Jon 8

1 Hako Jisas ortonom telemba Oliv orok ormu lawura. 2 Orok or lawuhu wahandaha nirsumbu mendek tempel akak indik ormu layira. Urik ma mushak orhik li ralandirsarik mashin ormu owesawera. 3 Urik mashi Moseshin sawendari ma lal nga Farisi lal nga nokove las orhik limu laharara. Nokove oso hulatolhakarik li heyehe sirin li lahara halashirik ma ondohi nindik osmu sira. 4 Uhu limu mbara, �Tisa, nokove roso hulatolhakawak ni heyewa tosira. 5 Lo Moseshi karem mbanda sir, erem unda nokoven men sunjakom amakom loho mandingormeka. Lo oso karem mbanda sira. Wa, mir mberem mi mbandu?� [a] 6 Os erem li siliri oso men li silinak or una unak li heyekmbaha li siliri sir. Unak li heyehe mashi las or mbanak kavak si na nahi, mashi orok orin li kotim ukmbahan. Hako Jisas kumbamblurik or taka lihi misambik ormu kayera.

7 Urik li sihi orin limu siliyangora. Urik Jisas or usaha ormu mbara, �Wa, ji mandingormeka. Hako halanak ma or kavakava las unda ambu oto masmas sunjakomben or laha sirin or jika.� [b] 8 Karem or mbaha or taka lihi indiyok misambik ormu kayera. 9 Urik ma amber mashi oson li misihi avok avoko masmas namtarmba namtarmbak li longlongo rala irik jikanda er nga kumasihi irakori lir. Ma ondo amber li irakoshirik Jisas nga nokove oso nom nga orok frimu sira. 10 Uhu or usasihi ormu silira, �Nyirin kotim ukwak siwa ma ondo mbeek li irakondu? Ma lar nyrin kotim ukwak sindar mo?�

11 Karem or silirik simu mbara, �Awasayi, ma amber angop irakowa lir.� Karem si mbarik ormu mbara, �An ngana. An mbeek nyirin na kotim ukwa ambu nir. Nyi ihi indik kavakavan uwa hala!� [c]

Ukruharanda misambik takahanda Jisas oria

12 Ushihi Jisas indik mashin ormu ewesawera, �Ukruharanda misambi torok takahanda anira. Ma or mashi anhin misindiyawa ma oto mbeek nirtle nirndum yaha tukuyikwa ambu ri. Or ukruharanda anhi orokop or ihi nombo os ermba ermbak linda mishi orok inda nombon heyekwa ri.� [d] 13 Karem or mbarik Farisi ondo limu mbara, �Mir haimba handambanda ma mira. Ma lar mbeek mir sawewan er nga saunjelyawa ambu ri.�

14 Urik ormu mbara, �Os an anhinjik a sawewa mashi anhi ome sir. Mberem ushiwak? Kuyanga os a rahanda mishi nga kuyanga os a ikwa mishi nga angop a heyeri sir. Karem uwosik mashi os a mbawa omendinga sira. Hako jir mbeek kuyanga os a rahanda mishi nga os a ikwa mishi nga heyenda ambu jir. [e] 15 Jir ma misambik fehe li eweheyehe man li kotim unda nombo hom os jimu anin eweheyenduwa. Hako an mbeek ma lar a eweheyenda ambu nir. [f] 16 Hako os ma lar mbele las or undan a eweheye nahi, os erem a uwa oso jivik nakwa sira. Mberem ushiwak? Mbeek nendekop man a eweheyekwa ambu nir. Avui anhi or mbashirik a rahanda nga nakrem shi mbakwa shir. [g] 17 Lo jihi karem mbanda sir, os ma frijip fri sihi mashi las nakrem fri mbawa mashi frihi ome sira. Hako ma namtar nom or mbawa, wahau. [h] 18 Uhunda hom an mbeek antonom mashin a sawenda ambu nir. Avui anhi or mbashirik a rahanda er nga mashi os a sawendan saunjelyanda ri.� [i]

19 Urik limu silira, �Avui mihi or mi mbawa mbeek or lindu?�

Urik ormu mbara, �Os anin ji heyewakop Avui anhin er nga jimu heyewa ri. Hako jir mbeek anin ji heyenda ambu osik Avui anhi nga or jimu hishanduwa.� 20 Jisas tempel akak yan li ewendari mishi orok or lihi mashin ormu owesawera. Hako orin li jikuri wolok si nari ambu osik ma lal mbeek orin tolori ambu lir. [j]

