Lu taune tomu ne'ese Owane Sitewi ma'e au te'e nine'iteye.
1 Sosu a'i pe ane lu taune lo peri no'u erasi ni'arawe hire ma'e wanuwe. Lowe apou uteye,
“Nomo Owane Sitewi lo iyape te'e ani arowete.
Le lai nomo si ete hene aniye.
Mi erasi pefine lo mi mi pasi pasi ironamitorowa.
Le kairefi erasi a'i ironamitorowa.
2 Le yo seni werese au hese ereiyei su,
peri werese lo wiyeme pefine a'i ne.
Au hese ereiyei lo ape farere a'i ironamisiya.
Le tafa'e menitani lo yo seni luwaru a'i au hese erei tepa'asiye.
Tafa'e menitani ape lu taune werese omo omo pani iroteye ape,
tafa'e yo seni luwaru a'i lo se au luwaruweteye.
Menitani ape lai Owane Sitewi lo wiyawi,
lu taune ta'aneteye ape mo, aine tera'eteye.
Serai Owane Sitewi lai le ma'e fofowei erasi aiwawe a'i itiya'u auwe.” [Lo 32:43; KTH 6:10]
3 Sosu lowe peri no'u erasi apou tame uteye,
“Nomo Owane Sitewi lo iyape te'e ani arowete. Yehe ape omo Babilon ti sero'oteye ape, itomu lo ape mi mi pasi pasi weriyei winamitorowa.”
4 Sosu ya'ariyei lu owane meni ta werese hesiyo hesiyo, sosu etiri hesiyo hesiyo ape marepi hepene norohuwe irosiya ape, lowe werese Owane Sitewi me tuto'u tutawe onusiya ape, lowe le ma'e lowe uporo ape'i onuwewe, le ma'e au te'e wisereye nine'iteye. Lowe apou uteye,
“Nomo Owane Sitewi lo iyape te'e ani arowete. Peri ape pefine a'i ne.”
Fe sipsip yene menitani ta naituwe.
5 Sosu a'i pe peri no'u ta Owane Sitewi lo me tuto'u atahe sahe uteye.
“Fene Owane Sitewi ma'e wiyawi au ta'anesiya ape, fene le ne au te'e wisereye nine'ite, fene le ma'e unahi teinamisiya ape, fene iyape erasi se ape, sosu fene lu taune yahowa'i ape ne. Fene werese iyape pefine a'i lo te'e ani arowete.”
6 Sosu ane lu taune ne'ese lo peri no'u erasi a'i wanuwe. Pesiyei, sosu sa'i no'u erasi aiwawe wou wanuwe. Lowe apou uteye,
“Nomo Owane Sitewi lo iyape te'e ani arowete. Owane Sitewi nomo lo, le lu taune werese werese kairefi erasi lo se au noweinoweinamisiya. [KTH 14:2]
7 Marepi nomo lo tote wisereye nine'inamite. Le erasi pefine a'i tene! Nomo le ma'e au te'e wisereye nine'inamite. Fe sipsip yene menitani ta naituwei ape, nowe ape henerai. Menitani lo ape ta'uwe nanei tepa'asiye. [KTH 21:2]
8 Lowe menitani ape ma'e ipari tahe wisere pefine a'i ani asiyei ne auwe. Ipari tahe lo wapo aseyaro a'i ne.” Ipari tahe ape apou a'i ne, yo seni aseyaro wara'i a'i Owane Sitewi lo lu feni ta'aneteye ape ne. [Ais 61:10]
9 Sosu Owane Sitewi lo ipari ta ane ma'e eiye, “Ne peri ape apou lesere! Lu taune werese fe sipsip yene lo menitani naituwei lo ape ne, ei ta'uwe aniye ape, lowe marepi nine'inamiteye.” Sosu le ane ma'e tame eiye, “Owane Sitewi lo peri ape pefine a'i ne.” [Mt 22:2-3]
10 Sosu ane Owane Sitewi lo ipari ma'e winetai lowe uporo ape'i onuwewe, le ma'e au te'e wisereye nine'iyei ne toteye. Ahowa, le ane ma'e eiye, “Ane ma'e owe ape au te'e wisereye nine'ite. Ane ne aiwawe a'i Owane Sitewi lo wiyawi meni tene! Sosu kaiyemo mo no aiwawe a'i. Lowe Jisas lo peri pefine a'i au te'e areiyeteye ape, fene werese Owane Sitewi ma'e au te'e wisereye nine'ite. Lu taune Jisas lo yo seni wara'i a'i au te'e areiyeteye ape, peri lo ape wiyeme pefine a'i henerairowa.” [Ap 10:25,26; KTH 22:8-9]
Meni ta fe hos wapo a'i hire sahe onuteye.
