Tobiti anacicîfira n’omurhûla erhi abà akola agwêrhe myâka igana n’ikumi n’ibirhi. Anacibishwa n’obukuze aha Ninive. 2 Amango ahûrhaga amasù ali agwêrhe myâka makumi gali ndarhu n’ibirhi, erhi ashub’irhangira okubona, ka ndi alama omu bugale, anakâjira amarhabâle manji. Anayûshûla okukâkuza Nyamuzinda n’ebirhangâzo bya Nnâmahanga. 3 Erhi akola afà, anacihamagala omugala Tobiya, anacimukomêreza ebi binwa, erhi: Mwâna wâni, rhôla abâna bâwe, 4 olibirhire olunda lw’e Mediya. Bulya nyêmêra akanwa ka Nyamuzinda, kanwa kaderhagwa na Nahumu: byoshi byayîsh’ihongokera kuli Asûru na kuli Ninive, ebi abalêbi b’Israheli boshi bàdesire mpu byarhumagwa na Nyamuzinda byoshi byahongokera eyo munda, omu binwa byâbo ntà ciru n’eciguma carhalukirwa, na ngasi ciguma cayisha omu mango gâco. E Mediya abantu banafuma okwo kulusha omu Sîriya n’omu Babiloni. Na kandi nyêmîre, namanyire bwinjà oku ebi Nyamuzinda adesire byanayisha binabè; na ntà cinwa câge cankabulakuyôrha. Bene wîrhu bayûbasire omu cihugo c’Israheli boshi bahêkwa bujà bashandabanywe kuli n’eco cihugo cinjà: Ecihugo c’Israheli coshi cashuba bwerûle, Samâriya na Yeruzalemu byâbà bwerûle, aka-Nyamuzinda kashabulwa, kanarhang’iyôcibwa.

5 Buzinda Nyamuzinda anâcibafè lukogo, Nyamuzinda anâcibagalule omwo cihugo c’Israheli. Bashub’iyûbaka aka-Nyamuzinda, ci konene arhaciri nka aka-Nyamuzinda k’embere, okwo kuhika galya mango ganalaliragwa gahike. Enyuma ly’okwo, boshi banarhenga emunda bali bujà, banashub’iyûbaka Yeruzalemu w’irenge n’aka-Nyamuzinda kanashub’iyûbakwa nka kulya abalêbi b’Israheli banaderhaga.

6 N’amashanja goshi g’igulu, goshi oku ganali, ganayagalukira Nnâmahanga, ganamurhinye bwinjà, goshi ganaleka birya byâbo by’obukurungu ebya rhumaga bajà omu by’obunywesi, na kandi banakuza okushingânîne Nyamuzinda w’ensiku n’amango. 7 Bene Israheli banabè bacihali ago mango, boshi bashub’iyîbuka Nyamuzinda okunali, boshi bashûbûzanya, bajè aha Yeruzalemu, bayûbake n’omurhûla omw’ishwa ly’Abrahamu, banalihâbwe. Bashagaluka abasîma Nyamuzinda okunali, n’abajira amabî n’ebirhashinganini bahirigirha omw’igulu lyoshi.

8 Na buno, bâna bâni, amarhegeko mbahire g’aga: Mukâkolera Nyamuzinda okunali, munakâjira okumusimîsize. N’oku bâna binyu mukâbakomêreza okushimba ebishingânîne, okukâjira amarhabâle, bakâkengêra Nyamuzinda banakâkuza izîno lyâge ngasi mango okunali n’emisî yâbo yoshi. 9 Na buno, mwâna wâni, rhenga e Ninive, orhacibêraga eno munda. 10 Mango wanabishe nyoko hôfi nâni, orhacilegemaga muli eci cihugo. Bulya mbwîne oku obulenzi bunji bulimwo, n’obunywesi buzira kubona nshonyi kuli byo. Olole, mwâna wâni, ebi Nadabu ajirîre Ahikari wamuleraga. Ka barhamubishaga anacizîne? Nyamuzinda amubonêsa nshonyi embere z’abantu boshi. Ahikari ajà omu bulangashane na Nadabu ajà omu ndunduli y’ensiku n’amango, bulya akazâg’ilonza okuyîrha Ahikari. Omu kukâjira amarhabâle, kwarhuma Ahikari afuma omurhego gw’olufù Nadabu ali amujirîre, na Nadabu abà ye okumba omu murhego, gwanamukubunguza. 11 Mubonerage aho, bâna bâni, ebi amarhabâle gajira n’ebi obulenzi bujira: kuyîrha buyîrha. Loli oku namâcîfira. Banacimugwishiza oku ncingo yâge, anacifà. Abishwa n’irenge bwenêne.

12 Erhi nina afà, Tobiya amubisha aha burhambi bw’îshe. Anacigenda na mukâge, bajà e Mediya, agend’iyûbaka aha Ekbatani, aha mw’ishazâla Ragweli. 13 Abajirira bwinjà omu bushosi bwâbo na buzinda ababisha aha Ekbatani omu Mediya. Tobiya ayîma omu bya Ragweli n’eby’îshe Tobiti. 14 Afà erhi agwêrhe myâka igana n’ikumi na nda, afà n’irenge. 15 Embere afè, ayumva anabona oku Ninive ashandwa, abona n’abadwîrhwe bujà e Mediya na Oyarkari, mwâmi w’e Mediya; anacikuza Nyamuzinda kuli ebyo byoshi ajirîre bene Ninive n’Asîriya. Embere afè, acîshinga erhi Ninive orhuma, akuza Nyakasane Nyamuzinda w’emyâka n’emyâka. Amen!

<- Tobiti 13