LUKE 2

Jisua suok roi

(Mat 1:18-25)

1 Malâiahan, Rêng Caesar Augustus Rom sorkar ramop murdi riming miziek rangin chong a pêka. 2 Hi intelnapui motontak hi syria rama Kuirinius governor chang lâitak ani. 3 Mitinin anni khopui chita riming miziek rangin an sea. 4-5 Joseph khom David inkuo le a richia mi ani sikin, a lômnu biek Mary inrâidîm lehan Galilee ram Nazareth khopui renga Judea ram, David suokna, Bethlehem khopuia riming miziek rangin an sea. 6 Hanchu, Bethlehem'a an om lâitakin nâi nei zorân a hong de zoia. 7 Nâilutîr pasal a neia, puon leh a thoma, khuol tung in an keng khâiloi sikin sa bukhênga a min jâl zoi.

Belrihôlngei le vântîrtonngei

8 Ma rama han, belrihôlngei jâna an belri ngâkin rajâia an oma. 9 Pumapa vântîrton a juong inlâra, Pumapa roiinpuina vârin a êla, rolo innîkin an chia. 10 Vântîrtonin, “chi no roi, Thurchisa râisân omtak ninta rang le mitin ta rang ku juong mintung kêng. 11 Avien hin David khopuia Minringpu, Pumapa Khrista a suok zoi. 12 Sîn nin tho theina rang chu, nâitesen, puona thom sakhênga jâlin mûng nin tih,” a tia. 13 Harenghan, vântîrton kôma han, invân râlmingei tamtak an juong oma, Pathien an minpâka.

14 “Invân Ânchung taka Pathien Roiinpui rese.

Philchunga a râisânna ngei chunga inngêina lêng rese,” an tia.

15 Hanchu, vântîrtonngeiin an mâk ngei lechu, belrihôlngei han, Pumapa'n mi ril, neinun juongtung a en rangin, Bethlehem'a se ei ti u, an tia. 16 Hanchu, an se laia, Mary le Joseph le sakhênga jâl nâite hah an va mua. 17 Vântîrtonin, nâite chungroi ai rilngei hah belrihôlngeiin an ril ngeia, 18 a riet ngei murdi'n kamâm a om tatak an tia. 19 Mary'n ha chong ngei hah a mulungrîla mindonin a vong tita. 20 Vântîrtonin a rilngei lam takin jâttinrêng an va mua, an riet sikin Pathien minpâk pumin an kîr nôk zoi.

Jisua riming an phuo

21 Hanchu sertan rang ni sûn riet a hong chukin chu, sûnga a om lâia vântîrtonin ai phuo sai, a riming, Jisua an phuo zoia.

Jisua Biekina an minlang

22 Moses balam chongpêk angin minthieng rang ni ahong chukin chu, Joseph le Mary'n an nâite Pumapa kôma minlang rangin Jerusalem Biekina an hong puia. 23 Balam lekhabua, “Nâilutîr pasal kai chu Pumapa ta rang ani,” itia ânziek anghan. 24 Pumapa balam anghan vasu bop khat mo, pharvali bop khat mo, an pêk sa rang ani.

25 Ma zora han Jerusalema a riming Simeon an ti a oma, ha mi hah mi sa, Pathien minlut mi tak ania, Isreal jôk rang ni ngâkin, a chunga Ratha Inthieng a oma. 26 Pumapa chonginkhâm, Messiah a mu mâka thi no nih, itia inkhâm ani. 27 Ratha ruoiin Simeon hah Biekina a sea. Balam anga achunga sin rangin a nû le a pa'n nâite Jisua, Biekina an hong puia. 28 Simeon'n nâite a poma, Pathien kôm râisânchong a rila;

29 “Pumapa, atûn chu no chongkhâm angin,

Ni tîrlâm hih rathangamin ni na man se rang ani zoi.

30 Ki mit lelên na sanminringna a mu zoi,

31 Mitin mu ranga ni mintuo hah.

32 Nu lungdo, Jentailngei kôma inlang rang vâr le

Ni mi Isrealngei roiinpuina rang chu” a tia.

33 Nâite chungroi Simeon'n ai misîr hah a nu le a pa'n an kamâm sabak ani. 34 Hanchu Simeon'n, sat a vura, a nu Mary kôma, “Hi nâite hih Pathien ithang, Isreal lâia mi tamtak inmangna rang le jôkna rang ani. Pathien sînthona mi tamtak ngei makhal rang nîng a tih. 35 Mi mindonna inthup minlang a ta, khandai angai angin ngâisietnân na mulung sunkhoi a tih,” a tipea.

36-37 Mahan dêipu meithâi atar inkhat, a riming Anna an ti, Asher rûia mi, Phanuel nâinupang a oma. kum sari vai inneiin a oma, kum sômriet minli meithâiin a oma*kum sômriet minli meithâiin a oma; nônchu ama hah kum 84 tar ani.. Biekin mâk loiin a sûn a jânin bu ngêia Pathien Biekina, chubai thôn a om ngâia. 38 Ma zora taka han a hongtunga, Pathien kôm râisânchong a rila, Jerusalem jôkna ranga Pathien lei ngâk ngei kôma khom nâipang Jisua thurchi a misîr pe sa zoi.

Nazareth'a an kîr nôk

39 Pumapa balam chongpêka, an thotum an tho zoiin chu Joseph le Mary hah Galilee rama, an khuo Nazareth'a an kîr nôk zoi. 40 Hanchu, nâite hah a hong liena a hong rât tira, vârnân a sipa, Pathien satvurnangei a chunga a oma.

Nâipang Jisua Biekina

41 Kumtin, Jisua nû le pa Kalkân kût mang rangin Jerusalema an se ngâia. 42 Jisua hah kum sômleinik a hong nîn chu, kûta an hong se puia. 43 Kût aheka anîn chu an juongkîr pui nôka, ania Jisua chu Jerusalema ala châma, a nû le a pa lakin riet mak ngeia. 44 A lômngei lâia se nîng a tih, tiin an mindona, sûnkhat lam an se suoleh, a ruolngei le an sûngsuokngei kâra an rok titira, 45 anitachu, mu mak ngeia, a rok rangin Jerusalema an kîr nôka.

46 A sûnthum nin chu, Biekina Juda minchupungei kôma insungin, an chong rangâi le chong rekelin an va mu zoia. 47 A vâr taka a chongthuon lam a riet murdi'n an kamâma, 48 A nû le a pan an va mûn chu an kamâma, a nûn a kôma, “Nâia khoithomo hi anga mi no tho, kângdoi takin na pa leh nang kin lei rok bang kêng ani zoi” a tipea. 49 “Ithomo minin rok? Ka Pa ina ko om rang hih nin riet loi mini?” tiin a thuona. 50 Hannisenla a thuonna hah a mindona chang riet mak ngeia. 51 Hanchu, an kôm Nazareth'a a sea, an chong jômin a oma, a nûn chu neinun omtie ngei nâm a mulungrîla a vong tit ani.

52 Hanchu Jisua hah taksa tieng le vârna tieng a hong insôn tir tira, Pathien le miriem mitlûtin a hong om tir zoi.1 Sam 2:26; Chvr 3:4

<- LUKE 1 LUKE 3 ->