1 Nyakasane anacibwîra Yozwè, erhi: «Ogendibwîra bene Israheli ebi binwa erhi: 2 “Mucîshogerage mwêne nka kulya nanababwîraga omu kanwa ka Mûsa, engo z’okuyâkirwamwo”[a]. 3 “Anahashiyakiramwo ngasi yêshi wankayîrha omuntu omu kuhabuka[b], arhamuyirhe n’oluhinzo, ezo ngo zanamukwanana mukaziyâkiramwo omwihôzi w’omukò”».

4 Olya wayîrhaga omuntu anahashiyâkira omu lugo luguma muli ezo ngo; anayisha ayimange aha muhango gw’olugo, anashambâlira abashamuka[c] ba muli olwo lugo. Nabo banamuyankirira omu lugo lwâbo, banamuhè na ahantu ayûbaka lyo abêra nabo. 5 Erhi omwihôzi w’omukò akayisha amukulikire, barhankamuhà olya nyakuyîrha, bulya omu kurhamanya anayîrhiraga omulungu wâge, bulya arhali amubikire mujina muci oli injo oli lishinjo.

6 Olya wayîrhaga omuntu anabêra muli olwo lugo kuhika embere z’embugânano, atwirwe olubanja, anabêramwo kuhika aha kufà k’omudâhwa oliho muli ago mango. Enyuma zaho olya nyakuyîrha anashubicîgalukira[d] omu lugo lwâge, omu nyumpa yâge eri mulya lugo arhengagamwo erhi ayâka.

7 Banacìcîshoga[e] Kedesi omu Galileya, omu ntondo ya Nefutali; Sikemi omu ntondo ya Efrayimu na Kiryata-Arba, yerigi Hebroni, omu ntondo ya Yûda. 8 Ebwa lindi ishiriza lya Yordani, olunda lw’ebuzûka­ zûba lwa Yeriko, bayêrekana Beseri, oli omu irungu, omu kabanda ka bene Rubeni; Ramoti omu Galadi emw’omulala gwa Gadi, na Golani omu Bashani emw’omulala gwa Menashè.

9 Ezo zo ngo zacishozirwe[f] na bene Israheli n’omuntu w’ecigolo oyûbasire emwâbo, mpu lyo ngasi muntu wankayîrha owâbo arhanali kwa luhizo, ahashe okuyâkiramwo, arhankanaciyîrhwa n’okuboko kw’omwihôzi w’omukò, kuhika arhangitwîrwa olubanja n’embugânano y’olubaga.

<- Yozwè 19Yozwè 21 ->