1 ಮೆಲ್ಕಿಜೆದೆಕ ಸಾಲೆಮಿನೊ ರಾಜೊ಼ ವ್ಹತ್ತೊ ವರಿ ಕ್ಹುದಾನೊ ಯಾಜಕ ವ್ಹತ್ತೊ. ಅಬ್ರಹಾಮ ರಾಜಾ಼ವೊನೆ ಹರಾಡಿನ ಆತಾಮಾ ತೆ ಅಬ್ರಹಾಮನೆ ಮಳಿನ ಆಶಿರ್ವಾದ ದಿದ್ಯೊ. 2 ಅಬ್ರಹಾಮ ತಿನೆ ತಿಕನ ರ‍್ಹಯಲ ಕ್ಹಾರಾವೊಮಾನು ದಕ್ಹವಾನು ಯಕ್ಕ ಭಾಗ ದಿದ್ಯೊ. ಸಾಲೆಮೆನೊ ರಾಜೊ಼ ಥಯಲ ಮೆಲ್ಕಿದೆಜೆಕ ಕವಾನು ನಾಮನೊ ಬೆ ಮತ್ಲಬ ಛೆ. ಮೆಲ್ಕಿದೆಜೆಕ ಕದ್ಯಾಮ, ನಿತಿನೊ ರಾಜೊ಼” ಮತ್ಲಬ ವ್ಹೈ. ಸಾಲೆಮೆರಾಜೊ಼ ಕದ್ಯಾಮ” ಶಾಂತಿನೊ ರಾಜೊ಼ ವ್ಹೈ ಕೈನ ಮತ್ಲಬ ವ್ಹೈ. 3 ಮೆಲ್ಕಿಜೆದೆಕನಾ ಮಾ ಬಾಪ ಕುನ ವ್ಹೈ ಕೈನ ತೆ ಕಿಜಾತೊ ಆಯೊಸ ಕವಾನು ತೆ ಕೆಳಾಮಾ ಹುಟ್ಟೊಸ ಕವಾನು ತೆ ಕೆಳಾಮಾ ಮರಿಯೊಸ ಕವಾನು ಕಿನೆಜ಼ ಗೊತ್ತ ನತ್ತಿ. ತೆ ಕ್ಹುದಾನೊ ದಿಕ್ರಾ ಲಿಂಗತ ವ್ಹತ್ತೊ; ತೆ ಹಮೆಶಾಬಿ ಯಾಜಕ ಥಯೊಸ. 4 ಮೆಲ್ಕಿಜೆದೆಕ ಕೆಕ್ಲೊ ಮ್ಹೊಟೊ ವ್ಹೈ ಕವಾನು ತುಮೆ ದೆಕೊಶಿ. ಅಪ್ನೊ ಮೂಲ ಪಿತೃ ಥಯಲ ಅಬ್ರಹಾಮ, ಯುದ್ದಮಾ ಝಿತ್ತಲಮಾನು ದಕ್ಹವಾ ಯಕ್ಕ ಭಾಗ ತಿನೆ ದಿದ್ಯೊ. 5 ವರಿ ಲೆವಿ ಖಾಂದಾನನಾ ಮನಕ್ಹೊಮಾ ಅಬ್ರಹಾಮನಾ ಖಾಂದಾನವಾಲಾ ರ‍್ಹಯಾತಬಿ ಇಸ್ರಾಯೆಲನಾ ಮನಕ್ಹೊಕಂತಾ ದಕ್ಹವಾಮಾನು ಯಕ್ಕ ಭಾಗ ಲ್ಯು ಕೈನ ಧರಮಶಾಸ್ತ್ರ ಕವಸ, ಕದ್ಯಾಮ ಯಾಜಕೊ ತ್ಯುನಾ ಖಾಸ ಮನಕ್ಹೊಜ಼ ಕುಡ್ಸಸ. 6 ಮೆಲ್ಕಿಜೆದೆಕ ಲೆವಿನೊ ಘರದಾನನೊ ನ್ಹೊತೊ, ರ‍್ಹೈತುಬಿ ತೆ ಅಬ್ರಹಾಮಕ್ಹು ದಕ್ಹವಾಮಾನು ಯಕ್ಕ ಭಾಗ ಪಡ್ದಿಲಿದ್ಯೊ. ಕ್ಹುದಾಕ್ಹು ವಾಗ್ದಾನ ವ್ಹಂದಿಲಿದಲವಾಲಾನೆ ಆಶಿರ್ವಾದ ಕರ‍್ಯೊ. 