Lujia Chonjisan Gouxioxi 20

Ersani Qienlini Asazho

(Mat 21:23-27; Mak 11:27-33)

1 Niudude Ersa mechide kunlade sughazhi Hudai gouxioxini jianjikude fugie buwa, jinwun hanjiala zhanlaolare hhantu ire 2 Ersade kieliewo, "Chi yan qienlighala ene shiqinlai giesei bijiende kielie. Chade ene qienlii ogisanshi kien wo?" 3 Ersa kieliewo, "Biye tande nie unqi asaye. Ta made kielie, 4 Yaheiyai xili gieghaku qienli asimanse onu, kunlase wo?" 5 Hhela goyalane shanlian giezhi kieliewo, "Matan 'Asimanse wo.' giese 'Ta yale hhei xianxin ulie giene.' giezhi hhe kieliene. 6 Kunlase wo giese bexinla man matai tashighala eghi alane, hhela Yaheiyashi xienzhi wo giezhi xianxin giezho." 7 Ingie khalase iresei ulie mejiene giezhi hhela kieliewo. 8 Ersa hhelade kieliewo, "Biye tande yan qienlighala ene shiqinlai giesei ulie kieliene."

Doghun Wiliechi

(Mat 21:33-46; Mak 12:1-12)

9 Ersa ene kielienyi bexinlade bilazhi kielie qiiwo. "Nie kun nie yenzi putou zeiladene kunlade bouizhi ogi, gholode echi oloncha souwo. 10 Shihou kuzhese nie hojine peizhi nexianne ghuraghale echiwo. Bouisan kunla hhei idun eghidene khosun khareighawo. 11 Da nie hojine pse ghuraghale echiwo. Eghizhi shizheghadene khosun echighawo. 12 Pse nie hojine echighawo. Eghizhi shan dailaghadene tungu khizheghawo. 13 Putou yenzii ezhan kieliezho, 'Bi matugiene? Bi oresan kewonne echighayema, hhela zunjineba.' 14 Bouisan kunla hhei chanladene nieniene shanlian giezhi kieliewo, 'Eneshi jiachanni jienliechen wo. Matan enei alayema, jiachanni manughun gholune!' 15 Ingie putou yenzise tungu khigha alawo. Ta sumulase putou yenzii ezhan ene kunlai matugiene? 16 Ezhan iredene bouisan kunlai man alazhi psedu kunlade bouizhi ogine." Chenliesan kunla kieliewo, "Imutu shiqin jiedui uwo!"

17 Ersa hhelai uzhedene kieliewo, "Qingiese ene idon jinwunshi yan isi wo?

'Gie giesan kunla bendasan tashi

giei zhunyo tashi gholuwo.'

18 Jien hhe tashi jiere anda bousan kunla zhazhazi gholune. Ene tashi kienyi jiere anda bouse zai miendaghane." 19 Jinwun hanjia, fugie buwala Ersa hhelai bilazhi kieliesei uzhe khizhedene deigo bareine giezhoma, bexinlase ayizho.

Shui Jiuiku

(Mat 22:15-22; Mak 12:13-17)

20 Hhela kunlai jizide jiazhon gieghazhi Ersani uzheghale echiwo. Hhe kielie codaghase shenzhande zhazhi bareighane giezho. 21 Jiazhon giesan kunla Ersade asazho, "Loushi, chi kieliesan, jianjisan man oluzho. Enei bijien mejiezho. Chi kunni niekielien uzhezhi Hudai daolini shixinde sughazho. 22 Matan Kaisa honshande shui jiuise oluzhou ese oluzho?" 23 Ersa piendasanyini mejiedene hhelade kieliewo, 24 "Made miengui nie uzhegha. Ene qiorun, haoshi kiennughun wo?" Hhela kieliewo, "Kaisanughun wo." 25 "Qinse Kaisanughunshi Kaisade ogi, Hudanughunshi Hudade ogi." 26 Hhela kunlai melie Ersa kieliesande yama codasei erei dazho. Ersa huida giesande ghaniradene amanlane menjiwo.

Aminne Oluku

27 Fuho gieku shiqin uwo giesan niezhan Sadugai kunla Ersai shida ire asawo, 28 "Loushi, Musa guijin jiere huaizho, nie kun bierei agidene kewosi wi duya ijiese jiuni zhoui gaidene houdei liuikuni wo giezho. 29 Ingiese gaijiu dololie laoda bierei agidene kewosi wi duya ijiewo. 30 Laoer, laosan man hhei zhouiwo. 31 Dololie man zhouidene kewosi wi duya ijiewo. 32 Zuihoude biereiye duya ijiewo. 33 Ingiese fuho giekude hheshi kienyi bierei wo? Gaijiu dololie man hhei agiwo."

34 Ersa hhelade kieliewo, "Ene duyani kunla agizhi dafalane. 35 Duya ijiesan kun dundase aminne oluzhi houshide zige bichen kunla ulie agizhi ulie dafalane. 36 Hhela pse ulie duya ijiene, qienxien niekielien wo. Hhelashi fuho giechen wo, Hudai kesila wo. 37 Duya ijiesan kun aminne olukui Musaye eghesun khan sideraku jinwun jiere zhenmin giezho. Musa Ezhanni urukude Iburaheimuni Huda, Isagheini Huda, Yagebuni Huda giezho. 38 Ingiese Hudashi duya ijiesan kunyi Huda pusho, amitu kunyi Huda wo. Huda uzhese kunla man amitu wo."

39 Giedun jinwun hanjia kieliewo, "Loushi, chi kieliesan oluzho." 40 Hhela ayizhi pse hhende yama asa dazho.

Mexihashi Dawudeni Houdei Onu

(Mat 22:41-46; Mak 12:35-37)

41 Ersa hhelade kieliewo, "Kunla matugie Mexihashi Dawudeni houdei wo giezho? 42-43 Dawude goyane Zeburei jiere kieliezho,

'Ezhan mii Ezhande kieliewo,

"Bi duitoulaichii kon dourachii teitula

chi mini borun miende sou."'

44 Qingiese Dawude Mexihai Ezhan giezhi uruse Mexiha matugie Dawudeni houdei wo?"

45 Bexinla chenliekude Ersa tujiladene kieliewo, 46 "Ta jinwun hanjialai fangula. Hhela fudu jienni musidene geidoude toreizhi kunla hhelade kielien asakude xiqi wo. Huitanni undu wizi, xini shanxide soukude xiqi wo. 47 Hhela guafui gieni chigheine. Jiazhon giezhi oloncha onxian giene. Enezighan kunlai pse gundude faine."

<- Lujia Chonjisan Gouxioxi 19 Lujia Chonjisan Gouxioxi 21 ->