GALATIA
Mingei kôma Paul Lekhamuthuon
Chongmaruoi
Thurchi sa hi a hong inzara, Jentailngei khomin an iem zoia. Khristien diktak ni rangin Judangei angin Moses Balam jôm ngêt anâng le nângloi minthâr anâng zoia. Paul han Judangei anga om anâng ti maka, Khrista iempungei ta ranga tho rang anâng chu taksôn chien hih ani tiin a tia. Ania, Galatia sûnga koiindangngei hih Asia ram chîn uola Rom sorkar huolsûnga inkhat ani. Paul minchuna doi rang anga “Pathien makunga thei inchang rang han Moses Balam jôm ngêt sa rang ani” ti mi senkhatin hih iemtharngei hih an bea, mi tamtak chu an lâka.
Galatimingei kôma Paul lekhamuthuon Minchuna dikloi lei jûingei hin iemna dik an hong riet minthâr theina rangin hi lekha hih Paul'n a miziek ani. Tîrton dik ani tie a misîra, miriem inkhâm ni loiin Pathien ngêtin a koia, Jentail lâia sintho rang chong a misîr minthâra, Khrista iempungei om chang chu lungkhamnân an sip rang ani tie a misîr nôk.
Asûnga chongtângpuingei
Chongmasana 1:1-10
Paul tîrton anina roi 1:11—2:21
Pathien moroina thurchisa 3:1—4:31
Khristien zalênna le sinpêl 5:1—6:10
Chongkhârna 6:11-18

1 Paul, Miriem renga niloi, miriem jâra khom niloi, Jisua Khrista le thina renga kaithoipu Pathien jâra tîrton keima. 2 Male ko ompui sûngsuokngei nâmin Galatia taka om koiindangngei chibai nangni an muthuon;

3 Pa Pathien le ei Pumapa Jisua Khrista renga moroina le inngêina nangni pêk rese.

4 Atûnlâi rammuol sietna renga Khrista'n mi kêlsuo theina rangin, ei Pathien le ei Pa lungdo jômin, ei nunsie sikin ama ânpêk zoi. 5 Pathien kôma inlalna tuonsôtin om rese, Amen.

Thurchisa adang ommak

6 Khrista moroina jâra nangni koipu hah irang mo inrangtaka nin mâka, Thurchisa dang nin ipom hih nangni ka kamâm.* 7 Maha thurchisa adang viek ni uolma, mi senkhatngei hin nangni minjêlin Khrista thurchisa thûl an bôk kêng ani. 8 Nikhomsenla, keinin mo, invân renga vântîrton khomin mo thurchisa dang an misîr duoiin chu meidîla rang theiloiintumin om rese. 9 Motona kin ti anghan kin ti nôk, nin pomsa thurchisa hah niloia thurchisa dang nin kôm juong misîr an omin chu, ama hah meidîla rang theiloiintumin om rese.

10 Keiman atûn hin miriemngei pomna zong mo kini? Nitet mak! Keiman ka nuom chu Pathien pomna kêng! Miriem riming inthangna rang rok ka la nîn chu, Khrista tîrlâm ki ni loi rang ani.

Inmo Paul tîrton a hongchang

11 Ma anghan, sûngsuokngei, thurchisa nangni ki ril hah miriem tienga chong ni mak iti nangni minriet rong. 12 Miriem kôm renga ka man ni maka, tute mi minchu khom ni mak. Mahah Jisua Khrista'n ko kôm lelea ânlâr ani.

13 Juda sakhuo balama kênpêk lâia ko om lam hah nin riet; Pathien Koiindangngei lungkhamna boiin dengminthei ngeia, theidôra minmang ngei rang bôkin ke lei oma.Sin 8:3; 22:4,5; 26:9-11 14 Hanchu, ki richibulngei chong mâk chunga kênpêk uol ngâi sikin Juda balama ki sinthona han ki richingei lâia ka ruolngei tamtak chu ke khêl ani.Sin 22:3

15 Hannirese, Pathien'n a moroinân ka nu vonsûnga ko omlâi renga mi thangsai, a sin tho rangin milei koi ani.Sin 9:3-6; 22:6-10; 26:13-18 Male ama'n mi mindon ha, 16 Jentailngei lâia Thurchi Sa ki misîr theina ranga a Nâipasal ko kôma ânlâr han tute rekel loiin; 17 Jerusalema ko motona tîrton lei changngei kôm khom se khâi loiin, Arab rama ke se kelena, masuole Damascus'a ko hongkîr nôka. 18 Hanchu, kum thum suole chu, Peter kôm roi ngei riet rangin Jerusalema kava sea, a kôma hapta nik ka va oma.Sin 9:26-30 19 Ania, Pumapa lâibungpa Jacob†Jacob telloi chu tute tîrton dangngei; aninônchu tute tîrton dang ngei; midang ku mu chu Jacob vai ani. telloi chu tute tîrton dangngei mu mu-ung.

20 Nin kôma chong ki miziek hih adik ani. Milak tho mu-ung iti Pathien'n a riet.

21 Masuole han Syria le Cilicia ramhuol sûnga ke se zoi ani. 22 Ma zora han Judea rama Koiindangngeiin ke mêl la riet mak ngeia; 23 “Motona mi esêlpu le iemna ahong minboi phar rang bôk ngâipu han atûn hin chu taksônna chong kêng a misîr zoi” ti mi misîrna vai an riet. 24 Ma anghan, keima sikin Pathien an minpâk zoi.

Galatia Mingei 2 ->