1 Omu nsiku makumi abiri n’ini z’ogwo mwêzi gwonêne, bene Israheli banacibugânana mpu bacîbabaze, bayambala sunzu, banacitulira oluvù omu irhwe[a]. 2 Bene Israheli boshi banaciciyêgûla oku bandi b’embuga, banacihûna bwimanga obwonjo oku byâha byâbo n’oku mabî g’ababusi bâbo. 3 Oku ngasi muguma anali halya ayîmanzire, banacisoma omu citabu c’oburhegesi bwa Nyakasane wâbo Nyamuzinda, kasanzi kaguma k’omulegerege. Akandi kasanzi bahûnamwo obwonjo oku byâha byâbo n’akandi baharâmya Nyamubâho Nyamuzinda wâbo. 4 Yozwè, Buni, Kadmiyeli, Shebanya, Bahuni, Sherebiya, Bâni na Kenani, erhi babà bamasôkera ahantu hajire enyanya ho hali h’Abaleviti boshi, banacirhangira bayâmira emunda Nyakasane Nyamuzinda wâbo ali n’izù linene. 5 Nabo[b] Abaleviti: Yozwè, Kadmiyeli, Bâni, Hashabneya, Sherebiya, Hodiya, Shebanya, boshi na Petahya, banaciderha, mpu: «Yîmuki, mukuze Nyamubâho Nyamuzinda winyu».

Okuzibwe emyâka n’emyâka, Nyakasane Nyamuzinda wîrhu! Likuzibwe Izîno ly’irenge lyâwe, erilushire ngasi bukuze na ngasi irenge. 6 Wêne Yâgirwa Nyakasane, we walemaga empingu, amalunga g’amalunga, na ngasi binabayo byoshi, n’igulu na ngasi binabamwo byoshi, we walemaga enyanja na ngasi ebi zijira byoshi, wêne w’ehà ebyo byoshi obuzîne n’ebiremwa by’empingu binakukuze. 7 Wêne Yâgirwa Nyakasane, we Nyamuzinda, wêne wacîshogaga Abramu, wanacimukûla omu cihugo ca Uru e Kalideya, wêne wamuyîrikaga izîno lya Abrahamu. 8 Wabwîne oku omurhima gwâge gubà gwa bushinganyanya embere zâwe, wanacilagâna mweshi naye oku wahà iburha lyâge ecihugo c’Abanya-Kanâni, Abahititi, Abamoreni, Abaperiziti, Abayebuseni, Abagirigashiti, wanalanzire ako kanwa kâwe bulya ôbà mushinganyanya. 9 Wabwîne kurhi ababusi bîrhu balibukaga omu Mîsiri, wanayumva omulenge gwâbo oku Nyanja y’Amashekesheke. 10 Wajizire ebimanyîso n’ebirhangâzo embere za Faraoni mwâmi w’e Mîsiri, abambali n’olubanga lw’ecihugo câge coshi, bulya wali’imanyire oku wal’ijizire obwinjà embere z’ababusi bîrhu, n’izîno lyâwe lyanacija irenge nk’oku binali oku lw’ene. 11 Wahahanywîre enyanja embere zâbo, banaciyikira eyo nyanja n’amagulu burhajoma. Ci wadubindika balya bashombanyi bali babashimbire omu nyanja nka kula banadubindika ibuye emudubwi. 12 Mûshi, wajà wabagendana n’enkingi y’ecitù na budufu n’enkingi y’omuliro mpu lyo obamolekera n’okubalangula enjira bashimba. 13 Wabunguluka oku ntondo ya Sînayi, wabashambâza kurhenga empingu, wanacibahà Amarhegeko gashingânîne, marhegeko g’okunali, marhegeko minjà bwenêne. 14 Wabamanyîsa olusiku lukulu lwâwe lwa Sabato, wanacibahà Amarhegeko omu kanwa k’omurhumisi wâwe Mûsa, njira, n’oburhegesi bw’ekanwa kâwe. 15 Kurhenga empingu, wanacibahà omugati gw’okufumya ishali lyâbo, gwahonaga empingu, wakûla n’amîshi omu ibuye mpu batwemwo enyôrha yâbo. Wanacibabwîra mpu bajage muli cirya cihugo wahigaga mpu wabaho. 16 Ci ababusi bîrhu bôhe, baluza obucîbone, baniola igosi, barhashimbaga amarhegeko gâwe. 17 Balahira okuyumva, barhanacikengeraga birya birhangâzo byâwe, birya wajiraga oku bunguke bwâbo. Baniola ecikanyi c’igosi na muli obwo bugoma bwâbo bacîfinja okushubira e Mîsiri omu bujà bwâbo. Cikwône oli Nyamuzinda obabalira duba, Nyamuzinda mutûdu na wa bwonjo, mulembu omu kukunira na mugale omu minjà, na ntyo orhabalekereraga. 18 Ciru n’amango bacîjiriraga akanina k’amasholo banakâderha, mpu: «Alà oyu, ye kola Nyamuzinda wâwe wakukûlaga e Mîsiri,» banahemula amahêma gâbo n’amabî manji.

