4 Ita me Eiga nata ituntone ita me bulen. Tane me bu dauwa etene atenlene Sarai ituaisisan. 5 Mape Sarai Abram diene wanase, “E dewaa baiwa ne nolana iwa wadane eneeno nata ituiten. Ita tauma me bulene etene ne nibuanede. Tane Iawe God mampe e kotua dodomanalepi ba ne kotuna dodomanalepi.”
6 Me epe wadio Abram leusane wanase, “E nolaa iwa sa e atoawo wande, e dima inseiana rua dewasaa me mampe.” Mape Sarai epe etene Eiga oniakadisasan. Ita Eiga salene weuwane nambe alen.
7 Tane Iawe God enseliwa Eiga sala makowa bedewe Sua bolawa bedewe inta waiwe maneu wiseidiawo donsan. 8 Ita me diene wanase, “Sarai nolawa iwa, e nainta wiene ita nainta aitiana?”
9 Tane Iawe God enseliwa me diene wanase, “E leuite aitaa, oniaedia iwa mukawa atoweitone wanempa.” 10 Ita ensel osowe me diene wanase, “Iawe God e dana dewasapio uaraia wisiasiawaia segantopu.”
11 Tauma osowe me diene wanase, “E tauma bu do wainiana kerauda os otoa mona gamosaa ita me ebowa itua Ismael[a] Iawe God nuaparea kewa eten. 12 Oto sa mulepie apana suanau rua segalepi. Me apana uduudu onau enompo ita mo me onawa enompa tane do me wanamba do wanwanbu kadilempa.”
13 Ema aupe dima Eiga mampe segalena asiasi Iawe God ebowa wane itune wanase, “Me mida ewanedie ateinedio os leidina emanawoido ewana.” 14 Ita ema baiwa me maneu sa ebowa itune wanase, ‘Bea Laia Roi.’[b] Maneu ipa sa tauma aleide Kades ita Bired sawanauwo.
15 Ita Eiga bulene oto mona gamosan Abram baiwa ita me ebowa Ismael wane itun.[c] 16 Tane Abram enawa 86 wadeno Eiga Ismael gamosan.
<- Bumpaida 15Bumpaida 17 ->- a Ebo Ismael Ibru aiawe ipawaida ipa, Iawe God nuaparea kewa eten.
- b Ebo Bie Laia Roi Ibru aiawe ipawaida ipa, me mida wanwankasala ewanedio os leidina.
- c Galasia 4.22