1 Yûda Makabeyo boshi n’abâbo bakâjà banyombôkera omu bishagala budufu bajiremwo ihano haguma na bene wâbo, bajà bayûshûkakwo ngasi bandi banali bacigwêrhe obushibirizi omu bwôrhere bw’Abayahudi. Bashûbûzanya ntyôla hôfi ha bantu bihumbi ndarhu. 2 Banakashenga Nnâmahanga mpu alange olubaga lwâge omu igulu lyoshi ludwîrhe lwahinagulwa n’amagulu, mpu anababalire n’aka-Nyamuzinda kâge kahemulagwa n’abantu bagalugalu, 3 mpu ababalire n’olubaga luli hôfi h’okusherêzibwa, anayumvîrhize omusengero gw’omukò gudwîrhe gwalakira emunda ali. 4 Mpu akengêre kulya bayîrhaga abâna barhorhò koshi n’ebijâci bajaciragamwo izîno lyâge mpu ayêrekane obukunizi bwâge kuli abôla bantu babî boshi.

5 Erhi abà akola agwêrhe engabo y’abantu, akola asimisire bwinjà, Makabeyo ashuba ntakalalwa oku mashanja, bulya obukunizi bwa Nyakasane bwamâhinduka bwonjo, 6 akaziyisha acîhunike câligumiza oku lugo n’oku bishagala, abidûlike muliro, ahire abalanzi halya hantu bankanahash’ilangira, bashandabanya ntyôla abashombanyi mwandu. 7 Budufu lyo akazâgigendilwa ntyôla. Emyanzi y’oburhwâli bwâge yalumîra hoshi hoshi.

8 Filipo arhalegamaga okubona kurhi oyôla muntu ajà ayôloloka, oku okuhimana kwâge kuli kwa ngasi lusiku; anaciyandikira Ptolemeyo, murhambo wa musirika w’e Sele-Sîriya n’e Fenisiya mpu arhabâle mwâmi. 9 Ptolomeyo arharhindiraga, arhuma Nikanori mugala wa Patrokle muguma w’omu barhonyi ba mwâmi, amuhà n’engabo ya bantu bihumbi makumi abirhi barhengaga omu mashanja manji mpu bagendimalîra olubaga lwa’Abayahudi lwoshi; amuhirakwo Gorigiasi murhambo mukulu w’abasirika na mulenga bwenêne w’entambala. 10 Nikanori ali alangâlîre ntyôla oku omu kuguza abajà agwârha omu Buyahudi, alêrhera mwâmi empyûlo y’amagerha bihumbi bibirhi oyo mwâmi alicigwâsirwe okulyûla Abaroma. 11 Anaciyandikira duba duba ebi­shagala byanali oku burhambi bw’enyanja mpu bayishe bagule abajà b’Abayahudi, mpu ayishikabahà bajà makumi gali mwenda oku igerha liguma: Arhali amanyire oku obuhane bw’Ogala-hyoshi bwankamuyishira.

12 Erhi Yûda ayumva oku Nikanori akola ali hôfi, anacimanyîsa abâbo oku eyôla ngabo ekola ebali hôfi. 13 Oku bundi balya b’oburhwâli burhagwêrhi ntege na balya barhalibagwêrhe buyêmêre oku bushinganyanya bwa Nnâmahanga, baciyâkira bacijira handi handi. 14 Abandi baguza ehi balibagwêrhe ngasi ehi bali bacisigaline, na muli agôla mango erhi banashenga Nnâmahanga mpu alole abôla Nikanori ali amâguza ciru embere entambala erhondêre, 15 mpu ciru akabà arhali bônene barhumire, alole erya ndagâno alagânanaga boshi n’ababusi bâbo, na bulya izîno lyâge litagatîfu lyaderhîrwe kuli bo.

16 Makabeyo erhi abà amâshûbûza balya boshi banali bacisigîre; abahà omurhima mpu bamanye barharhînyaga omushombanyi, barhanarhemukaga embere z’ogwôla mwandu gw’amashanja gabarhabâlîre buzira igwârhiro ci mpu balwe n’oburhwâli, 17 mpu bakazibona kulya banyagagwa kwoshi n’abasirhe b’abagalugalu, bulya bahemula kwoshi ahantu hatagatîfu, oku bahenyeraga olugo amaligo, balunyaga, balucêsa, n’engeso z’abashakulûza bazihirigisa. 18 Anaciderha erhi abôla bacîkubagira emirasano n’oburhwâli bwâbo; ci rhwono muli Nyamuzinda Ogala-byoshi olya wankahash’ihenangula na cimanyîso ciguma abashombanyi bîrhu n’igulu lyoshi, oyôla ye rhuhiziremwo obulangâlire bwîrhu. 19 Anacibarhondôlera ebirhangâzo Nyamuzinda ajirîre ba shakulûza bâbo na kurhi amango ga Senakeribu, bihumbi igana na makumi gali munâni gaherêrekeraga, 20 kurhi omu ntambala Abayahudi batulagakwo Abanyagalati omu Babiloni, Abayahudi bakozagya eyôla ntambala bali bihumbi munâni byônene haguma na haguma na bihumbi bini bya Banya-Macedoniya, byashandabanya bihumbi igana na makumi abirhi g’abashombanyi, oku burhabâle bwarhenga e mpingu, banaciyunguka bwenêne.

