JOHN
Lekhamuthuon Inthumna
Chongmaruoi
John renga lekha muthuon inthumna hi “Upa'n” koiindang ruoipu a riming Gaius kôm a miziek ani. A miziekpu'n Gaius hin Khristien dangngei khom a san ngâi sikin a minpâkna le mi inkhat a riming Diotrephes inningna ranga a rilna ani.
Asûnga chongtângpuingei
Chongmaruoi 1-4
Gaius hih minpâk ani 5-8
Diotrephes hih theiloimintum ani 9-10
Demetrius rilminsana 11-12
Chongkhârna 13-15

1 Sin 19:29; Rom 16:23; 1 Kor 1:14 Upa renga han,

Ko moroitak Gaius, ku lungkham tatakpu kôm,

2 Ka mal moroitak, ratha han na dam ti ki riet anghan, neinunngei murdi asadima a lônna taksa han na dam theina rangin ku chubai ngâi. 3 Khristien champuingei senkhat an juonga, taksônoma no omtit ngâi anghan, chongtaka iem no omtit tih min rila, ka râisân tatak ani. 4 Ka nâingei chongtaka an om ti ki rieta ka râisân nêka râisânna lien uol reng dôn mu ung.

Gaius minpâkin aom

5 Ka mal moroitak, khuolmingei anni lâi khomin Khristien champuingei chunga taksônomtakin sin no tho ngâia. 6 Hi taka koiindangngei kôm khom nu lungkhamna chungroi an misîr zoi. An khuolchaina mozomtita Pathien a râisân theina rangin rangâihoitakin lei san ngei roh. 7 Khrista sinthoa an khuolchaina han iemloingei renga sanna lâk loiin an nin thok sikin. 8 Masikin eini Khristienngeiin, chongtaka sin an thona han ênchelsa theina rangin hi mingei hih ei san ngêt rang ani.

Diotrephes le Demetrius

9 Koiindang kôma lekhamuthuon bongte chu ki mizieka; aniatachu, an ruoipu chang nuom ngâipu Diotrephes han chu ko chong ite lunghâng tho noni. 10 Hanchu ku juong tika chu a sintho murdi lunghâng tho ka ta; kin chungroia neinun ichiruoingei a ti ngâi le milak a ril ngâi! Aniatachu maha khom ahunin la riet maka; ei Khristien champuingei an hong khomin mintung ngâi maka, mi mintung rang nuomngei khom a khap ngâi male koiindang renga rujûl pai ngei rang a pût ngâi!

11 Ka mal moroitak, asaloi jûi nônla, asa jûi roh. Tukhom asa sinpu ngei chu Pathien ta an nia; tukhom asaloi sinpu ngei chu Pathien la muloi an ni.

12 Demetrius hah mitinin asa an ti ngâia; chongtak han amananâkin asa a ti ngâi. Male keini khomin kin thurchi kin bôk sa, male khoimo kin ti hih adik ti ni riet.

Azoina chibaimûknangei

13 Chong tamtak nangni ril rang ko dôn, aniatachu maha pen le pentuiin no kôm miziek nuom mu ung. 14 Nang mu lai rang ka sabeia, hanchu intongin la chong rei.

15 Rathângamin om roh.

Na malngei nâmin chibai an hong muthuon. Ei malngei hah an misang zeta chibai mi mûk pe chit roh.