1 Bene Israheli bayûbakaga omu Yudeya banayumva kurhi Holoferno omurhambo mukulu w’abalwî ba mwâmi Nabukondonozori mwâmi w’e Sîriya, ahenyeraga agandi mashanja na kurhi ahenangulaga empêro zâbo zoshi n’okuzihagula. 2 Bamuyôboha bwenêne n’omungo gwa Yeruzalemu kuguma n’aka-Nyamuzinda wâbo gwabagwârha. 3 Bulya lyaciri duba barhengaga ebwa kululizibwa na harhali hacigera nsiku olubaga lw’e Buyahudi loshi lwàli lwamâshûbûzanya na ngasi birugu, oluhêrero n’aka-Nyamuzinda ebyo byoshi oku byàli byamasherezibwa, bashub’ibihà omugisho.

4 Banacirhuma entumwa omu cishagala ca Samâriya coshi, eyindi e Kona, e Beteroni, e Belmaini, e Yeriko kuguma na Koba, e Asora n’omu kabanda ka Salemi. 5 Balanga ngasi busongerwe bw’entondo yanali ejîre enyanya kulusha, ebishagala byâbo babizonga lugurhu, babilunda biryo byankanabalanga ago mango g’entambala, kulya kubà erhi bacishuba bahaka emyâka. 6 Yoyakimu ye wali mudâhwa mukulu muli ago mango aha Yeruzalemu anaciyandikira abantu b’e Betuli n’abà e Betomestaimi eyegîre Esdreloni ah’ishiriza ly’akabanda kayegîre Dotayimi oku kubahûna mpu balange ngasi kabokwè ka ntondo koshi 7 bulya eri njira ya kujà e Buyahudi; kandi kwanali kulembu okulanga abantu balek’igera bulya hali hantu hafunda ha kugera bantu babirhi bônene caligumiza. 8 Bene Israheli banacijira okwôla amarhegeko g’omudâhwa Yoyakimu n’Ihano likulu lya olubaga lwa bene Israheli batwâga, amango bali ekagombe aha Yeruzalemu.

9 Bene Israheli boshi balaka balakûla embere za Nyamuzinda, bacîbabaza bwenêne. 10 Abalume, bakâbo, abâna bâbo, ebintu byâbo, ngasi bambali bâbo b’e bigolo, abalimya, n’abajà bagulagwa ensaranga, abo boshi bahira sunzu ecibunu omu kucîbabaza. 11 Abalume boshi ba bene Israheli, abakazi, abâna banabâga aha Yeruzalemu banacikafukamiriza embere z’aka-Nyamuzinda, babumba amarhwe gâbo luvù, bakacigalanjula n’olya sunzu wâbo embere za Nyamuzinda. 12 Oluhêrero nalo balubwîka sunzu; balaka bwenêne emunda Nyamuzinda wa Israheli ali boshi kuguma mpu abâna bâbo balek’ibà bajà, bakâbo mpira, mpu ebishagala kashambala kâbo bilek’ishambûlwa, mpu oluhêrero lwâbo lulek’ihemulwa n’okunenaguzibwa n’agandi mashanja.

13 Nnâmahanga ayumva omusengero gwâbo anabona kurhi balumirwe. Olubaga lwacîshalisa nsiku nyinji la omu Buyahudi n’e Yeruzalemu embere z’Oluhêrero lwa Nnâmahanga Ogala-byoshi. 14 Yoyakimu yerigi mudâhwa mukulu n’abandi badâhwa banakazâg’ikola embere za Nnâmahanga n’abandi boshi banali omu mikolo ya Nnâmahanga oku sunzu abâli ecibunu erhi banadwîrhe bahêra enterekêro yâbo ngasi lusiku, emisengero n’entûlo abantu bônene balêrha omu bulonza bwâbo. 15 Ensirha zâbo zàli nshîge oluvù, banakaz’ilakira Nyamuzinda n’emisî yâbo yoshi mpu alole bwinjà enyumpa ya Israheli yoshi.

<- Yuditi 3Yuditi 5 ->