MATTHEW 3

Baptispu John tânghâi

(Mk 1:1-8; Luk 3:1-18; Joh 1:19-28)

1 Ma zora han Baptispu John, Judea ramchâra a honga male tânghâi a phuta, 2 “Nin nunsienangei renga inhei ta roi, Invân Rêngram anâi zoi,”[a] a tia. 3 [b] John hih ani, Dêipu Isaiah'n:

“Ramchâra mi inkhat tânghâi han,

‘Pumapa rang lamlien sin ungla,

a lôna rang lampui khom mintûn roi!’ ” tia a chungroi a lei misîr hah ani.

4 John a puonsilngei hah ût mula sin ania, savun kongkhit a khita, a sâk ngâi chu khâimimsiengei le rama khuoilutui ani.[c] 5 Jerusalem renga, Judea ramhuol pumpui renga, le Jordan tuidung revêla ramtin renga mingei a kôm an honga. 6 An nunsienangei an phuonga, male ama'n Jordan tuidunga a Baptis ngei zoi.

7 John'n Phariseengei le Sadduceengei tamtak a kôm Baptis chang rangin an hong a mu lehan an kôm, “Murûl richingei, Pathien sepna juong chulna rang renga hih rotpai theina rangin tumo nangni ril?[d] 8 Nin sietna renga nin inhei zoi ti riettheina rangin sinngei hah tho roi. 9 Male Abraham richisuonpârngei kêng kin ni tiin sepna renga rotpai thei rangin mindon no roi. Nangni ki ril, Pathien'n hi lungngei khom hih Abraham richisuonpârngei a min chang thei![e] 10 Thingkungngei a ruzung renga phûr rangin reipui min râkchien sai kêng ani zoi; thingkung murdi mara sân ânra loi kai chu phûr an ta, meia vôrpai an tih.[f] 11 Keima'n chu nin insîr zoi ti rietna rangin tuiin nangni ka Baptis ngâia, aniatachu ku nûka juong rangpu'n chu Ratha Inthieng le meiin nangni baptis a tih. Ama chu keima nêka roiinpui uol ok ani; keima chu a kekok chôi rangin luo inhoi mu-ung. 12 Bungei jâpna rangin relei a dôna, a ruijôl jâp minsâi liei a ta, a butakngei kai chu sapang sûnga thun a ta, arishi chu mei thithei ngâiloia hâl minmang a tih,” a tia.

Jisua baptis a chang

(Mk 1:9-11; Luk 3:21-22)

13 Ma zora lâihan John kôm Baptis chang rangin Jisua'n Galilee ram renga Jordan dunga a honga, 14 Aniatachu, John'n khap rang a bôka, a kôm, “Nangman kêng mi ni Baptis anânga,” John'n, “kho angin mo ko kôm te no honga!” a tia.

15 Hannirese Jisua'n a kôm, “Atûn hin asa ti chien roh. Ma angdênin Pathien'n a minnângngei murdi chu ei tho rang ani,” tiin a thuona. Hanchu John a jôt zoi ani.

16 Jisua Baptis a chang suo, harenghan, tui renga a hong jôka. Hanchu ama rangin invân ajuon onga, male Pathien Ratha hah vasu angin a juongchuma a chunga chuongin a mua.

17 Hanchu, invân renga rôl ajuon ringa, “Mahih ka Nâipasal moroitak, a chunga ku mulung atâiriem ani,”[g] a tia.

<- MATTHEW 2 MATTHEW 4 ->