1 Walama emawo Iosia enawa 8 wadeno me Iuda warerewalen ita Ierusalem bedewe wandio enawa 31 dialen. Me inawa ipa Iedida Boskat apanawa Adaia anoopa. 2 Iosia dewa eubu Iawe God mampe dewamodie. Me nosiwa Dawid dewaida wadene Iawe God aiawa ita anaanawa ruawaleidie dodomana dewasadie.
Iosia apana isiwa diamona God duwa osowe sanaasapue wadapu. Tane walama sa bedewe mo God duwa sanaasaie Moses anaanawa bukawa da donsaiena ita wadane antone Iosia waneiena.
11 Tane warere anaana bukawa bedewe gagalo etedia nuawa pareleno ita garawa siolen. 12 Ita warere tauwadea os pirisi Elkia, Sapan otopa Aikam, Mikaia otopa Akabo ita Sapan me ipa warere nolawa benema girumalempa apanawa ita warere waeuwa apanawa debama Asaia diamone wanase, 13 “No nosinosimba buka ema aiawa mai ruawantoipe ita mai dianepona dewa ema dewamonta. Sa baiwa Iawe God nuawa kadiidaleide no mainimbo. E aitane God duwa bedewe ne baina ita tawo ema apanawa tane Iuda apanawa uduudu bainimba gagaloitana. Ita do anaana bukawa ema donsaiena gagalowa bedewe winedia waitarawa Iawe God diana.”
Iosia nolawa apanawa debamau Iawe God perowetawa mampe anton. Tane peroweta sa ipa i, me gagalowa ema wanaubeno leulene warere mampe alen ita ema epe wan.
16-17 “Iawe God wadiase,
‘Iuda apanawa ne adianananeiena ita god da mampo pueu pulontoi mo kokoitau witapo dewasaie nuana kadisai. Ne poka saiwa debamaia bola Ierusalem ita apana sape waimoia osouwo itupa. Dewa uduudu buka bedewe girumalena Iuda warerewa wisialena rua. Ne nuakadina ia idia rua iepi mo osouwo ita mai mida ia sa bosapi.’
18 Aitane Iuda warerewa Iawe God waitarawa wana diane wanaase,
‘Iawe Israelwa Godiu benemawa buka bedewe etaana umanawa ema epe wade: 19 Ita walama sawo ne bola ema ita apana bedewe waimoia adiananamona gagalowa etaana. Ne apana ema dabuamopa ita apana da dewamopo mo emalawoau wakadisau baiwa mo kadiwa donsaiena umanawa wampe diamompa. E kadiwa wawiaiten ita Iawe God mampe eba ituaisitene garaa sioiten ita keida waana. Tane ne e rauparia etana.
20 Sa baiwa ne e eepo bo obasa euwa boitawo apana dobosaepu. E mai poka saiwa bola ema bedewe itupa baiwantedina ewaa, dia.’ ” Sa baiwa mo benema peroweta iwoa diamono etane leuntone warere Iosia mampe antone benemasaiena.
