APOCALIPSIS 19

Naikanmeax rarokana

1 Jaskata pekáo en ninkata iki, kikin icha jonibo naikanmeax koshin yoyo iki neskákanai:

“¡Non Ibokaya rabikanwe! Jan jato

kishpinmati

ja ani shinan, itan atipana koshi riki

non Diossena.

2 Jaton aká jawékibo pontéshaman, itan

ikonshaman jato yoixonai iketian, janra ja kikin

tsini ainbo castiganke, nato netenmea jonibo

ja yoranti amaxon jakonmaa iken. Ja

Diossen yonotibo retekana kopíra, jaton paranan

ikín já ashokokanke”, Ikibo.

3 Jainoax jakiribi neskati saa ikana iki:

“¡Non Ibo rabikanwe! Ja jema menota koin

keyatira jawetianbi jenéyamanoxiki”, iki.

4 Jatian ja rabé chonka chosko *ancianoboyabi, ja chosko jiria jawéki chirankooxon, ja ani yakátinin yakata Dios rabii neskákana iki: “¡Jaskara ibanon! ¡Non Ibo rabikanwe!” iki.

5 Jatianra ja ani yakátiainoax neskati yoyo ikai en ninkata iki:

“¡Mato jatíbi ja kikinbaon, itan

kikínmabaonribi, jatíbi mato já tee

axonaibaon, itan jakonhakin jaki

shinannaibaonribi non Dios rabikanwe!” iki ikai.

Corderonin wanoti fiesta aká

6 Jainxon en ninkáribia iki icha jonibo yoyo

ikanai keská, ja icha jene baiti xoo ikai

keská, itan koshin tirin ikai keskábo neskatai:

“¡Non Ibo rabikanwe! Ja jatíbi atipana koshia non

Ibo Diossenra, moa jato ikinkin peoke;

7 Kikínbiresi rarokin rabinon

akanwe. Moara ja *Cordero wanoti

nete senenke, jan biti ainbora moa

benxokaake.

8 Jara jakonshaman lino chopa kerásma, itan

penéshaman saweti yoike. Ja lino chopa riki;

ja Diossen jonibaon jaton ikábo jakon yoii iká”, iki ikanai.

9 Jatian ja ángelnin ea yoia iki: “Wishawe: ‘Ja *Corderonin wanoti fiestanko kenaabora, Diossen jato raro imati iki’ ”, akin. Jainxon ea yoiribia iki: “Natora Diossen ikonkon yoia joibo iki”, akin.

10 Jatian ja ángel naman já rabii ea chirankoota iki. Ikaxbi jan ea yoia iki: “Ea jaskáyamawe; eara mia keska Diossen tee akairibi iki, itan ja Jesucristo ikábo yoikin jeneyamai min wetsabo keskáribi. Dioskaya rabiwe” akin. Ja Jesúskiriti iká joibo riki ja *profetabo jan shinan meniai.

Joxo kabáyonin joni peyakaa

11 Jainxon en oinna iki nai chopetaton joni peyakaya joxo kabayo pikotai. Ja jan peyakaatonin jane iká iki, Senenhai itan Ikonkon, ja atikeskakinbi jato ikinai, itan reteananai kopí.

12 Jawen berora iká iki chii tiri keská xená. Jainoax iká iki icha maiti maia itan westíora jane wisháya. Ja janera janbichores onanna iká iki.

13 Ja chopa sawea iká iki jimin pokoa; jawen jane iká iki: Diossen joi.

14 Jatian já chibani boaibo ikana iki, joxo kabáyonin peyakaa naikanmea sontárobo, joxo itan kerásma lino chopa kikin jakonshaman sawéyabo.

15 Jawen kexakanmeax pikota iki, westíora kikin kensho espada, jan jatíbiainoa jonibo ramiati. Janra hierro bastonyaxon jato ikinnoxiki. Janra ja uva potsiai keskáakin jaton aká jawékibo jato yoixonoxiki. Jainxonra ja vino pae xeamai keskáakin ja jatíbi atipana Diossen sináxon akonbireskin jato castiganoxiki.

16 Jatian jawen chopanko itan jawen kishinko iká iki: “apobaon Apo, itan ibobaon Ibo” iki iká wishá.

17 Jainxon en oinna iki westíora Ángel barinbi penita, ja jatíbi mawá piai noyai, yoinabo keenai koshin saí iki neskatai: “¡Neno beax tsinkíxon ja Diossen jawékiati aká pii bekanwe.

18 Jaskáxon ja apobaon nami, sontárobaon koshibaon nami, rakéma jonibaon nami, jainoax kabayobaon nami, ja jan peyakaabaon namiribi maton pinon. Jainoax jatíbi jonibaon nami: Ja iki, yonokaayamaibo itan inaaxon yonokanaibaon nami, kikinbaon itan kikinma jonibaon namiribi maton pinon!” ikibo.

19 Jaskáketian en oinna iki, ja onsá yoina betan ja nato mainmea apobo, jawen sontároboyabi; ja kabáyonin peyakaa joni jawen sontároboya itina betan reteananox tsinkíkana.

20 Jatian ja onsá yoina betan janso *profetara yatankana iki. Jabo iká iki já bebonxon ja oinxon onanti ratéti jawéki akábo. Ja ratéti jawéki axonbora ja janso *profetanin ja onsá yoinanin jane betonkoain akáyabo, itan ja jisáakin akana rabikanabo jato parana iká iki. Jainxonra ja onsá yoina betan ja janso *profeta jiriabi ja chii ian azufreya tiritainko jato potaa iki.

21 Jatian jatíribibobiribi, ja kabáyonin peyakaatonin kexakanmeax espada pikotaitonin retekin keyoa iki. Jatianra jatíbi ja mawá piai noyai yoinabo jaton nami pii moa jatsankana iki.

<- APOCALIPSIS 18 APOCALIPSIS 20 ->