21 Erhi abà amâbahà omurhima ntyôla amânabayêmêza okufîra amarhegeko n’ecihugo câbo, engabo yâge ayigaba mwo bikêmbe bini. 22 Kuli ngasi cikembe ahirakwo mwenewâbo muguma mpu acikulire, bo Simoni, Yozefu na Yônatani, akabà ngasi muguma cihumbi na magana arhanu ga bantu. 23 Arhegeka mpu Ezra asome omu Citabu Citagatîfu; n’erhi abà amâbahà akanwa balwamwo, erhi: «oku burhabâle bwa Nyamuzinda!», anacirhôla ecikêmbe ca burhanzi anacicîrhunika wa burhangiriza kuli Nikanori. 24 Ogala-byoshi abarhabâla, bayîrha kulusha bihumbi mwenda bya bashombanyi, babahirakwo ebibande na banji omu bantu ba Nikanori, bafunyâla bakûla omulindi bayâka. 25 Banacinyaga n’ensaranga za balya bali bayishire mpu babagule. Erhi bayûs’ikungusha ababisha kulî bwenêne, 26 bashubiyisha bahindamusire, amango gabacîka bulya gali malâliro ga Sabato; co carhumire barhacibasbimbulula. 27 Erhi babà bamâtungôla bamânarhôla emirasano y’abashombanyi, barhangira okukuza olwa Sabato, bakuza banavuga Nnâmahanga omunkwa ye wabalikûzagya omu kubayêreka ecimanyîso cirhanzi c’olukogo lwâge. 28 Erhi olwa Sabato lugera, banacigabira ngasi banyazirwe ebintu byâbo, kuli erya minyago; bahà abakana n’enfûzi, nabo bônene n’abâna bâbo bagabâna e­ byasigalaga. 29 Erhi okwôla kuhwa, boshi n’izù liguma basengera Nyakasane Munyabwonjo mpu ababalire lwoshi abarhumisi bâge.

30 Bashubiyîrha bandi bihumbi makumi abirhi omu ngabo yali edwîrhwe na Timoteyo boshi na Bakidesi, banarhôla enyumpa zâbo nzibunzibu z’okulwîra­ mwo. Bagabâna eminyago yâbo bayitwamo bigabi bibirhi: cigabi ciguma kuli bo bônene n’ecindi oku nfûzi n’abakana, n’abalinyazirwe ebyâbo boshi n’abashosi. 31 Banacirhôla emirasano yâbo bayibîka bwinjinjà ahantu hakwânîne, e­byasigalaga oku minyago banacibihêka e Yeruzalemu. 32 Bayîrha omusirika w’omurhambo w’Abaharâbu wali lusize Timoteyo; ali muntu mubî bwenêne, ali amâjirira Abayahudi mabî manji. 33 Agôla mango oku bali bajir’olusiku lukulu lw’okwôla kuhimana kwâbo, Kalisteni n’abâbo baguma, bwo bayôcagya emihango mitagatîfu y’aka-Nyamuzinda, erhi babà bamâyâkira omu hiyumpa hisungunu, babayôkera mulya hiyumpa, ntyôla abôla bantu bahâbwa oluhembo lw’amabî gâbo.

34 Olya Nikanori, kaheza-ngabo wali wamâyumvikana na barhimbûzi cihumbi mpu abagulize Abayahudi, 35 abantu akâg’icîkêbwa mpu bali ngonyi ba­mubonêsa nshonyi oku burhabâle bwa Nnâmahanga. Nikanori ahogola emyambalo yâge y’obukulu anarhôla enjira ajà asheshera omu mashwa nka mujà wayâka, buzira kulusibwa n’omuntu, ajogonjera yênene omu Antiyokiya, arhanacigwêrhi bulangâlire buci bw’okubona engabo yâge. 36 Owalihizire mpu ayishiyunjuliza empongano mwâmi aligwâsirwe okuhongera Abaroma omu kuguza abajà b’e Yeruzalemu, ye wajirage amanyîsa boshi oku Abayahudi bajira obalwîra, n’okwôla kwo kurhuma barhankagagajwa, bulya banashimbe amarhegeko bahâbagwa.

<- 2 Makabeyo 72 Makabeyo 9 ->