Jisas or mbari, �Jir yanga os a ikwa mishik ikwa ambu jir�

21 Urik Jisas indik ormu ewesawera, �An avak a ikwa nir. Na ishinak jir avak anin lasafukwa jir. Hako mbeek ji heyekwa ambu nir. Unak kavakava jihi er si nanak hakwa jir. Hako yanga os a ikwa mishi orok mbeek ikwa ambu jir.� [k] 22 Karem or mbarik Judama ondo limu mbara, �Mberemhi mashin or mbandu, �Jir yanga os a ikwa mishi orok ikwa ambu jir,� kas karem or mbawan? Wa orhinjik or mandingormehe hakwak mbandar?� 23 Urik ormu mbara, �Jir torok fehe jir. An metenjek fehe nir. Jir misambik fehe jir. Hako an mbeek misambik fehe ambu nir. [l] 24 Angop a sawerik ji misiri sir, kavakava jihi er si nanak hakwa jir. Ma or a mbawa ma anira,[m] karem ji hishina ambu nahi, kavakava jihi oso er si nanak hakwa jir.�

25 Karem or mbarik limu silira, �Mir lawe mir?� Urik ormu mbara, �An lawe, karem ji mbandu? Angop a sawerik ji misiri os te! 26 Mashi musha jirin a sawekwak nanda os te! Mbele mbele os ji undan angop a heyewa nir. Hako avak mbele mbele os ji unda kava jihi orok jirin a heyembakwa ambu nir. Ma or mbashirik a rahanda orhi mashi nom a sawekwa nir. Mbele mbele omek nanda tontlo oria.�

27 Jisas karem or mbarik lir fendele menderi lir, os Avui orhin or mbarin. 28 Uhu ormu mbara, �Kumak avak Ma Jikisi Wasilakahi oton miandok ji hauowehe nom avak ji heyekwa sir, ma or a mbawa ma anira. Uhu oro wolokop ji hishiyarikwa sir, an mbeek mbele las anhinjik a saweri ambu nir. Avui anhi or sauhari hom a saweri nir. [n] 29 Avui anhi or mbashirik a rari nir. Mbele mbele os or mbawa hom a unda osik or mbeek anin halanda ambu ri, wahau.� 30 Karem or mbarik ma mushak mashi os or mbari oson li misihi limu mbara, �Mashi os or mbawa ome sira.�

Judama li mbari, �Misumu nihi Abraham oria.�

31 Urik Jisas Judama ol mashi orhin misindiyakurik nari ma ondon ormu sawera, �Os mashi anhin ji misihi os si mbawa hom ji u nahi, anin tiyanda ma indingak nakwa jira. 32 Uhu mashi omendingan avak ji heyeyarikwa sir. Unak mashi oso jirik si nanak mbele kava misambik fehe mbeek jirin kuvu hom si ishintleshinak sihi siyok sikwa ambu jir, wahau. Jipjip likwa jir.� 33 Karem or mbarik limu mbara, �Misumu nihi Abraham oria. Nir nirambara orhi nira. Mas wolok sishi raha ter nga mbele las mbeek nirin kuvu hom si ishintleshiwak sihi siyok ni liwa ambu nir. Hako mberem ushiwak kuvu os nihik nawa si sorngoshinak jip ni liku, karem mi mbandu?� [o]

34 Urik ormu mbara, �Wahau, kavakava os ji unda oso kuvu hom jirin si ishintleshiwak sihi siyok sinda jir. [p] 35 Ji misi, men lerawun landa ma oto mbeek mashamak nakwa ambu ri. Mashama oto jikisi orhi indingo vai mashamak nakwa ri. 36 Os mashamahi jikisi oto kuvu os jirin ishintlehendan or sorngo nahi, jip likwa jir. 37 An angop a heyenda jir, misumu jihi Abraham oria. Hako mashi anhi kas mbeek sunguwavu jihik wanda ambu sir. Karem uwosik anin ji mandingormekwak jimu mbanduwa. 38 An Avui anhi sauhawa nombo nom a sawenda nir. Hako jir avoko jihi uhunda nombo hom unda jir.�

