1 Abraam Mamre iawa debama bumpe omo pola wano baiwa nosene ape nope wandio mampe Iawe God segalen. 2 Me pisiwane apana natadea maida eneio ewamon. Me mo auwamopia baiwa enenwisene alene wau bumpe dunelene imimpa emmisilene namba dogo osowe itun.[a]

3 Ita me wanase, “Debamana, ne e nolaa dewala, naita e insena ne apana euda e emaawo mai ene aita. 4 Mape wanlempo ne esa wadape wimpo wala mitamone ita ia ema bumpe bubuaitana. 5 Ita do nana wadape wimpo nane nuala topio muka wadane tauma ala aitilanawo aitana. E ne nolaa dewalala mainawo wilena baiwa simbialepa.”

Ita mo waienase, “Sa ide, dima waana rua dewasaa.”

6 Tane Abraam diniwa mampe ape bede alene Sara diene wanase, “E tauwadea ene aie parawa begiwa dea winedia wade ita bured tabataba dewasae sua.” 7 Ita Abraam weuwane pue laiawo mampo wisene pue sanaa euda sonabene ita nola dewala waneno bosane ita tauwadea laulalen.

8 Tane Abraam pue amau sogapa ita nana ama sogapa mampe dewalala ita do moia otene wisene mo ia atowe waimoio wanamon. Ita mo nana naio rua me tampo enedie.

9 Tane mo Abraam waitarasane waienase, “E manainaa Sara naepe?”

Tane me sipoamone wanase, “Me ape bedewe wande.”

10 Ita mo bedeuwo dea Abraam diene wanase, “Ne ulaipaida dieedina ande winena rua deawaa imonepi enawa bedewe leuntape wineapo e manainaa Sara oto mona gamosapi.”[b]

Tane Sara me adiwe ape moape enene asisuleidie. 11 Sara Abraam nata gulauidanton ita do Sara mai uaboa wadeipe, diaida. 12 Ita Sara meba oi wane wanase, “Ne gulaunten ita etena oaralen do badana gulauidalen. No mai etemba deasate oto wadataa rua.”[c]

13 Tane Iawe God Abraam diene wanase, “Dima baiwa Sara oi wane wanase, ‘Ne gulaunten ide oto wadapaa rua, ba?’ 14 Iawe God mampe mai dewa da saiwa wineipona, dia.[d] Ne dieene wanase,

Ita Iawe God wanase, “Dia, e oi waana.”

16 Apana natadea enane a baiwantoio Abraam eneno do antoiena into emopia baiwa. Ita mo sawana dea osowe wimone enane emau ieno bola debama Sodom eweie.

17-19 Iawe God meba wane wanase, “Abraam nosinosiwa debamalepie mukamukauaida segalepi ita me bedewee dan daitada tawo osowe waimoia osouwo sau euda itupa. Ne Abraam sonabena me obampa badowa diamopio ne intanawo dewa euda dodomana dewasampe antompa ita mo obampu bedewea deawa dewasampa. Ema mampe ne Abraam mampe sauantena dewasapa. Tauma ne dima dewasapaa baiwantedina mai Abraam emawa mowe dewasapa, dia.”

20 Sa baiwa Iawe God Abraam mampe wanase, “Sodom ita Gomora apanawa kadi dewasaia umanau apana momoduntoio ne etana. 21 Ne iape anteape kadi debamaleidia ewapa ulaipa ba, dia.”

22 Ita sape apana nata enanawimone Sodom awa antoiena. Tane Iawe God Abraam nata sape enakasanton. 23 Tane Abraam Iawe God mampelene wanase, “E apana euda ita kadiwa waimompaa awodea kadimoatuapi, ba? 24 Apana eubu dodomana uduudu 50 bola sa debama bedewe waimompaa, e inseiana mo kadimoa, ba? Eulena apana ema 50 insamoe ita mai bola sa kadisaa. 25 Sa ipa mai euda, apana kadiu ita eubu do mai kadimoa. Naita epe dewaita apana kadiwa dewalala saibu mo di wadapu, ipawa e dewaa dodomana ita euda dewasaiana apanawa.”

26 Tane Iawe God wanase, “Ne apana 50 eubu ewamopaa emopa, mai bola sa kadisapa, mo kadiu insepadabuasapa, ipawa apana uduudu 50 eubu bola sa bedewe waimoi.”

27 Abraam me sipoasane wanase, “Tatana ne popokau rua diapanaida, gagalo ema diedine tane osowe wape dieepa baiwantedina. 28 Tane apana 50 bedewe 5 dia ita 45 os waimompaa e bola sa uduudu kadisaa, ba?”

Ita me wanase, “Ne apana eubu 45 ewamopaa bola sa mai kadisapa, dia.”

29 Abraam osowe waitaralene wanase, “Tane apana eubu 40 os ewamoa kadimoa, ba?”

Ita me sipoasane wanase, “Ne apana eubu 40 ewamopaa mai kadimopa, dia.”

30 Tane Abraam wanase, “Tatana ne mainawo mai nuaa kadilepi eneawo manawo gagalonteapa. Naita apana eubu 30 os sape ewamoa ambi dewamoa?”

Ita me sipoasane wanase, “Ne apana eubu 30 ewamopaa mai kadimopa, dia.”

31 Ita Abraam wanase, “Ne e manawo malasia badowa gagalontedina, naita apana eubu 20 ewamoa ambi dewamoa?”

Ita me sipoasane wanase, “Ne apana eubu 20 ewamopaa mai kadimopa, dia.”

32 Tane Abraam wanase, “Tatana ne mainawo mai nuaa kadilepi eneawo osowe gagalona ompa wape dieepa. Naita apana eubu 10 os ewamoa ambi dewamoa?”

Ita me sipoasane wanase, “Ne apana eubu 10 ewamopaa ne mai kadimopa, dia.”

33 Iawe God Abraam mampe gagalolene diasane ene aleno ita Abraam ene bolawe alen.

<- Bumpaida 17Bumpaida 19 ->