Banacimulamusa bo barhangiriza, naye anacibashuza, erhi: «Mushagaluke bwenêne, bene wîrhu muyishe bwinjà, mwamâhika bagumagumà». Anacibahêka omu nyumpa yâge. 2 Anacibwîra mukâge Edna, erhi: «Ewani kwo kurhi oku oyu mwâna amashusha mwene wîrhu Tobiti». 3 Edna anacibadôsa, erhi: «Muli ba ngahi bene wîrhu?». Nabo banacimushuza, mpu: «Rhuli bene Nefutali, mwa balya bahêkagwa bujà e Ninive». 4 Nyamukazi anacidôsa, erhi: «Ka muyishiyo mwene wîrhu Tobiti?» Nabo, mpu: «Nêci rhumuyishi». 5 Nyamukazi, erhi: «Kazibuhire?» Nabo, mpu: «Ho acibà anazibuhire» Tobiya anaciyûshûla, erhi: «Ci ye larha».

6 Ragweli anacihama, amuhôberanya, avugumula emirenge. 7 Anaciderha, erhi: «Osûhirwe mwâna wâni, sho ali mubusi oshingânîne! Aye! iragi libî okubona abà muhûrha omuntu walimushinganyanya n’owakazâg’ijira amarhabâle kulya!» Ashub’iciyôha omu birhugo bya Tobiya alaka bwenêne.

8 Naye mukâge Edna arhondêra okulaka; omwâli Sara naye ko nako alaka. 9 Anacigend’ibâga omwâna-buzi abayankiriramwo kwinjà. Erhi bayûsa okuyôga n’okucîkalaba n’erhi babà bakolaga bacîlambwîre balya, Tobiya anacibwîra Rafaheli, erhi: «Mwene wîrhu Azariyasi, bwîraga Ragweli ampè oyu mwâli wîrhu Sara».

10 Ragweli anaciyumva birya binwa, anacishuza nyamwâna, erhi: «Olye, onanywe, onagend’igwîshira bwinjà. Bulya ntà wundi muntu wankayanka Sara okuleka we wênene, mwene wîrhu. Nâni nienene ntagwêrhi obuhashe bw’okumuhà owundi muntu okuleka we, bulya wêne we mwene wîrhu wa hôfi. Ci konene nakubwîra okunali mwâna wâni. 11 Namâmuhà balume nda muli bene wîrhu na boshi banakaz’ifà obudufu bankanaderha mpu bamuyegera. Na buno, mwâna wâni, olye onanywe, Nyamuzinda yêne akola aho.»

Tobiya anacishuza, erhi: «Ntalye ntananywe kuhika otwe olwo lubanja lwâni». Ragweli anacimubwîra, erhi: «Namâkujira, omuhâbirwe, nka kulya binadesirwe omu citabu ca Mûsa, n’empingu erhegesire mpu omuhâbwe. Rhôla mwâli winyu oyo. Alà oku okola mushinja wâge, naye akola mwâli winyu, ye oyu wamâhâbwa loshi kurhenga ene. Nnâmahanga w’enyanya akuhè omulagi mw’obu budufu bw’ene, mwâna wâni, akubabalire, anakuhè omurhûla[a]».

12 Ragweli anacihamagala omwâli Sara, naye anaciyisha emunda ali, erhi abà amâgwârha omwâli okuboko, akuhà Tobiya anacimubwîra, erhi: «Yankaga ye nk’oku irhegeko na ecitabu ca Mûsa cinadesire, nkuhîre ye abè mukâwe. Rhôlaye, mugende bagumagumà emunda sho ali. Na Nyamuzinda w’enyanya akuhè iragi n’omurhûla!»

13 Anacihamagala nina wa nyamunyere, anacirhumiza mpu bamulêrhere akaratasi, anaciyandika kulya karatasi obuhashe bw’okuhâna omwâli bwo bunaligi buhya, kw’obwo buhashe aderha oku ayemire okumuhà ye nka mukâge omu kukulikira oburhegesi bw’irhegeko lya Mûsa. 14 Okubundi barhondêra okulya n’okunywa.

15 Ragweli anacihamagala mukâge Edna, anacimubwîra, erhi: «Mwâli wîrhu, orheganye ecindi ciyumpa c’okuhekamwo Sara», 16 Nyamukazi anacikanya, agend’irheganya encingo omu ciyumpa nka kulya ibà ananaderhaga, anacihiramwo namunyere. Naye anacirhondêra amuvugumulirakwo emirenge, buzinda ahorhola erya mirenge yâge anacimubwîra erhi: «Olangâlîre! mwâli wâni, Nyakasane w’empingu ahindule ogu mutula gwâwe okubà masîma! Ola ngalire, mwâli wâni!» Nyamukazi anacihuluka.

<- Tobiti 6Tobiti 8 ->