Yaheiya Chonjisan Gouxioxi 12

Mereiyen Ersade Xianshui Kiezho

(Mat 26:6-13; Mak 14:3-9)

1 Jiulidaosan Jieni melieshi zhighudude ErsaBodanide kuzhi irewo. Hheshi ErsaLasalui aminne olughasan oron wo. 2 Kunla Ersade oluzhi heifan zhunbei giezho. Mada ushilazho. LasaluErsaghala kunlare hhantu souzho. 3 Mereiyen 1 jin zhen nadaghala giesan guizhuntu xianshuini agizhedene Ersai kon jiere kiesenu usunghalane saiwo. Giedera xianshui widao penjizho.

4 Ersai ghudandune giesan tuji Jialie kun Yuda kieliewo, 5 "Ene xianshuini 300 gie miengu huidene nanxin kunlade oginema!" 6 Hhe ene kielienyi kieliekushi nanxin kunlade sumulasan pusho. Goyaneshi nie ghughei wo. Baer qibaoni hhe bareizho. Hhense baerni chan agizho.

7 Ingiese Ersa kieliewo, "Bu danla, hhe ene xianshuii mii bulaku udude zhunbei giezho. 8 Nanxin kunla tanre chan hhantu woma, bi tanre chan hhantu uwo."

9 Olon Yutai kunla Ersa hhende bikui mejiedene uzhele irewo. Zinie Ersai uzhekui pusho. Fuguzhi aminne olusan Lasaluiye uzhene giezho. 10 Ingiese fugie buwala Lasaluiye alane giezhi shanlian giezho. 11 Ingiekushi Lasalui ene shiqin jiere olon Yutai kunla hhelai bendadene Ersai xianxin giezho.

Honshan Mutun Yelusalende Orozho

(Mat 21:1-11; Mak 11:1-11; Luj 19:28-40)

12 Khuichudu olon kunla jieqi daoghale iredene ErsaYelusalende irekui mejiewo. 13 Ingie zunshu mutun chalalai bareidene hhei jienliele echi fugiede waradazhi kieliewo,

"Hesanna!*

Ezhanni niereghala iresan Isilieni honshande doulandu!"

14 Ersa nie ga enzheghei ereizhi olu unuwo. Jinwun jiere jilasan mutun,

15 "Xiwunni kunla bu ayi.

Uzhe, tai honshan

ga enzheghe unuzhi irewo."

16 Hhe xienzide tujilani ene shiqinyi minbai olu dazho. Ersa kuaikui jienliedene hhela ene kielienshi Ersai zhiizhi kieliesei, pse kunla hhende qingiezhi giesei sumula irewo.

17 ErsaLasalui mezase waradazhi khizhedene aminne olughakude shidani beisan kunla hhe giesan shiqinyi kunlade izhi kieliezho. 18 Ingiese olon kunla Ersa xienjighasan ghudureqii mejiedene hhei jienliele echiwo. 19 Ingiese Falisai kunla nieniedene kieliewo, "Matande yama banfa widawo. Duyai kunla man hhei dagha echiwo."

