1 Ne menanedia e Aleu kakaiwa amonawa enaledia nolawa ateitonune wanlempa. Sa baiwa ne gagalowanteapo e atendewaitana. 2 E God atensia wainilana walamawe duba dewawa nuala teinene banlakadisaleidio kokoitau diapanau aiau wasiawaia sumanaibuitile daubu eteile wainile. 3 Tane ema epe: Apana mida Aleu kakaiwa bedeuwo waine banlamodia mai Iesu wakadisasapue wapuase, “God Iesu matangelasapie kadiidasapi!” Diaida, mo mai epe wapu. Naita apana da epe wampa, sa ipa muka da me bedeweleno wade. Ita mo mida Aleu kakaiwa mai wadapono bedeuwolepona, mo mai ulaipa mampe waiponase, “Iesu ipa Tatamba!” Tane mo mida Aleu kakaiwa bedeuwolene banlamodia epe sumanaintoie wai. 4 ✡Rom 12.6-8Apana sumanailala Aleu kakaiwa bedeuwolene wandia amona daitada otamoiena mampe nolantoi. Tane amona sa uduudu Aleu kakaiwa dea os mampe nanaleidie wanamode. 5 Sumanailala nolau amonawa daitada mampe simbiantoie nolantoi, tane mo Tatau dea os simbiasai. 6 Mo nola daitada nolawantoi, tane mo nolau God dea os baiwa dewasai. Tane nola daitada apana uduudu dewamoia God os dewamode. 7 Apana deadea amonau otamoiena bedewe Aleu kakaiwa nolawaida sabamosade. Tane mo amonau sa otamoiena mampe ekelesia saumompo sumanaibu bedewe badowa enompaa baiwa. 8 Aleu kakaiwa apana isiwa amonau wanamodia insaisa debama mampe gagalontompaa baiwa. Ita Aleu kakaiwa deawaa apana isiwa aten debama mampe gagalontompaa amonawa wanamode. 9 Aleu kakaiwa apana isiwa amonau wanamodia mo sumanaiidantompaa baiwa. Ita isiwa apana kerolala inamompaa baiwa amonau wanamode. 10 Ita Aleu kakaiwa mo isiwa muka wanamodia ginasa dewamompaa baiwa. Tane apana isiwa amonau wanamodia God insaisawa atentompe apana mampo benemantompaa baiwa. Ita mo isiwa amonau me wanamodia mo aleu dauwa etaeta atentompaa baiwa. Mo Aleu kakaiwa nolawa nolaleidia ita do aleu kadiwa nolawa ewaewawa atenidantoie waimoi. Tane apana isiwa Aleu kakaiwa amonau wanamodia aia mo muba ita apana uduudu mai atentoipona mampe rauparintompa. Ita aia ipa sa God os atenleidia mo isiwa Aleu kakaiwa sauwa mampe ipawaida atentoia ekelesia diadewasamompo atentompa. Sa ipa mo amonau. 11 Nola sa uduudu mampe Aleu kakaiwa dea os apana uduudu bedeuwo nolaleide. Tane nola amonawa sa me meba menasadia rua apana deadea wanamode.

12 ✡Rom 12.4,5Gagalo babawa ema insena: No etembaida ibuwa ewaewa ipa dea, tane etemba osowe ete ebowa daitada winede. Epe rua deawaa no Kerisolala deantene Keriso etepaida wanantene me ekelesiawa wainitana. 13 No ipa dea os, ipawa God me Aleupa dea os mampe no babatutunene ina sanaa nenen ita Keriso etepa, sa ipa me ekelesiawa bedewe teanen. Me ekelesiawa ipa dea os, mai uara, dia. Ide no Iuswa, uwa daitada apanawa, mo apana debamau ba nola dewalala mo baibu nolantoia, God no baimba deawaa dewasane ita deanen. Do God me Aleupa kakaiwa dea os mampe no uduudu nopeneno pokanen.

