1 Omu mwâka gwa kasharhu gw’okuyîma kwa Sirusi mwâmi w’e Persi, ecinwa canacifululirwa Daniyeli, owakazâgiderhwa Baltazari, ecôla ci­nwa ciri c’okuli cinahimire ebizibu. Anaciyumva ecôla cinwa anacimanya e­ byàli muli ecôla cinwa.

2 Muli agôla mango, niono Daniyeli nanacijà omu mishîbo ya nsiku za migobe isharhu. 3 Ntaderhaga nti nakalya ebiryo binjinjà; enyama erhanjaga ekanwa n’idivayi, ntanaderhaga nti nankacigezakwo amavurha kuhika ezôla nsiku z’emigobe isharhu zalinda zihwa. 4 Omu nsiku makumi abirhi n’ini z’o­mwêzi gwa burhanzi, nalinyimanzire oku burhambi bw’olwîshi lunene luderhwa Tigri. 5 Nanaciyinamula amasù nakaz’ilolêreza, hanaciyisha omuntu oya­mbîrhe ecishûli c’ecitâni anacikobesire n’omukaba gw’amasholo g’e Yufazi. 6 Omubiri gwâge gwàli guyôsire nk’ibuye ly’enziga n’obusù bwâge bwakazimo­leka nka mulinga gucesîbwe, n’olubî lw’ebinwa byâge lwayôrha nka lubî lwa bantu mwandu.

7 Niono Daniyeli niene nabonekîrwe, ci abantu rhwàli rhweshi barhabonekeragwa, ci bàrhungwa n’ecôbà, bacilibirhira, bayâka, bajicîfulika. 8 Nasigala niene, nakazilolêreza olyâla wambonekeraga, nayumva emisî ya­ mpwamwo, obusù bwâni bwatulûla, bwabîha bwenêne na ntà misî nacigwêrhe.

9 Nanaciyumva izù ly’ebinwa byâge, n’erhi nyumva eryo izù ly’ebinwa byâge, nakumba n’entemu, nayûbikira ak’amalanga oku idaho. 10 Nabona okuboko kwampumakwo, kwanacinfukamya oku nandwîrhe nageramwo omusisi n’ebigasha by’amaboko gâni nâbà byo ngwârhirizamwo. 11 Oku bundi anacimbwîra erhi: «Daniyeli, muntu orhonyire bwenêne, oyumve ebinwa nakubwîra onayimange bwinjà, bulya ntumirwe buno emunda oli.» Erhi ayûs’i­mbwîra ebyôla binwa, nayimanga erhi nancidwîrhe nageramwo omusisi. 12 Anacimbwîra, erhi: «Orhayôbohe, wâni Daniyeli, bulya kurhenga galya mango warhangiraga okucîshalisa embere za Nyamuzinda mpu ly’ôbà n’obukengêre, ebinwa byâwe byayumvikîne, nâni nyishire erhi ebyôla binwa byâwe birhuma. 13 “Ci omukulu w’obwâmi bw’Abapersi ankozizekwo entambala nsiku makumi abirhi na luguma zoshi ci kwône Mikaheli[a], muguma w’omu barhambo bakulu ayish’intabâla, na ntyo namulekera eyo ntambala y’abâmi b’e Persi”. 14 “Nyishirage okukumanyîsa ebyâyishira olubaga lwâwe omu nsiku zâyisha, kulya kubà kuciri kubonekerwa okûla wabonekerwa bunôla.”»

15 Amango akazâgimbwîra ebyôla binwa, nakaz’ilola oku idaho nanaciyôrhera buduma. 16 Lolà oku oli nka mwene omuntu anacimpumakwo oku milomo, nanacibumbûla akanwa narhangira okuderha; nanacibwîra olya wali oyîmanzire embere zâni nti: «Yâgirwa Nnawîrhu, muli okûla kubonekerwa nieshi nyunjwîre malumwa ntà misî ncigwêrhe. 17 Kurhigi niono mwamhali w’oyûla nnawîrhu, nankahash’igidesa oyûla nnawîrhu? Muli ganôla mango ntà hya misî hicindimwo ciru n’ehitya, na ciru ntà hya mûka ncigwêrhe.» 18 Oku bundi olya wali oshushire omuntu, ashub’impumakwo anacimpa emisî. 19 Anacimbwîra erhi: «Orhayôbohe wâni muntu orhonyire bwenêne, omurhûla gubè haguma nâwe! Komera! komera!» Agôla mango akazâg’indesa, nashubibona emisî, nanaciderha nti: «Nnawîrhu aderhage bulya wamampa emisî!.»

20 Anacimbwîra, erhi: «K’omanyire bici birhumire nyisha emunda oli? Bu­nôla nkola nashub’igend’ilwîsa omukulu w’Abapersi; na hanôla nyûsa, lolà oku omwâmi w’e Bugereki ânayisha. 21 “Cikwône nakubwîririra ebiyandisirwe omu citabu c’okunali; ntâye wayish’intabâlakwo abôla boshi okuleka Mikaheli, ye mukulu winyu”».

<- Daniyeli 9Daniyeli 11 ->