1 Tane Ismael apanawa Iosep banlene Isibtiwa antoiena. Sape Isibt warerewa duwa onieia uwauleidia apanawa ebowa Potipa Iosep gimaralene mampesan.

2 Ita me wadene mampesane duwa bedewe ituno wandie. Tane Iawe God ipa Iosep do mai epona, dia. Sa baiwa me nitu uduudu dewasadia bedewe ipuipua segaleidie. 3 Iawe God ipa Iosep do ita sausano nolawa uduudu dewamodio ipuipua segaleidio Potipa ewene, 4 nuawa euleno Iosep diena me nolawa dewasapi. Tane do me muka wanena apana mida me duwa bedewe nolantoia uwau apanawa segalepie ita nitu uduudu me witapelepio oniamopi. 5 Tane walama sawo Iawe God sauwa euda Iosep asiasi Isibtiwa Potipa duwa bedewe wanwanlala wadeiena. Ita do nitu uduudu du bedewe ita irai bedewe eulentuwan. 6 Ita du bedewe nitu uduudu wineia Iosep witapelena oniamopi. Tane Potipa mai dima da nuabolawalepi, dia. Me nana os nanawa insaisawa wadompa.

Tane Iosep me ipa apana emademba uwatauwa ewaewa eudida. 7 Ita me mai wampono daumalepono Potipa manainapa me ewene mampe nuawa omaidasano baiwa diene wanase, “Winewo nata ituntata.”

8 Tane Iosep dabualene wanase, “Ne onianedia apanawa mai dima da nuabolawaleipona, ipawa ne mape wainedina, ita nitu uduudu ne witanawosano oniedina. 9 Ne me aupawa wadane ita du ema oniedina. Nitu uduudu oniepina mukawa neen, me mai dima da anatepona, dia. Tane dea e os ipa me mebaawaida, ambi ne dianeiana kadiwa e manawo ita God mampe dewasapa?”

10 Tane i sa kainokaino Iosep itudosadie, ita me mai menasapona nata wampu ba ituntopu dabuaidalen.

11 Walama dea Iosep nola awa wisene du bedewe oden ita nola sosowa sape mai waimoipe, dia. 12 Me odene leidio Potipa manainapa me mampe wisene garawa onapea wadenitue diene wanase, “Winewo nata ituntata.” Me epe wadio Iosep weuwane nosene alen ita gara os i sa witape winakasalen.

13 Iosep i sa ene nosene aleno aupe me garawa onapea witape winedio ewene, 14 nola dewalala apamono mampe wimono diamone wanase, “Ewane, Ibru apanawa ema ne badana banlene wisene ituno duwa wandia dewa kadiwaida malawala mainawo dewasan. Me wisene no ituntitana bolawe odene wadaneapona baiwaleidio ka debama wana. 15 Ne ka wadino etene garawa ene weuwane nosene pewa alen.”

16 Ita me Iosep garawa wadenitue wandio badawa leulene duwa wisen. 17 Me wiseno manainapa dewa sa segalena umanawa uduudu benemasane wanase, “Ewee, Ibru apanawa ema e banleano wisene duwa wandia dewa kadiwaida malawala ne mainawo dewasan. Me odene no ituntitana bolawe ne wadaneapona baiwaleidie. 18 Tane ne ka wano me garawa ene weuwane nosene pewa alen.”

19 Potipa manainapa aia ema wano etene nuawa kadiidaleno 20 Iosep wadenitue dibura bedewe itun, warere apana dibura bedewe teamodio waimoia bolawe.

Ita sape Iosep dibura bedewe wandie. 21 Ita Iawe God ipa me do sa baiwa sau euda me osowe ituno dewa eubu dewamodie.✡Aposel 7.9 Ita dibura oniamodia apanawa me ewene nuawa eulen. 22 Sa baiwa me Iosep muka waneno dibura bedewe sosowa ita do nitu uduudu sape wineia oniamompa apanawa segalen. 23 Tane dibura oniedia apanawa mai dima da nuabolawalepona, dia. Ipawa sai sa uduudu tauma Iosep witapelen. Ita Iawe God ipa me do, sausadio dewa uduudu dewamodio ipuipua segantoie.

<- Bumpaida 38Bumpaida 40 ->