11 Sosu a'i pe ane ni'arawe toso howeiyei siyeye su, ane fe hos wapo a'i siyeye. Meni ape fe hos lo me'iyeni sahe onuteye ape, iyape lo apou aiwawe a'i ne. Meni ape Owane Sitewi lo marepi mi mi weriyei umasinamisiya. Peri werese lo ape pefine a'i ne. Le lu taune lo yo seni au hese ereiyei su, marepi yo seni lo farere pefine a'i ne. Sosu le airame lo ai atuwei su, marepi yo seni lo aiwawe a'i farere a'i ne. [KTH 1:5; 6:2; Sng 96:13; Ais 11:4]12 Nihe lo yehe mi wou mitaiyeteye. Mato lo sahe meni owane tutawe lo mato tuhe oso a'i ani asiteye. Tahe lo sahe iyape ta leseye. Iyape lo ape lu taune werese so'oru ta'ama. Le a'i lai iyape topo lo so'oruwe ne. [Dan 10:6; KTH 1:4; 2:17]13 Ipari tahe pitase a'i fisa'i sahe ani aporuwe ape, ani asiteye. Iyape tere'e lo apou aiwawe a'i Owane Sitewi lo peri pefine a'i ne. [Ais 63:1-3; Jo 1:1,14]14 Ai lu tomu ne'ese omo ni'arawe hire ma'e iroteye ape, lowe ipari tahe wisere pefine a'i ani asiteye. Ipari tahe lowe lo wapo aseyaro a'i ape ani asi ereye. Ai lu werese ape mo fe hos wapo a'i me'iyeni hire sahe onu ereyewe, le mo'o umasiteye. 15 Ahi lo sahe ipari mene'e pipisi a'i nowe ma'e henerai. Ipari mene'e lo se, le lu taune omo omo pani werese ma'e ai atuwei ne fi.
“Le lowe werese kairefi a'i se au noweinoweinamiteye.” Sng 2:9
Lu taune werese Owane Sitewi me'iyeni ma'e tote aruteyei ape, le Owane Sitewi lo ai marepi tote umasiteye. [KTH 1:16; 14:20]16 Ipari tahe pitase a'i lo sahe, le ani asiye ape, sosu lowe po lo sahe iyape ta leseye.
“Meni Owane tutawe lo meni owane tutawe pefine a'i ne. Sosu meni owane lo meni owane pefine a'i ne.”
17 Sosu a'i pe ane Owane Sitewi lo ipari ta poweiye sahe teiteyei siyeye. Le peri erasi irowe werese ma'e ni'arawe hire ma'e sine ere uweiteye ape mo, apou uteye, “Fene werese ta'uwera! Fene werese Owane Sitewi lai airame lo ape mo aine tera'eyei ne fa ninawere. Airame werese aine tera'e tepa'asiye su, fene hereiyei erasi a'i eite sahe ta'uwe ene are. [Ese 39:17-20]18 Fene ene ayei ne ta'uweraiyei su, fene meni owane tutawe ape mo lo lo'u, sosu ai lu lo lu owane werese lo lo'u, sosu lu kairefi a'i lo lo'u, ene are. Fene fe hos lo lo'u, sosu lu ape, fene lo'u lowe lo werese ene are. Sosu lu werese lo lo'u ene are. Lu tamo wiyawi ma'aru ne ta'anesiya ape, sosu lu tamo wiyawi yahowa'i ne ta'anesiya ape, fene lo'u lowe lo werese ene are. Lu tamo iyape se sosu lu tamo iyape ta'ame, fene lo'u lowe lo werese ene are.”
19 Sosu ane sa'i eifariyai, sosu awei lo lu owane tutawe ape mo, lowe ai atuwei ne ta'uweraiyei siyeye. Lowe ai lu werese lowe lo aiwawe a'i lai, ai lu tewi werese lowe lo aiwawe a'i meni owane ape fe hos hire sahe onusiya ape, sosu ai lu werese lo ape mo ma'e ai atuwei ne ta'uwerai. 20 Sosu lowe ai atuwei su, meni Owane Krais lai sa'i eifariyai ereti lowe wafei se ti tawesiteye. Sosu le meni ape, peri wawero au te'eteye ape, aiwawe a'i ereti lowe wafei se ti tawesiteye. Meni wawero ape wiyawi erasi a'i sa'i eifariyai lo nihe se ta'aneteye. Le lu taune werese sa'i eifariyai lo yaru leseye ape, sosu lu taune ape mo sa'i eifariyai lo nihari hawese au nine'iteye ape, le lowe ne au areareteye. Owane Sitewi lai lowesi hepene se hare ite erasi yehe tisiya ape ma'e, ani fu arowe. Hare ite erasi, yehe tisiya ape, tapiye salfa ti metesiya. [KTH 13:12-17; 20:10]21 Sosu Krais fe hos hire sahe onuteye ape, le ai lu tere'e werese mene'e se aine tera'e temeniyeye. Ipari mene'e ape ahi lo sahe henerai. Irowe werese ape mo lo'u lowe lo ene ayei teme'eriyeye.
