2 Koronikol

Waeuwa uawa

Buka ema 1 ita 2 Koronikol girumantoiena duduna deawaida Samuel ita Kin bukau bedewe wamodia rua. 1 Koronikol bedewe warere Dawid ita me insaisawa itudia God duwa bola debama Ierusalem bedewe wadepia dudunawa dianede. Dawid pirisi deaitopa diadewasamode ita me menasadia Iawe God deaitopa simbiasapu.

Tane 2 Koronikol bedewe Israel warereu dudunau umanawa wade. Sa ipa Solomon nolawa apanawa do God duwa Ierusalemwa wadeiena gagalowa wade. Tane Solomon boleno aupe me apanawa empuempuntono bola nata seganton. 2 Koronikol bedewe bola ema nata Iuda ita Israel warereu ita mo nolau dewasaiena umanawa dianede. Warere ema isiwa ipa eubu mo Iawe God ruawantoie. Tane mo uaraia ipa kadiuida mo mai God anaanawa ruawantoipe. Mo god lagawau wawontoie ita apana osouwo sai ituie, sa baiwa Iawe God emalawoa apanawa waubamono wimone bola ema nata onau enane kadimoiena.

14 Tane pirisi uwaula apanawa ita mo uduudu Iawe God mampe badowa sauantona mai ruawantopona, dia. Ita mo apana dewau kadiwa nuadabualalaida eweie wawontoie dewasaie. Ita Iawe God duwa bola debama Ierusalem bedewe enedia me kakaisana mo miramirasaiena.

15 Iuda apanawa nosinosiu Godiu Iawe, me apanawa ita duwa ewamone nuawa pareidalen. Sa baiwa me gagalowa benemalala waubamono anton me gagalowa osoweosowe wampo apana etompa. 16 Tane apana God gagalowa benemalala oibu waiena. Mo me gagalowa waia mo mai etapona ita God perowetawa oibu waiena. Sa baiwa Iawe God nuakadiwa debamaidalen, me nuakadiwa sa mai dima da bodepia rua, dia.

17 Sa baiwa Iawe God tawo Babilon warerewa wanaubeno alen bola debama Ierusalem onawa enepi. Tane Babilon sorodiawa Iuda apanawa sanaau bomoiena ita mo tanamoieno God duwa bedewe odane antoiena. Babilon sorodiau Iuda apanawa mai nuapareuntopona ita mo apana mona ita ioto sanaau, apana tontau ita kero wadawadala bomoiena. God Iuda apanawa uduudu otamone Babilon warerewa Nebukadnesa mukawa atowe teamon. 18 Babilon warerewa sorodiawa antone nitu debamau ita kerakerau uduudu God duwa bedewe wineio nolawantoia otamonatuwaiena. Mo antone nitu uwataubu God duwa bedewe wineia ita Iuda warerewa duwa tane me nolawa apanawa debamau dubu bedewe do otamoiena. Mo nitu ema uduudu otene Babilon bedewe anton. 19 Babilon warerewa sorodiawa God duwa suiena ita bola debama Ierusalem seu mampe gonaantoiena epatuiamone kadisaiena. Tane du debamau uduudu sumoiena ita nitu uwataubu kadimonatuwaiena. 20 Tane Iuda apanawa mo mida inawaa wankasantona Babilon warerewa sorodiawa otamona diburalala rua Babilon bolawa debama bedewe teamoiena. Tane mo Babilon bedewe waimoie ita warere sa me obampa do nolau dewalala segantone waimoio ideita Pesia tawowa ebowa debama segalen.

21 Sa baiwa Iawe God benemawa ulaipalen peroweta Ierimaia wana rua. Sabat walamawe bubuantoia rua tawo sa di winedie bubualeidio ena 70 dialen.

22 Tane tawo Pesia warerewa Sairus ena dea bedewe warereleidio Iawe God gagalowa peroweta Ierimaia waneno wana rua segalen. Iawe God Sairus dewasano anaana ema girumalene wanaubeno apana uduudu atentopua baiwa me wandia bolawa uduudu bedewainta alen.

23 “Pesia warerewa Sairus ema epe wan: