Diutoronomi Waeuwa uawa Buka ema bedewe Israel apanawa bola Kanaan bedewe odapue wadapue mamposapua umanawa wade. Ita Moses mai mo do bola sawo antopu, dia. Sa baiwa me mo diadewasamode etapue tauma bola sa bedewe antopu. Ita do mo Isibtiwa waimoio ita Iawe God mo banlamone nosene alene sala makowa bedewe oniadewasamona umanawa wade. Moses anaana osowesane diadewasamodia ando mo anaana sa ruawantompe bola sa bedewe waimompa.
4
Moses Israel apanawa diamodia God anaanawa ruawantompa
1 Mape Moses Israel apanawa diamone wanase, “Israel apanawa, ne anaana uduudu enaledina ruawaitonuna, e epe dewaitonune wanlempe ita aitane Iawe God, nosinosila Godiu tawo enalepio wadane bedewe waina. 2 Iawe God, e Godila anaanawa ne dialedina, anaana sa bedewe mai da wadanaaubena ba da eba osowesane ituna, dia. Tane anaana ema e ruawaitonune wanlempa, mai ena, dia.✡Gagalo 22.18,19
6 E anaana ema deaitopa ruawaitonune wanlempaa mampe bola isiwa apanawa e insaisala dodomana ita atenla debama ewapu. Ita mo anaana ema uduudu etapue wapuase,
‘Ulaipa Israel apanawa dan debama mukawaa seganton, mo insaisa dodomana ita aten debama apanawa.’
7 Iawe God ipa no mainimboido ita no rauparintitana me saunede, mai bola isiwa debama ba kerakera apanau godiu da epe wainipona, dia. 8 Ande anaana ema uduudu ne dialedina ipa dodomana ita eubu winei, mai bola isiwa debamau ba kerakera anaanau epe rua wineipona, dia.
32-34 Walama sawo e Isibtiwa wanilano Iawe e Godila banlaleno nolelana ita me mukawa mampe ginasa pokawaau ita dewa debamau e emalawo dewamodie. Me adilawolene Isibt apanawa onau enene poka debama wanamon. Ita e me dewaleno apanawaida wanaiten, ita wadi Sainai iwe dobina bedewe ia debamaia idie bumedia bedewe me gagaloleidio etalana tane inawaa wainilana. Dewa inainambu ema rua mapo da epe segalen, ba? Dia! Tauma insaisala leusano tawo uduudu bedewe inseno alepi, bumpeido God apana dewasanawo dima segantona ita do muriwa e muitena insamona. Mai god da dewa inainambu ema rua dewamopona, dia.
39 E sumanaitane insenadewaitana Iawe me meba os ipa God uboo ita tawo osowe wande, ita mai god da wainipona, diaida. 40 Anaana ema uduudu ande ne enaledina ruawaitonune wanlempa. Ema mampe e ita e nosinosila do wanwan euda Iawe e Godila bola enalediawo wankasaitana.”
<- Diutoronomi 3Diutoronomi 5 ->