Konran Kapada kon

HEBREO
nin Pinili' nan Dios
Say Maipa'ka' konan Sitin Surat
Sitin surat konran Judio nin mantumumbok kona ni Jesus, kai nin tanda' no si'noy nanurat. Si gagara a sinurat ya ket ta pigaw nin mapagsen a nakem ra maipa'ka' sa pammemper ra. Bana' ta man'umabaw nin kasan tegen a idap, dandani rayna nin pauryan a pammemper ra kona ni Cristo ket sumubli' sarayna sa rilihyon ran Judio. Iti konan sitin surat mampau'nawan nasaradti nin mi'nem nin parso maipa'ka' sa panunusa nan Dios konran mamauryan sa pammemper ra kona ni Jesus (2:1-4; 3:7-19; 4:11-13; 5:11–6:12; 10:26-39; 12:25-29). Liwaliwawen nasara anamaet yupa' sa pangingipada na konra konran puon ra nin madaer sara sa pagmamatalek ra konan Dios (10:39–12:3). Mampagsenen nan nanurat a nakem ra yupa' sa pangingipatanda' na nin say maipa'ka' sa sangkata'gayan a kapapa'sar nan si syay Anak nan Dios.
Nipapalaway nayti e nin tulon bubagay a maipa'ka' kona ni Jesus:
Si primiro ket, sya a Anak nan Dios nin kasan tarana' tan kasan anggawan. Naadal na a katutulok konan Dios sin nangirangep yan dya'dya', ket bana' sa sain tan bana' ta syay Anak nan Dios, mas ata'gay yan adayo' dyan saray prupita tan si Moises, tan wanin et konran uanghil.
Ikarwa, say ginwa' na ni Jesus ket mas mablin adayo' dyan say man-gaw'en ran pupadi' ran Judio, kanya' nin sya a sinmili konra ta i'deng nasaran anggan-angga a tutawo konan Dios.
Ikatlo, bana' kona, nila'pos a pangingisalba konran tutawo bana' ta sya a maikana' nin mangwa' nin matukid a kaugalian ran Judio tan say gagara nin pangingida'ton nin uayep konan Dios.
Anaod, si nanurat, nibarita' nay maipa'ka' sa sain ta pigaw nin saray makabasa konan siti ket, mag'in nin ma'get a pammemper ra kona ni Jesus, mataman nin sabtan anan tuloy nin pakapai-paidap ra. Sa suyot a parti nan surat, binibilin nasaran maong ta pigaw nin kai sara nin kumadayo' konan Dios no kai edet, magkabyay saran mamaririket kona.
Say Linaman nan Sitin Surat
Sangkata'gayan ya si Cristo (1:1–10:18)
Nikiirgo yay Dios kontamo nin naipadalan na konan si saya a kapadan-kapada na (1:1-4)
Mas ata'gay ya anaod si Jesus dyan saray uanghil (1:5–2:18)
Si Moises, tagasirbi ya; Si Jesus, anak ya (3:1–4:13)
Say nikapadi' na ni Cristo, mas ata'gay dyan say nikapadi' nin naipatukdo' sa Gugan-gan (4:14–7:28)
Nipagamet ya kona ni Jesus a mas mabistan nitarato (8:1-13)
Nika' naya ni Jesus a mas mabistan da'ton (9:1–10:18)
Idengan moyoy magkabyay nin maikana' konan Dios (10:19–13:19)
Dumaer nin milalo sa nipangako' nan Dios (10:19–12:3)
Say idap nin irangep nan sayay tawo nan Dios ket nigagaran mangipatunong kona (12:4-10)
Parmawen moyo a magkabyay nin bilang sa pagkabyay nan Dios (12:11-29)
Say gugawa' nin maikana' sa adapan nan Dios (13:1-19)
Bindisyon tan masusuyot nin pangingigalang (13:20-25)

Nikiirgo yay Dios kontamo Yupa' konan Sya a Anak na

1 Sin saytaw sin nu'na, si Dios, nangusar yan nagsikabarang nin padalan sa naduma-duman panaon ta pigaw nin nikiirgo ya konran pupuon tamo. Niyusar nasaray prupita na sa nipangwa' na nin wanin. 2 Bale' sa siti nin susuyot nin panaon, si nangipadalanan nan Dios nin kiirgo kontamo ket, anak naya. Yupa' konan sitin anak na, nagwa' nan Dios nin pinarsa a sarba nga'min tan ipaikon na et kona a sarba nga'min. 3 Syay paka'kitan nin kata'gayan nan Dios tan pinakarupa nayan Dios bana' ta no ani yay Dios, wanin ya anamaet. Mangibwat sa pakayadi' nin irgo na tamo' nin sitin anak na ket, mauksoy nayna a sarba. Sin naila'pos nayna a gawa' na ta pigaw nin ringgasan natamo sa kukasalanan tamo, tinmekre' ya nin itaw ya sa pawanan nan Dios nin Sangkata'gayan itaw sa langit,* 4 ket pinag'in yan mas ata'gay* dyan saray uanghil. Kapada a mas ata'gay ya dyan saray uanghil, si titulo a nibi nan Dios kona ket mas ata'gay ya dyan say titulo ran uanghil.

Mas Ata'gay ya anaod tin Anak nan Dios Dyan saray Uanghil

5 Wanin ta kasa gapo nin anghil a namaritaan nan Dios nin wana,

“Si'ka, anak kata.

O', sawanin, pina'get koy nipanuyo' ko komo.”*

Kai na anamaet nibarita' nin Dios sa sayay anghil,

“Si'ta, mitraama ata.”*

6 Anaod, sin panaon anamaet nin nibaki' nayadti sa luta' a sya mansabtan yan Kaka*, wanan Dios,

“Matkap a raywen raya nin sarba ran uanghil ko.”*

7 Ibarita' na nin Dios maipa'ka' konran uanghil na a wana,

“Ibabaki' kosara ket

magwa' kosaran ibaki' sa naduma-duman padalan

bilang wadi', siri o apoy sara.”*

8 Bale' maipa'ka' konan Anak na, wanan Dios,

“O Dios, mag'adi' kan kasan anggawan

tan say pag'uuray mo ket matu'rir.

9 Kaririktan moy mapteg a gawa'-gawa' tan gura' moy duka'.

Ket bana' ta wanin, si'ko nin si Dios mo, tinudo' katan mag'in nin ata'gay sa sarba

tan ginwa' katan mas maririket dyan saray kalalamo' mo.”*

10 Wana et nin Dios,

“Si'ka, Uunuren, pinarsa may mundo sin tarana'

tan mataman nin say langit ket gawa' nin gamet mo.

11 Sarban sain nin pinarsa mo, makasa,

bale' si'ka, main ka anggan-angga.

Sain say pinarsa mo, umran nin kapada nin seket

12 ket kapadan panglus'ok mon manilin aysing,

galten tan silyan mo in.

Bale' si'ka, ambo' kan wanin;

kasan pangumanan mo tan kasan anggawan mo.”*

13 Kasa gapon lamang ni saya nin anghil a namaritaan nan Dios nin sayti e a nibarita' na konan Anak na:

“Tumekre' kadti sa pawanan ko

leg'an a sarba ran kuntra komo ket,

pasukuen kosaran liso sa adapan mo.”*

14 Si'no sarayti anaod saray uanghil? Ispirito sarayti nga'min nin mampagsirbi konan Dios ket, ibaki' nasara nin tumulong konran tutawon maisalba.

Hebreo 2 ->