1 Yowane anacirhenga e Gazara, anaciyisha alibwîra îshe Simoni ebi Kendebeyo adwîrhe akola byoshi. 2 Simoni anacihamagala abagala bakulu oku banali babiri, Yûda na Yowane, anacibabwîra erhi: Bene wîrhu na nâni, kuguma n’enyumpa ya Larha, rhwalwire entambala z’Israheli kurhenga rhuli barhò kuhika bunôla, n’ebintu byanakagendeka bwinjà omu maboko gîrhu kuhika kanji kanji rhwabà rhwe rhukaziyôkola Israheli. 3 Nkolaga mushosi bunôla, n’oku burhabâle bwa Nnâmahanga mukola mugwêrhe emyâka erhali minyi mujage ahâli hâni n’ahâli mwene mukanye mugendilwîra ishanja lîrhu n’oburhabâle bw’enyanya bubè haguma ninyu. 4 Okubundi anacicîshoga omu cihugo, balwî bihumbi makumi abiri n’abalwîra oku nfarasi bakanya bajilwîsa Kendebeyo; banacigeza obudufu aha Modini. 5 Erhi babà bamâzûkiriza sêzisêzi, banakanya bajà ebwa kabanda, lolà oku enkûmo y’abasirika balambagira n’amagulu, na banyakulwîra oku nfarasi, anaciyisha emunda bali; ci konene omugezi gwabajà ekarhî. 6 Yowane n’abantu bâge banacitwa icumbi aha ishiriza lyâbo. Erhi babona oku engabo yâge yayôbohire okuyîkira ogwôla mugezi, anaciyîkira ye wa burhanzi; erhi engabo emulangira, nabo bayîkira enyuma zâge. 7 Anacigabanya engabo yâge, akerekanya banyakulwîra oku nfarasi haguma n’abagenda n’amagulu; ci erhi n’abalwîra oku nfarasi b’abashombanyi banali banji bwenêne. 8 Banacishekeza emishekera, Kendebeyo anacihimwa ye n’engabo yâge. Banji bakumba, batumirhwa okufà n’abasigalaga bagendiyâkira omu nyumpa y’okulwîra. 9 Okubundi Yûda mwene wâbo Yowane anacitumirhwa; ci Yowane anakungusha abashombanyi kuhika Kendebeyo ahika aha Kedroni ali amâyûbaka. 10 Banyakuhimwa bayâkira omu minâra eri omu ishwa ly’Azoti naye anacidûlika lulya lugo muliro. Bantu bihumbi bibiri muli bo banacifà. Yowane anacishubira e Buyahudi n’omurhûla.

11 Ptolemeyo mugala wa Abubosi erhi amâyîmikwa murhambo w’abalwî, omu kabanda ka Yeriko; ali agwêrhe masholo manji na marhale manji, 12 bulyâla abâga mukwî w’omudâhwa mukulu, 13 Omurhima gwâge gwacivuna bwenêne kuli okwôla; alalikira okubà murhambo w’ecihugo, anacihiga okuyîrhira I Simoni n’abagala omu bwenge. 14 Lêro Simoni erhi ajà arhangula ebishagala bya Yudeya anaciyandagalira e Yeriko, ye n’abagala Matatiyasi na Yûda, omu mwâka gw’igana na makumi gali nda na nda omu mwêzi gw’ikumi na muguma gwàli mwêzi gwa Shebati[a]. 15 Mwene Abubosi anacikolêsa obulyâlya anacibayankirira omu hiyumpa hisungunu hy’okulwîra, hiderhwa Doki, yênene wahiyubakaga. Anacibarheganyizamwo idinye linene, anacifulikamwo abantu. 16 Simoni erhi abà amalimbuka boshi n’abagala, Ptolemeyo anacipamuka boshi n’abantu bâge, bacirhuluba emirasano yâbo, bacîhunikakwo Simoni omu karhî k’idinye, bamuniga ye n’abagala babiri na bambali basungunu. 17 Ahenya ntyôla ebirhahenywa, agalula amabî oku minjà.

18 Ho na halya Ptolemeyo anaciyandikira mwâmi kulya, anacimuhûna mpu amurhumire emirhwe y’okuyîshimurhabâla mpu amuhà ecihugo n’ebishagala by’Abayahudi. 19 Anacirhuma e Gazara mpu bagendiyîrha Yowane, anacirhumiza abahongêsa mpu baj’emunda ali mpu bayîshirhôla enfaranga, amasholo na ngasi bindi bya luhembo. 20 Anacirhuma abandi mpu bagendirhôla Yeruzalemu n’entondo y’aka-Nyamuzinda. 21 Ci konene muntu muguma lebè anacibashokolera anajibwîra Yowane omu Gazara, okunigwa kw’îshe na bene wâbo, anaciyûshûla erhi: «Anarhumire kuguma abandi mpu bayishikuniga». 22 Erhi Yowane amanya kulya yêshi afà mungo, anacirhuluba balya bantu balibarhumirwe mpu bamunige, abayîrhîsa, bulya ali amanyire oku balonza okumuniga. 23 Ebisigîre oku bijiro bya Yowane, entambala atuzire, okuhimana ahimîne, ebyôgo ayûbasize n’omukolo gwâge, 24 lolà oku ebyôla byoshi biri biyandike omu bitabu by’obudâhwa bwâge, kurhenga amango anabâga mudâhwa mukulu erhi îshe amâfà[b].

<- 1 Makabeyo 15