14 Tane insena, no etemba moau mai ebou dea os wineipona, dia, ebou uara winamoi. 15 Naita no wamba wapiase, “Ne mai ebona wita, sa baiwa ne mai ete ema mampea.” Me epe wadia baiwa ete dea ene nambelen, ba? Dia! 16 Naita no asimba wapiase, “Ne mai ebona ema, sala ewaewala, sa baiwa ne mai ete ema mampea.” Me epe wadia baiwa ete dea ene nambelen, ba? Dia! 17 Tane ema epe insena: Naita no etemba uduudu emamba os wineipono ambi no aia moinawa eteipona? Ita do no etemba uduudu asimba os wineipono ambi no nitu bonawa eteipona, mai inta da wineipona epe segalepi, dia. 18 Tane God me no etemba ebowa daitada nolawa do intaweintawe teamon me insaisawa rua. 19 No etemba ebowa dea os winapono ando mai ewaewawa eteida segalepona, do mai noladewalepona, dia. 20 Tane mai epe segalepona, ete ebowa daitada auweieno eteida ibuwa segalen.

21 Emamba mai enepie witamba diepi wapiase, “Ne neba ruana, mai menaneipona e.” Do uwamba mai enepie wamba diepi wapiase, “Ne neba ruana, mai menaneipona e.” 22 Mai etemba osowe ebo da epe wapia rua, dia. Tane etemba bedewe dainea ewaewau oauarau mo ipa debamauida. 23 Do no etemba dainea mai ewaewala malawantitana no deaitopa benasaitadewae onieitadewantitana. 24 Tane etemba dainea ewaewawa euda no mai epe dewamoipona, dia. Inta ema bedewee God no etemba wadene deasan uduudu ipa ewaewa deawaa os, ipawa God etemba dainea malawala ituposisano no benasaitana. 25 Epe segalena baiwa no etemba deadea mai empuempuntopua rua, dia. Tane etemba sa deadea mo muba eda sauntompa. 26 Naita no etemba waiwa da pokawa wampa, sa ipa no etemba isiwa dontoie awodea poka etei. Tane etemba waiwa da noladewalempe ionolempa, sa ipa do etemba isiwa dontoie awodea nuaeuntoi.

27 Tauma ewana: Ne mai eteida umanawa waipona, tane eida umanala ne wadina. E ipa Keriso etepaida, tane e deadea ipa me etepa ebowa daitada rua wainilana. 28 ✡Epesus 4.11Ita me ekelesiawa bedewe God apana deadea nolauwonolauwo wanamon. Bauta me sumanailala isiwa aposel nolawa wanamona ekelesia bumpa uwaantompaa baiwa, wawe apana isiwa peroweta nolawa wanamona God insaisawa benemantompaa baiwa. Ema aupe God apana isiwa teamona Gagalo euda ipawaida waeuwantompaa baiwa. Tane da ginasa dewawa daitada dewamompaa baiwa amonau wanamon, ita isiwa amonau wanamona kerolala inamompaa baiwa. Da amonau ipa sosou isiwa nuaparelala saumompa, ita isiwa onionia nolawa wanamon. Tane apana isiwa God amonau wanamona aia daitada wampe God ebowa wadaposisampaa baiwa. 29 Mo uduudu aposel nolawa wadeiena, ba? Do ekelesia uduudu peroweta nolawa wadeiena, ba? Sumanailala uduudu Gagalo euda weuwantompaa amonawa wadeiena, ba? Mo uduudu ginasa dewamompa? 30 Ba mo uduudu kerolala inamompaa mukawa wadeiena? God mo uduudu aia daitada mai atenlala wampaa baiwa amonawa wanamon, ba? Do mo uduudu aia mo waia ipawaida atentompe ekelesia diadewasamompaa amonawa wadeiena, ba? Diaida, tane ekelesia bedeuwo apana deadea amonauwoamonauwo wadeiena.

31 Tane e nuala uduudu mampe Aleu kakaiwa amonawa debamauida baiwaitonuna.

<- 1 Korint 111 Korint 13 ->