Lujia Chonjisan Gouxioxi 14

Hhamuraku Udude Gienni Goudaghazho

1 Hhamuraku udude Ersa nie Falisai kunni lindaoni giede ijiele echikude kunla ghulazhi uzhezho. 2 Zhen hheni melie shighara beghelieni khaitusan kun wine. 3 Ersa jinwun loushi, Falisai kunlade asazho, "Hhamuraku udude gien uzhese olunu ulie olune?" 4 Hhelade shenqi uwo. Ersa hhei jiere khane tei, uzhe goudaghadene echighawo. 5 Ingie hhelade kieliewo, "Tai dunda hhamuraku udude enzheghe, fughe nokiende anda bouse laizhi ulie khizhenu?" 6 Hhela ene kieliende yama kielie dawo.

Goyane Meilade Uzhechen Kun

7 Xinlazhi iresan zhochenla goyalane shanxide echi souwo. Ersa hhelai chanla bilazhi kieliewo, 8 "Ta ghurunde echise shanxide bu sou, tanse fugie zhochen bise tani daoghane. 9 Giei kun iredene kieliese chi ene oronyi zhochende nie ranji giese chi shizhezhi daone. 10 Xinlazhi irekude ta zui bixinni oronde souse xinlasan kun chini uruzhi kieliene, 'Zhanlien, chi ene shanxide sou.' Ingiese kunla uzhese giedughon gou wo. 11 Kien goyane undudaghase boghonidaghane. Goyane boghonidaghase undudaghane."

12 Ersa xinlasan kunde kieliewo, "Chi udukun, heifande zhanlienlane, gaijiulane, qingulane, giebei bayankunlai bu xinla, pse hhelaye chii xinlane. 13 Chi ghurun ijiekude nanxin kunla, canfei, dogholon, sugho, enelani xinla, ingiese chade fuqi wine. 14 Hhela chini khareizhi xinla danema, gou kunla fuho giekude Huda chade gouni ogine."

Ghurunde Xinlaku

(Mat 22:1-10)

15 Hhantu sousan kun dunda nie kun enei chenliedene Ersade kieliewo, "Hudai gojiade xi ijiesan kunde fuqi wine." 16 Ersa hhende kieliewo, "Nie kun fugiede xi beilazhi zhochen olon xinlawo. 17 Xi souku shihoude hojine peizhi xinlasan kunlai urughale echiwo, 'Irendu, man zhunbei gie goudaghawo.' 18 Kunla nienieji man tui qiiwo. Tou 1 gie kun kieliewo, 'Bi nie ghazha agizho. Uzhele echine. Ire dane. Bu hoku.' 19 Da nie kun kieliewo, 'Bi 5 dui fughe agiwo. Shiile echine. Bu hoku.' 20 Pse nie kun kieliewo, 'Bi bierei agiwo, ingiese echi dane.'"

21 "Hhe hoji kharei iredene ezhandene ene shiqinni man kieliewo. Ezhan hokuzhi hojidene kieliewo, 'Ghujighan echidene chenshini fugie geidou, ga geidoudedu nanxin kun, canfei, sugho, dogholonlai urude ire.' 22 Hoji ezhandene kieliewo, 'Chi kieliesanlai man banji goudaghawo, da kun oron wine.' 23 Hojidene kieliewo, 'Chi echidene dalu mo jieredu, ga mo jierededu kunlai ninkounin uruzhi iredene mini oronni souzhi durugha.' 24 Bi tande kielieye. Touchan xinlasan dunda mini ghurunse ijiechen kun nieda uwo."

Daghasan Kun Daijia Feine

(Mat 10:37-38)

25 Tebieji olon kun Ersare hhantu yozho. Hhe ochiradene hhelade kieliewo, 26 "Kun mini enende irese goyane ada, ana, bierei, kesila, eghechijiu, gaijiulasene, pse goya aminsene made olon ulie orese mini tuji danla dane. 27 Kien goya shizijiane beiliezhi mii ulie daghase mini tuji danla dane."

28 "Ta kien lou giekude giezhi gholughanu gholugha dane giezhi baerni ulie sananu? 29 Kunpa ta jichune jiedene pse giedase kunla uzhezhi xiniene, 30 'Ene nie kun loune giedene giezhi khigha dawo.'"

31 "Pse nie honshan hhe nie gojiani honshanghala eghindune giese xien soudene kun giedughon bikuni ulie sananu? Bi 10000 kunghala kunlai 20000 kunni eghi shidanu? 32 Eghi dase hhela gholo bikude kun nie peisenu matugiezhi heqishighakui shanlian giene. 33 Kienliuzhe shihenine ulie jiese mini tuji danla dane."

34 "Dansunshi gouni wo. Widaoni widase pse matugie koudaghane? 35 Widao widasan dansunni ghazha, hhaghade teise yama zoin uwo. Zinie ghadane bendane. Chighin bitu kunla chenliendu!"

<- Lujia Chonjisan Gouxioxi 13 Lujia Chonjisan Gouxioxi 15 ->