39-40 Urik limu mbara, �Misumu nihi Abraham oria.� Urik ormu mbara, �Jir Abrahamhi nirakop anin mandingormekwak mbawa ambu jir, os mainome Avui Wasilakahin jirin a sawewan. [q] 41 Hako jir men avoko jihi unda hom unda jir.� Urik limu mbara, �Nir mbeek nombo laka jikisi ambu nir. Avoko nihi namtar numbu Avui Wasilaka oria.� [r] 42 Urik ormu mbara, �Os Avui Wasilaka avoko jihikop anin rupshiwa jir. Mberem ushiwak? An Avui nga shi lihi na rari nir. An mbeek anhinjik a rari ambu nir, wahau. Avui mbashirik a rari nir. 43 Hako mberem ushiwa mendek mashi kas a sawewa kason ji misikwan ji halandu? Jir mbeek mashi anhin misindahik nanda ambu ojik os jimu hishanduwa. 44 Avoko jihi Laulaka orik mbele mbele os avoko jihi or uhunda hom os jimu unduwa. Mas araje wolokop sishi raha man mandingormenda ri. Mbele las omek nandan unda ambu ri. Mbele mbele os omek nanda mbeek orhik nanda ambu sir. Haimba handambanda mashi tontlo orhik nanda osik haimba handambanda mashi nom mbanda ri. [s] 45 Hako an mashi omendinga nom a sawenda nir. Hako jir mbeek mashi anhin misinda ambu jir, wahau. 46 Jir kavakavan a u, karem jimu hishindu? Os mbele kava las a u nahi, os a uwa kava oson kormbak ji mukunak a heyeka. Hako os mashi omendingan a sawe nahi, wa mberem ushiwak oson ji misikwan ji halandu? [t] 47 Avui Wasilaka jikisi orhi ondo mashi orhin misinda ola. Hako jir mbeek orhi jikisi ambu jir. Uwa osik jir mbeek mashi orhin misindiyanda ambu jir, wahau.� [u]

Abraham or na namber Jisas angop maskop nari ria

48 Judama ondo mashi oson li misihi Jisasin limu mbara, �Mir ma kava yanga Samariak fehenda mira. Wasimalengamba oloshiwak mimu mbanduwa.� [v] 49 Urik ormu mbara, �An mbeek wasimalengamba oloshiwak a mbawa ambu nir. Mbele mbele os a mbawa oso Avui anhi hi orhin a hauowenda sir. Hako jir hi anhin kavak nanda mashin os jimu mbanduwa. 50 An mbeek hi anhi lakak si nakwak a hishinda ambu nir. Hako Avui Wasilaka nom hi anhin hauowekwak hishinda ri. Orto nom kumak mbele mbele ol ma li uhundan heyembakwa ma ria. 51 Omendingak jirin amu sawenduwa, ma or mashi anhin misindiyawa ma oto mbeek hakwa ambu ri, wahau.� [w]

52 Karem or mbarik limu mbara, �Am nimu heyenduwa. Wasimalengamba olonda mira. Abraham nga profet ondo nga angop maskop hari ol te! Hako mberemhi mashi os ter mi mbanduwa, ma ol mashi mihin misindiyawa mbeek hakwa ambu lir, karem mi mbawan? 53 Abraham nga profet nga angop maskop hari ol te. Wa lawe mir? Mir Abrahamin mi tikrikwak mimu mbandu?�

54 Urik ormu mbara, �Os anhinjik hi anhin na hauowe nahi, oso jivik nawa ambu sir. Hako Avui Wasilaka jihi, karem ji mbanda ma orto ormu hi anhin hauowenduwa. 55 Hako jir mbeek orin heyenda ambu jir. An angop a heyenda ri. Karem uwosik os a mba, orin na heyenda ambu, karem a mba nahi, an men jir hom haimba handambanda ma nira. Hako an angop a heyenda orik mashi orhin amu tiyanduwa. 56 Misumu jihi Abraham os an takurin or hishihi rupshi mendendari ri. Hako am oson or heyehe sunguwavu orhi nga rupshiri ri.�

57 Karem or mbarik limu mbara, �Mir asama mihi mbeek 50-n tikriwa ambu os te! Mberem ushiwak mir angop Abrahamin mi heyenda, karem mi mbandu!�

58 Urik ormu sawera, �Omendingak jirin amu sawenduwa. Abraham or na namber, an angop maskop er a nahandari nir.�[x] [y] 59 Karem or mbarik, li sunjakom loho orin li jikurik limu ura. Hako Jisas tempel akan or halaha mayam hikriyok ormu talara.

<- Jon 7 Jon 9 ->