.” Tane Iakob epe etene nuawa euleno dunelene God wadaposisan.

<- Bumpaida 46Bumpaida 48 ->