1 Xawa xura[a], Xauwae sini xouwesikerina nupo xoukemu sikeki sikekina! Sini Xoiteupo nonomixi nue wenisikeyai. Paiya suauni kutu, sini Xoiteupo nonomi purinuku. Ouropu apimie Xoiteu sipawoneai xana xuwe, pa xati siko rania sipasikerixe. 2 Waukia xura[b], ximine sini Xoiteupo nonomi purinuku. Sewai sini amaki puropua pa sini xemu sipaukirixe. Pana siko sipa, Kristusue yara putawopina yause xosa, sikoe suauni kutu xekeunukua, sini nuko sieni xepu. 3 Pa xati, yue Kristusu nukou siexepurexineria, nini kapia kutu asinaku tairouneri. Pa xati Kristusue xosei purotai sie nini rania xosei purineri.
4 Apue[c] xunu eretaia nu Xoiteupo tu sokau porouna. Xunu paiya tu sokau porowopi kapia. 5 Tini[d] sipa, Kristusue xunu xesauwepure putawoyai xati, nu xosa xunu puratixe. 6 Apue[e] Kristusu xeika etokina paiya, nu xunupo kapia tairouwatixe. Kire apue xunupo kapia taina paiya, nu Kristusu xekoyai xana xuwexi sipawopu, pa xeika nu Kristusu sipa xuwe xepu.
7 Tini[f] yeu nono misiarara xura, tini sosopa epixakuai, panumu kire apue xoreitikexete. Apue asinaku kutu kapia kakatia, nu apu asinaku kutu, nu Apu Kristusu asinaku kutu sie. 8 Ximuximu[g] ekimeni kutu xosa, Satanie sipesi xunu erirouna, pa xati apue xunu erirouna paiya nu Satanipo apu. Pa xati Xoiteupo Nonoe Satanipo saina purieina xesauwepure yarani putawoyai. 9 Kire[h] apue Xoiteupo nono saina paiya, nu xunupo kapia tairouwatixana xuwe. Xoiteupo ekeomani pa apu xosa purina, pa xati nue xunupo kapia taiwopuwatixe. Xuwe. Nu Xoiteupo nono purina. 10 Yue [i]Xoiteupo nono xati yue Satanipo nono xinuku sipawopurepa, apue asinaku kutu kapia kakepu xuweuwatia, nu Xoiteupo nono xuwexi sipawopu. Pa xeika apue Xoiteupo kireu nonomi xiri xouwenikepi xuweurouna rania nu Xoiteupo xuwe xepu.
13 Xatai xura[l], ouropu apimie xiwaixiwaitikeria, tini paire kakixanari xoxi ure urewaku. 14 Sini[m] Xoiteupo kireu xuiapu xosa xosikikemu tinikirounuku, pa xati siko sipa, sini xumopipo kapia wetikiriai xati, ekisikiomapu kapia xosa purinuku. Apue xataumana xoukemu tinikepu xuweurouna paiya, nu xumopipo kapia xosauni purina. 15 Apu[n] xatau xiri xouwewopu xuweuna xoukemu xoxixoxixina paiya, nu apu ouwetai siexina. Pa xati tini sipa, apue kire apu ouweina paiya, nu sipesi sipesi ati puropina ekeoma tatixe. 16 Yesusue[o] siko tianisikepure nukou ekeomani wetina xumotai xati, nupo pa kapia paie kireu xiri xosikienikepi kapia atarisiketai. Pa xati sinie rania xatasikimanae Yesusu taiwoteneai tianikepure ekisikioma wetepu. 17 Pana[p] kire apu nu mua ouropu sapi tukue, kire xatau xekoati xuruara xuweitauwati, nu pa xataure xousuawopu xuweunapa siko sipa, Xoiteue kireu xouwenikirouna kapia pa apu xosa puratixe. 18 Tini[q] yeu nono misiarara, sini xatasikimana kuna kireniere e supusikie kireni xosikienikepuxe. Xuwe. Sini sikou xosikikemuni kutu tinikinuku asinaku kapia nini xosa kakepu.
- a 3.1 Yo 1.12; 3.16; 16.3;Ro 8.16;1 Yo 4.10
- b 3.2 Ro 8.18; 8.29;1 Ko 15.49;2 Ko 3.18;Pl 3.21;Kl 3.4;2 Pi 1.4
- c 3.4 Ro 4.15;1 Yo 5.17
- d 3.5 Ais 53.5-6; 53.11;Yo 1.29;2 Ko 5.21;1 Ti 1.15;Ip 4.15;1 Pi 2.22-24;1 Yo 2.2
- e 3.6 Ro 6.1-2; 6.14;1 Yo 2.4; 3.9; 4.8;3 Yo 11
- f 3.7 Ro 2.13;1 Yo 2.26; 2.29
- g 3.8 Stt 3.15;Lu 10.18;Yo 8.44; 16.11;Ip 2.14
- h 3.9 1 Pi 1.23;1 Yo 5.18
- i 3.10 1 Yo 2.29; 4.8
- j 3.11 Yo 13.34; 15.12;1 Yo 1.5; 4.7; 4.21
- k 3.12 Stt 4.8;Ip 11.4;Yu 11
- l 3.13 Mt 5.11-12;Yo 15.18-19; 17.14;2 Ti 3.12
- m 3.14 Yo 5.24;1 Yo 2.9-11
- n 3.15 Mt 5.21-22;Ka 5.21;XKY 21.8
- o 3.16 Yo 3.16; 13.1; 15.13;Ro 5.8;Ka 1.4;Ep 5.2; 5.25;1 Ts 2.8
- p 3.17 Tu 15.7;Lu 3.11;1 Yo 4.20
- q 3.18 Ro 12.9;Ye 2.15-16;1 Pi 1.22
- r 3.19-20 Yo 18.37;1 Yo 1.8
- s 3.21 Ip 4.16; 10.22;1 Yo 2.28; 4.17
- t 3.22 Siri 34.15;Yer 29.12;Mt 7.8; 21.22;Yo 9.31; 14.13
- u 3.23 Yo 6.29; 13.34; 15.12; 15.17; 17.3;1 Ts 4.9;1 Pi 4.8;1 Yo 2.8-10
- v 3.24 Yo 14.23; 15.10; 17.21;Ro 8.9;1 Yo 4.12-13