19 Woyo, omu lukogo lunji, orhabajandikaga omu irungu n’erya nkingi y’ecitù orhayiyegûlaga kulibo, yakaz’iyôrha yabalongôlana omulegerege gwo shi. Ciru n’erya nkingi y’omuliro yajâga yabamolekera budufu, kuguma n’omu njira bali bagwâsirwe okushimba. 20 Wabahire omûka gwâwe mpu lyo bahinduka bîrhonzi, orhalahiraga mpu amâna gwâwe garhaje omu kanwa kâbo, wanacibahà amîshi oku nyôrha yâbo. 21 Myâka makumi anni goshi erhi wêne oshîbirira okubalanga omu irungu, barhanabuliragwa n’akantu ciru n’akaguma, emyambalo yâbo erhashosihalaga, n’amagulu gâbo garhahêmaga. 22 Wabagabire amâmi n’amashwa, banaciyîma omu cihugo ca Sihoni, omu cihugo ca mwâmi Heshiboni, omu cihugo ca mwâmi Bashani. 23 Waluzize abâna bâbo nka nyenyêzi z’emalunga, wanacibahêka muli cirya cihugo wabwîraga ababusi bâbo mpu banacijemwo, baciyîmemwo. 24 Abâna banaciyisha bakola bal’iyîma muli eco cihugo, embere zâbo wanacifunyâza abayûbakaga muli eco cihugo, bo: banya-Kanâni. Wanacibahira omu maboko gâbo, kuguma n’abâmi n’olubaga mpu bône babajire oku banalonzize. 25 Bayanka ebishagala byàli bihamike bwinjà n’ebihugo biyera, bayanka e nyumpa zàli ziyujwîre bintu bya ngasi lubero, amaliba gali erhi gahumbirwe, amashwa g’emizâbîbu, ag’emibô, emizêti, n’emirhi y’emirehe ya ngasi lubero. Bâlya. bayigurha, batwera bwenêne, balama ntyo omu bugale, oku bwinjà bwâwe bunji.

26 Ci kandi babà bagoma banacihindula kuli we, oburhegesi bwâwe, babuhira enyuma ly’omugongo gwâbo, bayîrha abalêbi bâwe bakazâg’imanyîsabo obuhamîrizi bwâwe mpu lyo babahêka emunda oli, banajira agandi mabî manji 27 Okubundi wanacibahâna omu maboko g’abashombanyi bâbo. Ci amango balakaga, bayâmira emunda oli, emwâwe empingu, omu bwonjo bwâwe bunji wanacibahà abacunguzi babalîkûzagya omu maboko g’abo bashombanyi bâbo. 28 Erhi babà bamaluhûka, kandi bashubira omu mabî gâbo embere zâbo; nâwe wanacibaleka omu maboko g’abashombanyi bâbo, babarhegeka bwenêne. Ci kandi bashub’ikâlakira emunda oli na nâwe wayumva izù lyâbo kurhenga empingu, n’omu bwonjo bwâwe, wabalikûza kanji kanji. 29 Ntâko orhajiraga mpu lyo bashub’igaluka emunda oli, cikwône oku buhwinja bwâbo barhayumvagya amarhegeko gâwe, bakabulira amahano gâwe, nobwo go gahâna obuzîne kuli ngasi yêshi onagashimba, bakaz’icigûkumula ebirhugo, baniola ecikanyi c’igosi, balahira okuyumva. 30 Wabalembire myâka erhali minyi, wabarhonda n’omûka gwâwe, n’abalêbi bâwe barhanayumvagya. Lêro wanacibahâna oku mashanja ganali omu cihugo. 31 Ci oku bwonjo bwâwe orhabalekêreraga, orhabaherêrekezagya, bulya we Nyamuzinda w’olukogo, munyabwonjo bunji.

32 Na bunôla mâshi Yâgirwa Nyakasane Nyamuzinda wîrhu, we Nyamuzinda mukulu, Ogala-byoshi na wa kujugumya, we olanga endagâno yâwe bwinjà, orhalolaga ebintu bya busha busha, aga malumwa goshi garhujirekwo, rhwenene, abâmi bîrhu, abarhambo bîrhu, abadâhwa bîrhu, abalêbi bîrhu, ababusi bîrhu, n’olubaga lwâwe lwoshi kurhenga oku bâmi b’e Sîriya kuhika mwa zino nsiku. 33 Wabîre mushinganyanya omu ngasi byoshi byarhuyishire bulya wanarhujirire okushingânîne, cikwône rhwono rhubà bantu babî. 34 Abâmi bîrhu, abakulu bîrhu, abadâhwa bîrhu, n’ababusi bîrhu, barhashimbaga oburhegesi bwâwe, barhayumvagya amarhegeko gâwe, oli ebindi by’obuhamîrizi wakazâg’ijira kulibo. 35 Omu bwâmi bwâbo, omu karhî k’aminjà manji wakazâg’ibajirira, muli cirya cihugo cigali na cigale wabahâga, barhakukoleraga, barhalekaga emicô yâbo mibî. 36 Ci, alaga oku rhwoyu rhukola bajà ene! Lolaga oku rhwabêrire bajà muli cirya cihugo wahâga ababusi bîrhu mpu bakalya mulico, na ngasi bindi binjà byamwo. 37 Cikolaga ciyêrera abâmi warhuhâga mpu bakarhurhegeka erhi byâha bîrhu birhuma. Bakolaga bajira emibiri yîrhu oku banalonzize, n’ebintu bîrhu kwo na kwo. Rhuli omu malibuko manji bwenêne.

<- Nehemiya 8Nehemiya 10 ->