Aten gagalowa Waeuwa uawa Buka ema ebowa Aten gagalowa, tane mida girumalena apanawa ebowa mai atentapona tane aten apanawa isiwa inseia Solomon girumalen me ipa insadewasa apanawa. Me meba umanawa wadia me ipa Waeuwa Apanawa. Me gagalo pokaawau wamon. Apana uara God mai atensapona. Sa baiwa mo nitu uduudu segantoia ipawa atentopua baiwa banuntoi. Tane dewa sa ipau mai atenmopu, dia. Dewa ema ipa apana lanunu taneipe wadasusaipona rua. Waeuwa Apanawa no dianedie wadiase, dima God nenedia nuaeu mampe wadonte mainimbosanta. Apana mida tawo osowe wanwan euda menasampa me dewa dodomana dewasampe ita God wadaposisampe waimpa, me epe dewalempe nuaeulempe waimpa. Ompa osowe Waeuwa Apanawa waeuwanedie wadiase, “Ando God dima uduudu kadiwa ba euda no dewasaitana umanawa dianepi, sa baiwa no me wiwirawantonte aiawa ruawantonta. Dewa ema ipa debamawaida apana uduudu dewasampa.”
1
Nitu uduudu diapanau ipusiawaia
1 Ema ipa Waeuwa Apanawa Dawid otopa Ierusalem bedewe warereleidie wandia aiawa.
2 Waeuwa Apanawa wadiase,
“Nitu uduudu diapanau, diapanauida,
ipusiawaia!
Ulaipa di diapanauida!”
3 Apana tawo ema osowe waimoie nola pokawaa dewasai,
ita dima euwa dosaie wadei?
4 Apana muntoie waimoi ita do apana bontoie antoi,
tane tawo deawa winede.
5 Omo wiseidie ita pamede,
ita leuleidie aupawe wiseide.
6 Lanunu wita sen deneuwe wiseidie,
ita on deneuwe aleide.
Ita kawiroroleidie winede.
7 Esa nomoie owa bedewe antoi,
tane owa mai nopeleipona;
esa leuleidie aupawe wiseide,
ita aleide.
8 Nitu uduudu segaleidia etea dabuasampa rua,
gagalowa wawa apana mai menamoipona;
emamba nitu ewamode tane mai pokasaipona,
ita asimba dima etamodia mai pokasaipona.
9 Nitu uduudu bauta segantona tane osowe segantopu,
nitu bauta apana dewamoiena osowe dewamopu,
tawo osowe mai nitu da sanaa segaleipona, dia.
10 Walama isiwa apana wapuase,
“Ewane, nitu ema sanaa segalen.”
Dia, nitu uduudu mapo segantona deawaa winei
muriwa no munten.
11 Dewa dainea mapo segantona
mai mida insamoipona, dia,
ita dima no tauma dewamoitana,
apana ando muntompa mai insamopu.
Aten waeuwa
12 Ne ipa Waeuwa Apanawa Israelwa warereu Ierusalem bedewe wainedine. 13 Ne aten insaisawa mampe nitu uduudu tawo osowe segaleidia insadewasamodine ita insena, “God apana osouwo sai ita nuabola itun.” 14 Nitu uduudu tawo osowe segaleidia ipawa ne ewanasuden diapana, ewaewa lanunu tanone wadasusana rua.
15 Nitu kiokiolena e mai dodomanasaa rua,
ita nitu dainea mai winamoipona e mai di wisiaitaa rua.
16 Ne neba wane wanase, “Ewee, ne ateina debamaidalen mai mapo warere Ierusalem bedewe waimoia atembu rua, dia. Ne ipa aten debama apanawa.” 17 Ne insadewasa ita insakadisa atendewasamopa baiwa insaisawantedine tane donsana ipa dewa ema do lanunu tanone wadasusana rua.
18 Naita ateina insaisawa euwa debamaidalepia nuabola osonawo itupi,