Duya Ijiekune Kieliezho

20 Jieqide libai giele iresan kun dunda giedun Xila kun wo. 21 Hhela Jialilini Bosaida kunni Feilini ochiradene xiahua giezhi kieliewo, "Gujiu, bijien Ersai ochirale irewo." 22 Feili echidene Andeliede kieliewo. AndelieFeili ghuala hhantu Ersade echi kieliewo. 23 Ingie Ersa kieliewo, "Kunnikewonni kuaiku shihou kuzhewo. 24 Bi tande shuhuajia kielieye, niekozi boudei fure ghazha jiere luidene ulie fuguse dou niekozi fure wo. Fuguse olon boudei osizhi khizhene. 25 Goya amindene oresan kun aminne widaghane. Ene duyade aminne henjisan kun aminne chanqi bouine. 26 Mii ushilasan kun indan mii daghakuni wo. Bi khalashi mii ushilasan kun ye khala wo. Mii ushilasan kunyi Adami danren giene. 27 Ede mii zhughede nango giezho. Bi yan kieliese gou wo? 'Ada, mii ene shiqinse daogha.' giezhi kielienu? Ulie, bi zhen ene shiqinde irezho. 28 Ada, chi nierene famashigha!" Hhe xienzide asiman jierese shenqi irezhi kieliewo, "Bi ijin nierene famashighawo, pse famashighane." 29 Shida beisan kunla sonosusenu kieliewo, "Olien tunguliezho." Psedu kunla kieliewo, "Qienxien hhende kielien kieliezho." 30 Ersa kieliewo, "Ene shenqishi made oluzhi iresan pusho. Tande oluzhi iresan wo. 31 Ede duyani panjiku shihou kuzhewo. Ene duyani touzii tou khighane, jiushi Ibilisi wo. 32 Mii zemin jierese qila qiighakude bi kunlai man xiidene shidane irene." 33 Ersai ene kielienshi goyane matugie fugukui zhiizhi kieliezho.

34 Ingiese kunla kieliewo, "Bijien chenliese jinwunde kieliesanshi Mexiha ibeizi amitu wo giezho. Chi matugie 'Kunnikewonni qila qiighane.' giezhi kieliene? Chi kieliesan Kunnikewonshi kien wo?"

35 Ersa kieliewo, "Gon tai dunda oloncha widazho. Gon bikude ta gon dunda yodu. Pse kharani kuzhese tai khane. Kharanide yochen kun khala echikune ulie mejiene. 36 Gon bikude ta gonni xianxin giezhi gonni kewosi danla." Ersa ene kielienyi kielie baragha likai giedene hhelase pii widawo.

Xianxin Ese Giesan Kunla

37 Hhelai melie Ersa ghudureqi olon xienjighazhoma, hhela hhei xianxin ulie giene. 38 Ingiese Isaiya xienzhi kieliesan kielien mutun gholuwo,

"Ezhan, bijienyi chonjisanyi kien xianxin giewo?

Chii nenlii kiende xienjighane?"

39 Hhela xianxin ulie giekushi Isaiya pse kieliezho,

40 "Ezhan hhelai nudunyini sugho gholughazhi

zhugheini khiduzheghakushi

Hhela nudundene chanlazhi

zhughedene minbai olusenu kharei daorese

Bi hhelai goudaghakuse ayizho."

41 IsaiyaErsai famani chanladene hhei zhiizhi ene kielienyi kieliesan wo. 42 Ingieliuzhe Yutai kunni noyen dundaye hhei xianxin giesan kun olon wo, Falisai kunla huitanse tou khighakuse ayizhi chenren gie dazho. 43 Hhela kunni kuaikui Hudai kuaikuse xiqi wo.

44 Ersa fugiede kieliewo, "Kunla mii xianxin giese zinie mii xianxin giesan pusho, mii peizhi ireghasan hhei xianxin giezho. 45 Kunla mii chujieghese mii peizhi ireghasanyi chujieghezho. 46 Bi duyade irese duyani gon wo. Mii xianxin giesan kunlai bi kharanide ulie soughane. 47 Mii kielienyi sonosudene ulie giechen kunyi bi ulie panjine. Bi duyade irese duyai panjile ese irezho, jiuile irezho. 48 Mii ulie kerechen, kielienyimi ulie jienliechen kunni panjiku wine. Bi kieliesan kielien duya barakude hhei panjine. 49 Bi kieliesanshi goyane sumulazhi kieliesan pusho. Mii peizhi ireghasan Adami made minlin ogizhi mii yan kielieghase bi yan kieliezho. 50 Adaimi minlinshi chanqiku amin bikui bi mejiene. Ingiese bi zinie Adami made kielieghakuni kieliene."

<- Yaheiya Chonjisan Gouxioxi 11 Yaheiya Chonjisan Gouxioxi 13 ->