1 Ecigole canaciyesherwa bene Yozefu[a]. Olubibi lw’ishwa lyâbo lwarhangira olunda lw’e buzûka-zûba oku Yordani aha Yeriko, oku mîshi ga Yeriko; lwanacisôka kurhenga e Yeriko kujà oku ntondo, omw’irungu lya Beteli. 2 Lwarhenga aha Beteli-Luzi[b] lwanacigera oku lubibi lwa bene Arki aha Ataroti. 3 Kandi lwanacibungulukira ebwa buzika-zûba, ebwa lubibi lw’Abayefaleti, kuhika oku lubibi lwa Abayefaleti, kuhika oku lubibi lwa Beti­ Horoni[c] oli idako na kuhika aha Gezeri, lwajicîhônda omu nyanja: 4 Gwo mwanya bene Yozefu bahîrwe ogwo, Menashè n’Efrayimu.

5 Alaga olubibi lwa bene Efrayimu, nk’oku amûko gâbo ganali. Olubibi lw’ecihugo câbo lwàli ntya: ebuzûka-zûba, Ataroti w’Adari, kuhika aha Beti­ Horoni w’enyanya. 6 Olwo lubibi lwakazâgihika ebwa buzika-zûba kujà e Mikimetati, lwazonga ebwa Tanati-Silo[d], lwanacigera embere zâge ebuzûka-zûba bwa Yanowah. 7 Kandi kurhenga e Yanowah ha, lwabungulukira e Atoroti n’e Naara, lwahika kuli Yeriko, kandi lwacihonda omu Yordani. 8 Kurhenga e Tapuaha, olwo lubibi lwajà olunda lw’ebuzika-zûba, oku mugezi gwa Kana, lwagendicîhonda omu nyanja. Kwo gwàli ntyo omwanya gw’omulala gwa bene Efrayimu nk’oku amûko gâbo ganali. 9 Bene Efrayimu bashuhihâbwa ezindi ngo ziberulukine omu cihugo ca bene Menashè, ezo ngo zàli zigwêrhe n’ebishagala byâzo. 10 Barhalibirhagakwo[e] abanya-Kanâni bayûbakaga e Gezeri. Abanya-Kanâni bayûbakaga ntyo haguma na bene Efrayimu, ci konene nka bashizi ba kukazibakolera.

<- Yozwè 15Yozwè 17 ->