ECITABU CIRHANZI C’ENGANÎRO

Enshokolezi

Ebitabu bibirhi by’enganîro càli citabu ciguma. Bishambâla kulusha emyanzi ya Israheli eshambîrwe omu bitabu bya Samweli n’eby’Abâmi. Cikwone owabiyandikaga agwêrhe omuhigo gwâge gwâge: okumanyîsa obwâmi bwa Nnâmahanga en’igulu, bwâmi bwarhengaga omu bwimâna bw’enyanya bwenêne. Daudi, Ezekiyasi na Yoziyasi, abo bâmi bakulu bacîhanganyire bwenêne okuyinjihya aka-Nyamuzinda. Mwâmi Daudi ye wali ntwâli nkulu muli abo bâmi boshi. Nnâmahanga ashubijira bo naye endagâno ajiraga omu mango ga mîra n’abantu bashinganyanya b’omu Israheli. Ecitabu cirhanzi c’Enganîro cimanyîsa iburha lya Yuda, shakulûza wa Daudi. Na kandi ciderha abana ba Daudi yêne, omulala gwa Bene Levi, abakola omu kà-Nyamuzinda n’omulala gwa bene Yeruzalemu (1 Nga 1—9). Omu myanzi y’Akalamo ka Daudi (1 Nga 10—29), amabî gâge gali mafulike. Obulêbi bwa Natani bwajirikana (1 Nga 17), n’emikolo y’okuyinjihya oburherekêre bw’omu Kà-Nyamuzinda nayo yayunjula (1 Nga 13; 15; 16). Amango ga Salomoni, eco citabu ciderha bwenêne kurhi ayûbakaga akà-Nyamuzinda na kurhi Nyamuzinda alagânanaga n’olubaga lwage (2 Nga 1—9). Enyuma ly’okuberulukana kw’amashanja g’idako, ifo obwo, owayandikaga eco citabu acîsêza okumanyîsa emyanzi y’abantu b’eyo munda bone. Abâmi batwîrwa emmanja nk’oku ngasi muguma ashimbire olwiganyo lwa Daudi (2 Nga 10—36). Abâmi babî basherêza byoshi; na buzinda bwa nyuma ecishagala c’e Yeruzalemu calibuzibwa n’abashombanyi. Ebi binwa biri bya kuyigîriza abantu oku luli lw’iragi olubaga, lwayunjulirana n’obwêmêre kuli Nyamuzinda. Ebinwa bibirhi ebyo bitabu bibâmwo bibà binja bwenêne oku bantu ba ngasi mango:

1. Kuli kwa bulagîrire bwenêne okurhindibukira ebiyêrekîre burhanzi iroho.

2. Nyamuzinda orhegeka igulu lyoshi. Rhurhegesirwe nîrhu rhukukengêre omu malibuko n’omu mbaka zirhu z’ensiku z’ene.

EBIRI OMU CITABU CIRHANZI C'ENGANÎRO

1. Entondekanye y’emilala: cigabi 1, 1—10, 14

2. Obwâmi bwa Daudi: Owarhangiraga oburherekêre: cigabi 11, 1—29, 30