1 Lolagi, olusiku luyîruka, luyakirîre nka muliro. Abashombanyi na banya nkola-maligo boshi, zirhabalekere muzî nîsi erhi ishami[a]. 2 Ci kuli mwe, murhînya izîno lyâni, izûba ly’obushinganyanya lyâbasha, limmulerhere obucire. Mwâyishijà mwâhama n’omwîshingo nka manina ga mitwirà. 3 Olusiku nâyêrekana obuhashe bwâni, mwâlabarhanya ababî, bâshuba nka katulo omu magulu ginyu, kwo ndesire ntyo, nie Nyakasane w’Emirhwe.
Irenge ly’abemêzi
4 Mukengêre ebi mwambali wâni Mûsa àyigîrizize, mushimbe munabîkirire amarhegeko n’amahano namuhâga oku ntondo ya Horebu, nti abwîre olubaga lw’Israheli lwoshi. 5 Loli, nâmmurhumira omulêbi Eliya[b], embere olusiku lwa Nyakasane luyishe, lusiku lw’enkwi n’amîshi, lwa kujugumya. 6 Ye wâhindula emirhima y’ababusi eyêrekere abâna bâbo, n’ey’abâna eyêrekere ababusi bâbo[c], lyo ndekiyishiherêrekeza ecihugo cinyu.[d]
<- Malakiya 3
- a 4, 1 Lolà Amo 1, 4; 7, 10; Sof 1, 18; Mat 3, 10; 1 Kor 3, 13. Ho ecigabi ca 4 ca Malakiya cirhangirire aha omu WLC, n’obwo omu BHS ciciri ca 3, mulongo 19
- b 4, 5 Abayahudi bakagilinga oku omulêbi Eliya agaluka n’oku amango g’okuyisha kwa Masiha kuli hôfi. Mwâmi Yezu aderha oku mîra Eliya ayishaga: Ye Yowane Mubatiza, lolà Mat 17, 10-13.
- c 4, 6 Lolà Luk 1, 17; Mat 17, 10-13; Ywn 1, 15.
- d 4, 6 WLC Malakiya 4.1-6 byo binwa biri omu BHS Malakiya 3, 19-24.