HEBREW
Mingei kôma Lekhamuthuon
Chongmaruoi
Hebrew mingei kôma lekhamuthuon hi pâl doina arât pe ngei tit sika an khristien taksônna roia, chiomtak tuongngei kôma miziek ani. Amiziekpu hin Jisua Khrista hih Pathien inlangna diktak le mongnatak ani ti minlang pe ngeiin an taksônna lama a mohôk ngei bak ani. Hi a mohôkna hin chongtak inthum lunghâng a tho ani. (1) Jisua hih kumtuong Pathien Nâipasal ania, dûktongna tuongin a Pa chongjômna adika ânchu ani. Pathien Nâipasal ani anghan Jisua chu Chongtung Muruoa dêipungei nêkin ânchung uola, vântîrtonngei le Moses nêkin khom ânchung uol ani. (2) Jisua chu Chongtung Muruoa ochaingei nêka inchung uola kumtuong ochai ni rangin Pathien'n a phuong ani. (3) Jisua jârin a iemngei chu sietnangei china le thina ngei renga sanminringin an om zoia, male Hebrew sakhuo balam taksa sa thisena inbôlnan arlim a lei minlang ngâi hah Jisua chu Ochai Inlaltak ani anghan sanminringna diktak a pêk zoi.
Israelngei thurchia mi senkhat riming inthang ngei taksônna (bung 11) ha enminkhinan mangin a miziekpu hin apore ngei hi taksônoma omngâi rangin a ngêna, male (bung 12) hin amongdêna taksônoma omtita Jisua tieng enngitin, i-anga dûktongna le nuomlona an chunga hong tung khom rese tuong rangin a ngên ani. Hi lekhamuthuon hi inningna le rilna chongin akhâr ani.
Asûnga chongtângpuingei
Chongmaruoi: Khrista hi Pathien inlangna akipna ani 1:1-3
Vântîrtonngei nêkin ânchung uol 1:4—2:18
Khrista chu Moses le Joshua nêkin ânchung uol 3:1—4:13
Khrista ochai nina ânchung tie 4:14—7:28
Khrista chonginkhit ânchung tie 8:1—9:28
Khrista inbôlna ânchung tie 10:1-39
Taksônna alutna bultak ani tie 11:1—12:29
Pathien râiminsâna 13:1-19
Khârna chubai thona 13:20-21
Azoina chongngei 13:1-25

Pathien'n a Nâipasal renga chong a misîrna

1 Tienlâi han Pathien'n ei richibulngei kôm a dêipungei mangin zora tamtak le lam tamtakin chong a lei misîr ngâia, 2 aniatachu sûnnûktieng ngeia hin chu ei kôm a Nâipasal mangin thurchi a misîr zoi. Ama taka han Pathien'n vânnuoi hi a sina, ama hah sûn nûktaka chu neinunngei murdi chang let rangin a thang ani zoi. 3 Ama han Pathien roiinpuina vâra min êla Pathien angna tatak dônin rammuol pumpui ama sinthotheina chongin a minding ani. Miriemngei sietna renga ngâidamna a sin pe suonûkin, Pathien Ânsângtak sinthothei kut changtieng invâna a hon sung zoi.

Pathien Nâipasal roiinpuina

4 Pathien'n Nâipasal hah vântîrtonngei nêka riming roiinpui uol a lei pêk anghan ama ha vântîrtonngei nêka inlal uola sinin a hong om zoi. 5 Hi chong hi Pathien'n vântîrtonngei tute kôm ti tet ngâi mak,

“Nangma ka Nâipasal ni ni;

aviensûn hin na Pa ko hongni zoi,”

Mapên han Pathien'n tu vântîrton chungroi khom misîrin,

“Keima hi a Pa nîng ka ta,

Male ama hah ka Nâipasal nîng a tih,” ti chong hi ti ngâi mak.

6 Aniatachu Pathien'n a Nâipasal lutîr hah rammuola a juongtîr rang lâiin,

“Pathien vântîrtonngei murdi'n Ama chubai an mûk ngêt rang ani,” a ti ani.

7 Aniatachu vântîrtonngei chungroi chu Pathien'n hi anghin a ti,

“Pathien'n a vântîrtonngei mantha a sin ngâia,

male a tîrlâmngei chu meidonin a sin ngâi.”

8 Nâipasal chungroi rêk chu Pathien'n a tia,

“O Pathien ne Rêngram chu* kumtuong kumtuongin om tit a tih!

Ni mingei chunga satnân roi† ne jêk ngâi ani.

9 Adik ni midita male, adikloi chu nu mumâk ngâi.

Masikin Pathien, na Pathien han nang thangin

na champuingei nêkin miritna le râisâna nang a pêk uol ok zoi ani hi,”

10 “Nangma, Pumapa, aphut han pilchung ni sina,

male invânngei khom nu kut ngêtin ni sin ani a ti sa.

11 Ma ngei hah lân mang an ta, aniatachu nangma chu om tit ni tih;

anni ngei ha chu puonsilngei angin la lîmpai an tih.

12 Kâncholinchuol anghan la thep ngei na ta,

male anni ngei ha pounngei angin la thûl nîng an tih.

Aniatachu nangma chu zoratin ni ni ngâiin ni nia,

male ni ringna khom hek tet no nih.”

13 Pathien'n a vântîrtonngei tute kôm hi chong hi ti tet ngâi mak:

“Na râlngei ne ke sirpha darnân ka dar mâka chu

Ka changtieng hin insung roh,” ti hi.

14 Nônte, vântîrtonngei hi imo an ni? Anni ngei ha chu ratha, Pathien sintho ngei an nia, sanminringna man rang ngei san ranga ama'n a tîr ngei an ni.

Hebrews 2 ->