Matai Chonjisan Gouxioxi 4

Ersani Shiizho

(Mak 1:12-13; Luj 4:1-13)

1 Ingiedene Shenlin Ersai udurusenu hontande echise Ibilisi hhei shiizho. 2 Ersa 40 qiende xieni udu orozo bareidene oliesuzho. 3 Shiichen iredene Ersade kieliewo, "Chi Hudai kewon enbese enezighan tashii fenfulazhi ginan gholugha." 4 Ersa kieliewo, "Jinwun jiere huaizho,

'Kun amitushi zinie ginande ulie kouine.

Hudai amanse khizhesan soyuji kieliende kouine.'"

5 Ingie Ibilisi Ersai uduruzhi zhiguitu chenshi Yelusalende echi mechii zui undu oronde beigha 6 kieliewo, "Chi Hudai kewon enbese jiuli bou. Jinwun jiere,

'Hhe chade oluzhi qienxienladene fenfulazhi khaghalani

chii feizhi konnichii tashi jiere ulie mughughane.'

giezhi huaizho." 7 Ersa hhende kieliewo, "'Ezhan Hudane bu shii.' giezhi jinwun jiereye huaizho."

8 Ibilisi pse hhei uduruzhi tebie undu ula jiere khireidene duyani soyuji gojia, pse gojialani henni man uzheghazhi 9 kieliewo, "Chi papalazhi mii beiise enelai man chade ogiye." 10 Ersa hhende kieliewo, "Ibilisi, chi yola! Jinwun jiere huaizho, 'Zinie Ezhan Hudane beiizhi hhei shunji.'" 11 Ingie Ibilisi Ersase likai gie, qienxienla irezhi hhei ushilazho.

Ersa Chonjizhi Qiiwo

(Mak 1:14-15; Luj 4:14-15)

12 ErsaYaheiyai barei echisei mejiedene Jialilide khareiwo. 13 Khuinashi Jialilini Nasalese likai gie Jiabainunde echi souwo. Eneshi Xibulun, Nafutalidedu Jialilihaini kouisan oron wo. 14 Ingiekushi Ezhan Isaiya xienzhini tungo giezhi kieliesan kielien mutun gholughane giezho,

15 "Xibulun, Nafutalidedu kunla,

haibienzini mo jiere,

Yedanheni hhemiende

niman kunlai Jialilide sousan kunla,

16 Hhe khara oronde sousan bexinla fugie gonni chanlawo.

Fugusan oronde sousan kunlade gon zhouiwo."

17 Hhe shihouse kaishi giezhi Ersa chonjizhi kieliewo, "Ta geizhen giendu. Asiman gojia chadashiwo."

Tujilani Uruzho

(Mak 1:16-20; Luj 5:1-11)

18 ErsaJialilihai bienzide yokude Beduru giesan Ximun, jiuni Andelie ghuala haide on xiaisei chanlawo. Hhelashi zhaghasun bareisan kun wo. 19 Ersa hhelade kieliewo, "Ta iredene mii dagha. Bi tai zhaghasun bareiku mutun kun bareichen gholughane." 20 Hhela onni deigo jiedene hhei daghawo. 21 Ersa hhense melie yodene pse gaijiu ghualai chanlawo. Hhelashi Xibitaini kewon Yagebu, Yagebui jiuni Yaheiya wo. Hhela adarene hhantu chon jiere on huduzho. Ersa hhelai uruse 22 hhela deigo chon, adasene likai gie hhei daghawo.

Olon Kunlade Gouxioxi Chonjizho

(Luj 6:17-19)

23 ErsaJialilini gochude man yozhi hhelai huitanlade sughazhi Hudai gojiai gouxioxini chonjizhi bexinlai yanyanji gien nouzhi giemeresanlai goudaghazho. 24 Ersai minshen Xiliyade man chonji kuruwo. Kunla yanyanji gientulai uduruzhi irese Ersa goudaghawo. Yanyanji giemerezhi tendun shouisan, sheitan heisan, yanjiofen nousan, tanhon giesanlai man ireghazho. 25 Tebieji olon kunla Jialili, Jijiapoli, Yelusalen, Yudaya, Yedanheni dunmiense hhei daghawo.

<- Matai Chonjisan Gouxioxi 3 Matai Chonjisan Gouxioxi 5 ->