Hebrews 3

Jisua chu Moses nêkin aroiinpui uol

1 Ki khristien sûngsuokngei, Pathien'n a koi ngei! Ei taksônna lama Ochai Inlaltak ni ranga Pathien'n a tîr Jisua hah mindon roi. 2 Pathien insûngmingei lâia Moses taksôn oma a om anghan ama khom hi sin tho ranga a thangpu Pathien kôm taksôn a om ani. 3 In sinpu'n a in sin nêkin miritna achang uol anghan Jisua hih Moses nêkin roiinpuina achang uol ok rangin ânhoi ani. 4 In tiin hi tu sin mini chu ani ngêta, male neinun murdi chu Pathien sin ani. 5 Pathien insûngmingei lâia suok chu Moses hah taksôn omtak ania, Pathien'n sûnmotona la ti rang ngei hah a lei misîr ani. 6 Aniatachu Khrista rêk chu Pathien insûngmingei chunga taksônom le donsûipu Nâipasal ani. Ei hâina sûr mindetin ei sabeina hin ei minngam titin chu a insûngmingei chu eini ngei hih ei ni.

Pathien mingei ta ranga inngamna

7 Masika han Ratha Inthiengin

“Aviensûn Pathien rôl nin rietin chu,

8 nin richibulngei ramchâra Pathien an minsin lâia,

ama doia an inhel anghan

nin mulung minngar khâi no roi.

9 Pathien'n, ramchâra han nin richibul ngeiin mi minsin rangin an pûta,

kum sômminli sûnga ki sintho an mu suonûk khomin, a ti.

10 Masikin ha mingei chunga han ka takasia,

‘Khotiklâi khomin iemomin om ngâi mak ngeia, male Ko chongpêkngei khom jôm ngâi mak ngei.’

11 Ka taksi sikin chonginkhâm ngartak ki sina:

Ki minngam ngeina rang rama han lût tet noni ngei!” ki tia a ti anghan.

12 Ki iempu champui ngei, Pathien ring hah nûksong rangin nin lâia tutên iemloina mulungrîl saloi nin dôn loina rangin indîn roi. 13 Manêkin, nin lâia tute sietna methêmna sika mulung ngarin nin om loina rangin Pathien Lekhabun “Aviensûn” ti mi mang pe kâr chu anîngtin inkhat le inkhat insan inlôm tit roi. 14 Ei iem phutna ngamna hah among dênin ei sûr mindet ngânin chu Khrista leh munkhata changsa rang ngei ei ni zoi.

15 Lap 95:7,8 (LXX) Ma hih Pathien Lekhabu'n ati:

“Aviensûn Pathien rôl nin rietin chu, nin richibulngeiin Pathien doia an inhel lâia anghan,

nin mulung minngar khâi no roi.”

16 Tu miriemngei mo Pathien rôl riet suonûka ânhelngei hah? Egypt ram renga Moses'n a ruoi suok ngei hah an ni.Tel 14:1-35 17 Tu ngei chunga mo Pathien'n kum sômminli sûnga a taksi hah? Sietna sina ramchâra athia ânlet ngei chunga han ani. 18 Tu ngei mo Pathien'n chonginkhâm ngartak dônin, “Ki minngam ngeina rang rama han lût tet noni ngei,” a ti hah? Ânhelngei murdi hah an ni. 19 Ma anghan, an iemloi sikin ma rama han lût thei mak ngei tiin ei mu ani.

<- Hebrews 2 Hebrews 4 ->