15
Iawe God warere Sol dabuasane en
1 Walama dea Samuel Sol diene wanase, “Ne ipa ema Iawe God waaubanen mena osoawo memeno ita e warere segaiten me apanawa Israelwa uwaute oniamoa baiwa.
✡ Sa baiwa e Iawe God gagaloleidia deaitopa asisusaa.
2 Iawe God Mukamukaua wanase,
‘Walama sawo Israel apana Isibtiwae nomoio Amalek apanawa nosinosiu mo bodamoiena, sa baiwa ne tauma mo kadimopa.
✡ 3 E aitane Amalek apanawa do onaitana ita nitu uduudu mo mampoa kadimonatuapi, mai nitu da ena. Tane apana mona, ioto, seda debamau ita gegelau ita do mo pueu kau, sipsip, kamel ita donki uduudu bomonatuwapi.’ ”
4 Sa baiwa Sol sorodia mampo gagalo wanauben wimpue sausapue onantopua baiwa. Mo uduudu wimone bola debama ebowa Telem bedewe auweiena. Iuda damba bedewe sorodia wisiau uduudu 10,000 wimoiena. Ita Israel damba isiwa bedewe wimone auweieno wisia 200,000 waden.
7 Sol ualene sorodia banlamone Amalek apana do onantoie ita aimoiena. Mo Awila bolawa bedewe ona uantone antoie bola debama Sua bedewe Isibtiwa omo wiseidiawo wimoiena.
8 Me Agag Amalek apanawa warereu mai bosapona di taune banlene anton. Tane mo Amalek apanawa uduudu bomonatuaiena mai da epona, dia.
9 Sol ita ona apanawa do mai Agag bosapona dia, ita do mo mai pue eubu sipsip ita kau, mo pueu eubuida ita mo puraiwa eubu mai kadimopona dia. Mo pue ita puraiwau dainea mo eweie dabuamodia sa os kadimoiena.
10 Tane ema aupe Iawe God Samuel diene wanase, 11 “Ne nuana pareidalen Sol dewasano warerelena baiwa. Ipawa me ne adianananen ita ne anaanana mai ruawalepona dia.” Samuel Iawe God gagaloleidia etene nuawa pareleno ita tadina sawo me badowaida rauparikasalen.
12 Imonemba tadinaida Samuel Sol banuwa alen ewepia baiwa. Tane apana da me diene wanase, “Sol alen bola debama ebowa Kamel bedewe. Sape me seu eindoden apana seu sa ewompe me asowa wampa baiwa. Tane sa aupe me bola debama Gilgalwa iene alen.”
13 Samuel alene Sol donsano ita me diene wanase, “Samuel, Iawe God sauwa euda e manawo! Ne Iawe God anaanawa ruawanten.”
14 Tane Samuel sipoasane wanase, “Naita e me anaanawa ruaitapono dewa uduudu kadimopatuapona, tane dima baiwa sipsip ita kau aiau waio ne etedina?”
15 Tane Sol sipoasane wanase, “Ne sorodiana mida onantoia mo pue sa Amalek apanau mampo oteiena. Mo pue sipsip ita kau eubu emoiena Iawe e Godia mampe pulontompa baiwa tane isiwa no bomotatuwan.”
16 Tane Samuel Sol diene wanase, “Dainaitaa! Tadino Iawe God ne mainawo gagalolene wana ne dieepa.”
Sol sipoasane wanase, “Me ambi wan?”
17 Samuel sipoasane wanase, “Mapo e inseianase e apana kerauda tane tauma e ipa Israel apanawa uwaunepa. Iawe God mena osoawo ituna sa ipa mo warereu. 18 Me badowa wane dieene ita e waaubaena aitee Amalek apanau mida kadi dewasaia baiwa kadimoatuwapi. Me e dieena onaitone ideita uduudu bomoatuwapi. 19 E dima baiwa Iawe God aiawa mai ruaitapona? Me e dieena mo puraiwau da mai nuauepio ewee wadaa dia. Tane e ewanuautene nitu isiwa otamoana, e dewa kadiwaida dewasaana me emawe.”
20 Sol sipoasane wanase “Ne Iawe God wana ruawantene antene ita Amalek apanawa uduudu bomonatuwan tane mo warereu Agag os wadane banlene winen. 21 Tane ne sorodiana onantoia mo sipsip ita kau eubu mai bomopona, dia. Ita mo pue sa otamone bola debama Gilgal bedewe wimon Iawe e Godia mampe pulo itumpa baiwa.”
22 Tane Samuel wanase,
“Nitu dainea Iawe God nuawa eusade:
pue puloitile suilana ita do pulo isiwa dewamoilana mampe,
ba me aiawa etane ruawaitana mampe?
Asisuitana! Iawe God aiawa etane ita ruawaitana sa ipa eudida mai pulo ituitana rua,
tane no Iawe God mampeidontata sa ipa euda mai pue pulontoia rua.
23 Naita apana Iawe God amboitusapua, kadi sa ipa wene rua.
Tane apana nuau badosaie ne aiana mai ruantoipona,
sa ipa apana kokoitau mampo imimpu emmisintoia rua.
E Iawe God anaanawa mai ruawaitapona,
sa baiwa me e adiananaen
ita e ando mai warereite apana oniamoa, dia.”
27 Sape me leulenitue a baiwaleidio Sol Samuel garawa moa wadendodeno ita isuaden.
28 Tane Samuel wanase, “E ne garana moa wadaadodeno isuadena rua deawaa e warereitene Israelwa oniamoiana mukawa manawo wadenaubene apana da euda mai e ruaa wanen.
✡ 29 Israelwa Godiu ipa wanwankasalala, me mai lagaleipona ba insaisawa leusaitusaipona, me ando dewasapi. Me mai apanaida no ruamba, me mai insaisawa leusapi, dia.”
34 Ita Samuel bolawa debama Rama bedewe alen tane Sol leulene bolawa debama Gibea bedewe alen.
35 Samuel wandia walamawe Sol ibuwa mai osowe ewapona. Tane me ibuwa insedia walamawe nuawa pareidaleidie. Tane Iawe God do nuaparewalen ipawa me dewasano Sol Israel apanawa warereu segalena baiwa.
<- 1 Samuel 141 Samuel 16 ->
