KORINTH
Mingei Kôma Paul Lekhamuthuon Inikna
Chongmaruoi
Korinth mingei kôma Paul lekhamuthuon inikna hih Korinth koiindangngei leh a miziekpu inzomna intakna aom lâitaka miziek ani. Koiindanga mi senkhatngeiin ânlangin Paul an doi sabak ngâi, aniatachu Paul'n inngêinôk ranga a nuomna inthûk tie a minlang pe ngeia, inngêinôkna ahong tung tena chu a râisânna lien tie a misîr pe ngei ani.
Hi lekhamuthuon hin amoton tieng chu Paul'n Korinth koiindang leh an inzomna roi a misîra, koiindang sûnga bâiinkhamna suok ngâi ngei le mi doi ngâi ngei chongna taka a thuon ngei tie rilsensâiin, ma chongna sika insîrna le inngêinôkna asuokna chunga a râisân tie a misîr sa ani. Masuole chu, Judea rama Khristien ânsam ngei sanna ranga ngâihoi chôiruol tho rangin koiindang a ngên ani. Abung mongna tieng ngei hin chu Korinth koiindanga mi senkhat, tîrton dik ki ni intia, Paul chu tîrton dikloi kêng ti ngâi ngei doiin Paul a tîrtonnina ân rung ani.
Asûnga chongtângpuingei
Chongmaruoi 1:1-11
Paul le Korinth koiindang 1:12—7:16
Judea rama khristienngei ranga chôiruol 8:1—9:15
Paul'n a tîrtonnina rachamneina ân rungna 10:1—13:10
Chongkhârna 13:11-13

1 Sin 18:1Paul, Pathien lungdoa Khrista Jisua tîrton, le ei lâibungpa Timothy ngei renga han,

Korinth taka Pathien koiindang, male Achaia ram pumpuia Pathien mingei murdi kôm han:

2 Pathien ei Pa le Pumapa Jisua Khrista'n moroina le inngêina nangni pêk rese.

Paul'n Pathien kôm râisânchong a misîrna

3 Ei Pumapa Jisua Khrista Pathien le Pa, mulungjûrpuina sip Pa, sannangei murdi juongna Pathien kôm han râisânchong misîr ei tih u! 4 Ama'n ei intaknangei murdia mi san ngâia, masikin eini khom Pathien renga sanna ei man nanâk hah mangin midangngei an intakna murdia ei san thei ani. 5 Khrista tuongna tamtak ngei han rangtum ei dôn anghan Khrista jârin Pathien sanna lien khom han rangtum ei dôn ani. 6 Kin tuongin chu, mahah sanna le sanminringna nin manna rang ania; sannin kin omin chu, hanchu nangni khom sannin nin oma male tuongna kin tuong hah tuongdierna dôna tuong rangin râtna pêkin nin om ani. 7 Masikin nangni kin sabeina hah innîk tet ngâi mak; kin tuongnangeia rangtum nin dôn anghan sanna kin manna ngei khoma hin rangtum nin dôn sa tiin kin riet.

8 Lâibungngei le sarnungei Asia ramhuol sûnga intakna kin tong roi hah nangni minrietnôk kin nuom. Kin chunga puokrikngei hah alien rai sik le arik rai sikin la ring rangin sabeina reng dôn khâi mak me.1 Kor 15:32 9 Kin chunga thina rangin roi an jêkmasat angin kin riet. Hannirese maha chu keinia hin minngam loiin Pathien mithi kaithoi nôkpu kôm kin minngam theina rang sika alei ni. 10 Ma anga thina chiruoi inrîngomngei*thina chiruoi inrîngomngei; miziek senkhat ngei an dôn chu thina chiruoi. renga hah mi sanminring zoia, mi la sanminjôk atih, male kin sabeina ama chunga kin minngama, ama'n mi la sanminring nôk atih, 11 nangni khom kin ta rangin chubaithonangeia mi nin san anghan. Masikin kin ta ranga chubaithona tamtak ngei hah thuonin om a ta, male Pathien'n sat mi vur a ta; male mi tamtakin kin ruthûlin a kôm râisânchong misîr an tih.

Paul Mintuonangei a thûlna

12 Hi rammuola kin ringnuna leh aliekin nangni le kin inkainangei han munisi vârna sika ni loiin Pathien moroina sinthotheina sikin Pathien-pêk ngamna† le takintâinân roi ajêka mi mindeta kin sielesarietnân mi ril sikin kin inpâkpui ani. 13-14 Nin pore thei le nin rietthei kai kêng nin kôm kin miziek. Nikhomsenla atûn hin la rietthei sabak no khom ungla, mi la rietthei tatak nin tih, tiin ka sabei ani, ei Pumapa Jisua Nikhuo han nangni kin minpâk anghan mi nin minpâk theina rangin.

15 Mangei murdi hah ki riet minthâr sabaka, vêlnik satvura nin om theina rangin nangni hongpan bak rangin mintuonangei ki sin ani. 16 Macedonia rama ke se balamin nangni hongpana, ko hongkîr nôk tieng khom nangni hongpan nôk rangin ki mintuo ani, Judea rama ku khuolchaina ranga han mi nin san theina rangin.Sin 19:21 17 Hi anga mintuona sika hin mintuona thûldul mi anghan kên lang mini? Ki mintuonangei ki sin lâihan, ranghuolna bôknangei renga ki sin mo, “Ani, ani” le “Niloi, niloi” voikhat rengin ti ranga ânzoi sai mini? 18 Adiktakin Pathien'n chongtakin a chong ngâi anghan, nin kôma ko chonginkhâm khom hah “Ani” le “Niloi” nimak. 19 Jisua Khrista, Pathien Nâipasal, a thurchi nin lâia Silas, Timothy le keiman kin misîr hah, “Ani” le “Niloi” hih ani loi sikin. Ama hih Pathien “Ani,”Sin 18:5 20 Pathien chu ama chonginkhâmngei murdia “Ani ngâi” ani sikin. Masika han kêng Jisua Khrista jârin Pathien roiinpuina rangin “Amen” ei ti ngâi ani. 21 Ma hih eini mi sinpu Pathien lelê ania, nangni leh munkhata, Khrista leh inzoma ei ringna mi min thîk pea; ma hih atheipiela mi darpu Pathien nanâk hah ania, 22 ei chunga pumanina a sînthona darpu, le ei ta ranga neinun a lei mintûp murdi hah khâmna anghan ei mulungrîlngei sûnga Ratha Inthieng mi pêk ani.

23 Ni rietpuipu rangin Pathien ko koia—ku mulungrîl a riet ngâi! Nin ruthûla Korinth khuoa se khâi loi rangin ka masat zoi ani. 24 Nin iem ngêt rang thurchi nangni misîr pe rang pût mak mea; taksônna han nin inding det tiin kin riet. Manêkin, nangninanâk nan râisânna rangin nangni leh sin kin tho ani.

2 Korinth 2 ->