1 Iawe God Samuel diene wanase, “E dima baiwa Sol nuaparewaitiana? Ne mai menaneipona me Israelwa warereu waimpa. Tauma mena sipsip donawa bedewe memee wadee ita Beteliemwa apana ebowa Iese mampe aitaa. Me obampa uduudu bedeuwo dea ne sonabena warerelepia baiwa.”

2 Tane Samuel wanase, “Ambi anteapa? Dewa ema umanawa Sol etepia ne epanepibolepi.”

Tane Iawe God wanase, “A baiwa kau iwoa bunawa wade aite ita waase, ‘Ne Iawe God mampe pulo itupa baiwa winen.’ 3 E pue susuwa baiwa Iese nisosawo wisepio ita ne waeuwaepo rua dewaitaa. Me otopa dea ne sonabena euwaepo ewee ita me mena uawa osowe memea.”

4 Iawe God wana rua Samuel enenwisene ita Beteliemwa alen. Ita sape apana eiau me donsane saidantone ita waienase, “E a euwa wien, ba?”

5 Me sipoamone wanase, “Oa, ne Iawe God mampe pulo itupa baiwa winen. E eba imaaitane ita winleno antate Iawe God mampe pulo ituta.” Samuel Iese obampa do nisomona muba imaantopue tauma antopu pulo itutuwa baiwa.

6 Mo antone wimono Samuel Iese otopa tautuwa Eliab ewene insenase, “Ulaipa, apana ema Iawe God sonaben.”

7 Tane Iawe God Samuel diene wanase, “Mai me inainamba euda ita do muwa daumawa ewee insea, ipawa ne me ewanadabuasana. Apana mai ne Iawe God ewedina rua eweipona. Apana ete onapea ewei tane ne apana nuawa ewedina.”

10 Sa baiwa Iese obampa uduudu 7 diamono Samuel mampe anton. Tane me Iese diene wanase, “Iawe God e obana ema mai da sonabepona, dia.” 11 Ita Samuel Iese diene wanase, “E obana uduudu mape wimonatuaiena, ba?”

Iese sipoasane wanase, “Ne otona ompa wande, tane me tauma sipsip oniamode.”

Tane Samuel wanase, “Apana isiwa waaubamowo antopue me banlepue wimpu. Me wisepio tauma no aisintate wanta.”

12 Sa baiwa Iese apana isiwa waaubamono anton me banlepua baiwa. Tane Dawid me muwa ipa euda do apana sanaa emademba emawa ewaewa eudida.

Dawid wiseno Iawe God Samuel diene wanase, “Me ipa sa! Tauma aite mena me osowe memea.”

13 Ita sape me tatatawa eneio danauwo Samuel mena sipsip donawa bedewe winedia wadene ita Dawid uawe memen. Ita Iawe God aleupa mukamukaua Dawid osowe ien ita walama sawo ita odene su alena me mai epaiapona, dia. Ita Samuel ene bola debama Rama bedewe alen.

14 Tane Iawe God aleupa Sol ene aleno aupe Iawe God aleu kadiwa Sol osowe iene dewasadio saidaleidie os wandie.