Matai Chonjisan Gouxioxi 11

1 Ersa 12 gie tujidene fenfulazhi baludene hhense likai gie hhelai go chenshilade echizhi kunlade sughazhi chonjizho.

Yaheiya Tujilane Ersai Uzheghale Echizho

(Luj 7:18-35)

2 Yaheiya bafanzise Mexiha giesan shiqinyi sonosudene tujilane peizhi echighawo. 3 Hhela Ersade asawo, "Hhe irene giesanshi chi onu, bijien pse niei saghei?" 4 Ersa kieliewo, "Ta echidene sonosusanyi, chanlasanyi Yaheiyade kielie. 5 Sugho chanlasanyi, dogholon yosanyi, pifugientui goudaghasanyi, dulei sonosusanyi, fugusan kun aminne olusanyi, pse nanxin kunlade gouxioxi chonjikui kielie. 6 Mii inxin ulie giechen kunde fuqi wine."

7 Yaheiyai tujila yoladene Ersa kunlade Yaheiyai kieliezho, "Ta hontande yan kunyi uzhele echiwo? Kei feiliezhi gojiolusan ghulusun mutun zholien kunyi uzhele echiwu? Pusho! 8 Ta yan kunyi uzhele echiwo? Seighan jien musisan kunyi uzhele echiwu? Seighan jien musisan kunla hongunde wo! 9 Ta jiujin yan kunyi uzhele echiwo? Xienzhii uzhele echiwu? Enbene! Bi tande kielieye, hheshi xienzhise da fugieni wo. 10 Jinwun jiere,

'Uzhe, bi qinsi kunne chii melie peizhi

chii moni zhunbei gieghane.'

giezhi huaisanshi ene kun wo. 11 Bi tande shuhua kielieye, biereila olusan kun dunda xili gieghasan Yaheiyase fugieni nieda uwoma, asiman gojiade zui meila kun hhense fugie wo. 12 Yaheiyani hhe xienzise eli kutula asiman gojiani hende eghizho, lihaitu kun hhei qianlazho. 13 Soyuji xienzhishu, guijinshu jiere melie kieliesanlashi man Yaheiyase jieshu oluwo. 14 Kieliesanlai ta xianxin giene giese Yaheiyashi irene giesan Iliya enbene. 15 Chighin bitu kunla chenliendu!"

16 "Bi ene idai kunlai yanghala bilane? Hoxian geidoude souzhi nadusan kesilai xianli. Hhela nieniedene waradazhi kieliene,

17 'Bijien tande bierei agiku xiu feiliese ta ulie jiuline.

Kun fuguwo giezhi wilase ta ulie wilane.'

18 Yaheiya iredene ulie ijiezhi ulie ochise kunla hhei jiere sheitan wine giezhi kieliene. 19 Kunnikewon iredene ijiezhi ochise kunla ene kun jin ijiezhi ochikure wo. Shui shanjisan kun, zuirenlani zhanlien wo giezhi kieliene. Ingieliuzhe aghelishi giekughala olusan bikuni zhenmin giene."

Geizhen Ese Giesan Kunlade Jingao Giezho

(Luj 10:13-15)

20 Hhe xienzide Ersa nenlitu shiqin olon giese chenshii kunla geizhen ese giese hhelade jingao giezhi kieliewo, 21 "Gelaxin, Bosaida, tande gou widawo! Tai dunda giesan nenlitu shiqinni Tuilo, Xidunde giewoshi hhela eqighanse madei zhodene jierene funiesun teizhi geizhen giewo. 22 Bi tande kielieye, panjiku udude ta shouiku zeinan Tuilo, Xidunse da fugie wo! 23 Jiabainun, chii undudaghazhi asiman jiere khireighanu? Chii dozoheide anda boughane. Chii hhende giesan nenlitu shiqinni Sodomade giezhoshi hhe chenshi eli kutula wine. 24 Bi tande kielieye, panjiku udude ta shouiku zeinan Sodomase da fugie wo!"

Mini Shida Iredene Hhamura

(Luj 10:21-22)

25 Hhe xienzide Ersa kieliewo, "Asiman zeminni Ezhan, Ada, chii mafan gieghawo. Chi ene shiqinlani agheli, erlintu kunlade niuighazhi ga kewosi mutun kunlade mejieghawo. 26 Ada, enbene, eneshi chi duranghalane giesanwo. 27 Yanniliuzhe Adami made ogiwo. Adase chugo kiema kewonni mejie dane. Kewon, pse kewon yenyi mejieghasan kunse chugo kiema Adai mejie dane. 28 Jien khishulazhi gunduni beiliesan kunla man mii shida ire. Bi tai hhamuraghaye. 29 Ta mii jiabanyi jierene zhozhi mase suru. Mii zhughede renyi, meilade uzhekui wine. Tai zhughe hhamura shidane. 30 Mii jiaban sunfan wo. Mii danzi gongien wo."

<- Matai Chonjisan Gouxioxi 10 Matai Chonjisan Gouxioxi 12 ->