1 Erhi abashombanyi ba Yûda na Benyamini bayumva oku balya bantu barhengaga emunda bali balulizîbwe bakola badwîrhe bayûbaka aka­ Nyamuzinda ka Nyamubâho w’Israheli, 2 banaciyisha emunda Zorobabeli ali na Yozwè[a] n’abarhambo ba ngasi milala, banacibabwîra mpu: Muleke rhuyûbake haguma rhweshi ako ka-Nyamuzinda, bulya nîrhu anali oyo Nyamuzinda winyu ye rhunaharâmya kurhenga amango g'Asaradoni, mwâmi w’e Sîriya, ye wa rhuyinamuliraga eno munda. 3 Ci konene Zorobabeli, na Yozwè n’abandi bashamuka b’emilala y’Abayahudi banacibashuza, mpu: Kurhashingânîni murharhabâle okuyûbaka enyumpa ya Nyamuzinda. Guli mukolo gwîrhu rhwêne gw’okuyûbakira Nyamubâho Nyamuzinda w’Israheli nk’oku mwâmi Sirusi w’e Persi anarhurhegekaga. 4 Lêro olwo lubaga lwanacijaho lwarhondêra okubulîsa olubaga lw’Abayahudi omurhima gw’okuyûbaka. 5 Banacihongera abahanuzi babî mpu bakahà olubaga amahano mabî lyo balek’iyûbaka. Banacijira ntyo omu mango mwâmi Sirusi w’e Persi anali oku ntebe goshi kuhika omu kuyîma kwa Dariusi naye mwâmi w’e Persi.

6 N’amango Zerzesi ali akola mwâmi, banayandika amaruba g’okushobeka abantu b’e Buyahudi n’ab’e Yeruzalemu. 7 N’omu mango g’Artazerzesi, Bishilamu, Mitredati, Tabeeli n’abâbo boshi banaciyandikira Artazerzesi mwâmi w’e Persi amaruba omu Ciharamiya. 8 Omurhambo Rehumu n’omwandisi Shimeshayi banaciyandikira Artazerzesi amaruba gali gadesire ntya oku biyêrekîre Yeruzalemu. 9 Mpu rhwono: Rehumu, ye oligi murhambo, na Shimeshayi, ye mwandisi n’abâbo; abacîranuzi, abajà-bugo n’abakozi; ab’e Huruki, ab’e Babiloni, ab’e Suza, bo baligi b’e Elamu, 10 kuguma n’agandi mashanja ag’olya muntu mukulu bwenêne n’owajir’irenge, ye Asurbanipali, yêne ahêkaga anagend’ibayûbakira omu cishagala ca Samâriya n’omu bindi bishagala by’ishiriza lya Efrata.

11 Alaga ago maruba barhumiraga mwâmi Artazerzesi mpu: «Bambali bâwe abayûbaka olundi lunda lw’Olwîshi lwa Efrata. 12 Mwâmi amanye oku balya Buyahudi bayinamukaga emwâwe, barhurhinzirekwo hano Yeruzalemu; bakola badwîrhe bayûbaka lulya lugo lubà cikanyi cirhagomba, lukaliha bwenêne; bakola badwîrhe bayîmanza enkûta n’okuzibuhya buhyâhya eciriba câlo. 13 Mwâmi ayôrhage amanyire oku erhi olwo lugo lwankanayûbakwa, n’enkûta zâlwo erhi zankanashub’iyîmanzibwa, abo bantu barhakacivurha, nîsi erhi okurhûla mwâmi n’okuhongera obuhashe bw’okugera, n’okwo guli muhona munene oku bwâmi. 14 Bulya rhwono, nk’oku rhulya omunyu omu bwâmi, kurharhushingânîni okubona mwâmi agayaguzibwa, rhwamarhuma emwa mwâmi emyanzi y’okumumanyisa okwo. 15 Bagend’ilongereza omu bitabu by’okukengêza bya basho wanamanya oku olwo lugo lubà cikanyi cirhagomba, lwalibuzize abâmi n’abaluzi; wabona oku kurhenga mîra erhi kugoma banagoma. 16 Rhumanyisize mwâmi oku erhi olwo lugo lwankanashub’iyûbakwa n’erhi enkûta zâlwo zankanashub’iyîmanzibwa, kuli okwo konene orhankacibà n’akantu nk’olundi lunda lw’olwîshi lwa Efrata.»

17 Mwâmi agalula eri ishuzo: emw’omurhambo Rehumu, n’emwa Shimeshayi owali mwandisi n’emw’abâbo boshi banabà e Samâriya n’omu bindi bihugo binabà olundi lunda lwa Efrata, erhi: murhûla! 18 Amaruba mwarhurhumiraga gasomirwe bwinjà bwinjà, ganayumvikana embere zîrhu. 19 Nahânyire irhegeko, banajà bafûkula, banashanga oku nêci kurhenga mîra olwo lugo lurhahusa kugomera abâmi, n’oku banajamwo enshumishumi n’okucîhindula dubaduba. 20 Aha Yeruzalemu hakola hayimire abâmi b’obuhashe bunji, barhegeka ecihugo c’olundi lunda lwa Efrata, banakabavurhira, okurharhûla n’okuhonga obuhashe bw’okugera. 21 Kuli okwo muhane irhegeko ly’okuyimanza emikolo y’abo bantu, lyo olwo lugo lulek’ishub’iyûbakwa, kuhika amango nakurhegeka niene. 22 Mumanye mwankanabula bushîbirira okwo, ly’obubî bulek’iyûshûka oku muhona gwa mwâmi.

23 Okubundi erhi ago maruba ga mwâmi Artazerzesi gasomwa embere za Rehumu, Shimeshayi ye wali mwandisi, boshi haguma n’abâbo balîkûlira duba duba e Yeruzalemu emw’Abayahudi, babayimangiza emikolo n’obukali n’emisî. 24 Okubundi obwo bayîmanza okwo kukola oku ka-Nyamuzinda aha Yeru zalemu; kwanaciyîmanzibwa ntyo myâka ibirhi kurhenga okuyîma kwa Dariusi mwâmi w’e Persi.

<- Ezra 3Ezra 5 ->