7 ಖಾಸ ರ‍್ಹಯಲ ಮನಕ್ಹ ನ್ಹಾನಾ ಮನಕ್ಹನೆ ಅಶಿರವಾದ ದಿವಸ ಕವಾನು ಕ್ಹಾರಾ ಮನಕ್ಹೊನೆ ಗ್ವತ್ತ ರ‍್ಹಯಲ ವಿಚಾರ ವ್ಹೈ. 8 ಯಾಜಕೊ ದಕ್ಹವಾಮಾನು ಯಕ್ಕ ಭಾಗ ಲಿವಾಲಾ ಯಕ್ನಾ ಯಕ್ಕ ದಿನ್ನ ಮರಸ. ತೆನೈಸೊ ಅಬ್ರಹಾಮಕ್ಹು ದಕ್ಹಾವಾಮಾನು ಯಕ್ಕ ಭಾಗ ಪಡ್ದಿಲಿದಲ ಮೆಲ್ಕಿಜೆದಕ ಜಿವ್ತೊ ರ‍್ಹವಸ ಕೈನ ಪವಿತ್ರ ಗ್ರಂಥ ಕವಸ. 9 ವರಿ ದಕ್ಹವಾಮಾನು ಯಕ್ಕ ಭಾಗ ಲಿವಾಲೊ ಲೆವಿಬಿ ಅಬ್ರಹಾಮನಾ ಮುಲಕ ದಕ್ಹವಾಮಾನು ಯಕ್ಕ ಭಾಗ ದಿದಲ ಲಿಂಗತ ಥಯು. 10 ಕಾಕದ್ಯಾಮ ಲೆವಿ ಹುಜ಼ನ ಹುಟ್ಯೊ ನ್ಹೊತೊ, ತೆನೈಸೊ ಮೆಲ್ಕಿಜೆದೆಕ ತಿನೆ ಮಳಾನೆ ಆಯಲ ಟೈಮಮಾ ತಿನೊ ಪುರವಿಕ ಥಯಲ ಅಬ್ರಹಾಮನಾ ಸ್ವಭಾವಮಾ ಲೆವಿ ವ್ಹತ್ತೊ. 11 ಇಸ್ರಾಯೆಲೊನೆ ದಿದಲ ಧರಮ ಶಾಸ್ತ್ರ ಲೆವಿಯೊನಾ ಯಾಜಕತ್ವನಾ ಉಪ್ಪರ ಆಧಾರ ಛೆ. ಲೆವಿಯೊನಾ ಎ ಯಾಜಕತ್ವಕ್ಹುಜ಼ ಪುರಾ ರಡಿ ಥಾವಾನು ರ‍್ಹವತ್ತೊ, ಆರೊನನಿ ಪರಂಪರಾನೆ ನೈ ಮಳಾನಾ, ಮೆಲ್ಕಿಜೆದೆಕನಿ ಪರಂಪರಾನೆ ಮಳಲ ಬಿಜೆಕ್ಕ ಯಾಜಕ ಆವಾನಿ ಜ಼ರುರತ ಸು ವ್ಹತ್ತಿ? 12 ಬಿಜೊ಼ ಯಾಜಕ ಆಯೊಮ, ತೆಳಾಮಾ ಧರಮಶಾಸ್ತ್ರ ಬದಲಿ ಥಾವಸ. 13 ಅಪೆ ಕ್ರಿಸ್ತನಾ ಹುತಿ ಎ ಕ್ಹಾರು ಕವಾಡಾತಾ. ತೆ ಬಿಜಾ಼ ಖಾಂದಾನನೆ ಸೆರಲವಾಲೊ ವ್ಹೈ. ತೆ ಖಾಂದಾನೊಮಾ ಕುನಬಿ ರ್‍ಹೈನಕಾ ಯಾಜಕ ಥೈನ ಸೆವಾ ಕರ‍್ಯಾ ನ್ಹೊತಾ. 14 ಅಪ್ನೊ ಪ್ರಭು ಕ್ರಿಸ್ತ ಯೆಹುದ ಖಾಂದಾನಮಾತೊ ಆಯೊಸ ಕೈನ ಚೊ಼ಕಿತರಾ ಥಯುಸ. ತೆ ಖಾಂದಾನನೆ ಸೆರೆಲ ಯಾಜಕೊನಾ ಹುತಿ ಮೊಶೆ ಸುಜ಼ ಕದ್ಯೊ ನೈ.